ສະພາບການໂລກລະບາດໂຄວິດ-19 ພວມມີການຜັນແປຢ່າງສັບສົນໃນໂລກ, ພິເສດແມ່ນຢູ່ບາງປະເທດທີ່ມີເສັ້ນຊາຍແດນຕິດກັບຫວຽດນາມ ດ້ວຍຈຳນວນຜູ້ຕິດເຊື້ອພະຍາດ ແລະ ເສຍຊີວິດນັບມື້ນັບເພີ່ມຂຶ້ນ. ຢູ່ຫວຽດນາມ, ພາຍຫຼັງໄລຍະ 30 ວັນທີ່ບໍ່ພົບກໍລະນີຕິດເຊື້ອພະຍາດໃນຊຸມຊົນ, ນັບແຕ່ວັນທີ 27 ເມສາ ມາຮອດປະຈຸບັນ ໄດ້ກວດພົບກວ່າ 300 ກໍລະນີຕິດເຊື້ອພະຍາດຢູ່ບາງທ້ອງຖິ່ນ, ຊ້ຳບໍ່ໜຳແມ່ນຢູ່ໂຮງໝໍຂັ້ນສູນກາງ. ເປົ້າໝາຍສູງສຸດໃນປະຈຸບັນຂອງຫວຽດນາມ ແມ່ນສຸມໃສ່ປ້ອງກັນ, ຕ້ານໂລກລະບາດ, ແກ້ໄຂຜົນຮ້າຍຢ້ອນຫຼັງຈາກໂລກລະບາດໂຄວິດ-19 ເພື່ອຮັບປະກັນຄວາມສະຫງົບປອດໄພໃຫ້ແກ່ປະຊາຊົນ, ຮັກສາສຸຂະພາບໃຫ້ແກ່ປະຊາຊົນເພື່ອແນໃສ່ປະຕິບັດເປົ້າໝາຍຄວບຄູ່ແມ່ນທັງປ້ອງກັນ, ຕ້ານໂລກລະບາດຢ່າງປອດໄພ, ມີປະສິດທິຜົນ ແລະ ພັດທະນາເສດຖະກິດສັງຄົມຢ່າງມີໄຊ.
ຕໍ່ໜ້າການຜັນແປທີ່ສັບສົນ, ຍາກທີ່ຈະຄາດຄະເນລ່ວງໜ້າໄດ້ນັ້ນ, ຄວາມສ່ຽງເກີດໂລກລະບາດແມ່ນສູງທີ່ສຸດ, ຄະນະພັກ ແລະ ອຳນາດການປົກຄອງ, ບັນດາອົງການທີ່ມີໜ້າທີ່ທຸກຂັ້ນ, ໂດຍສະເພາະແມ່ນກຳລັງແນວໜ້າຂອງຫວຽດນາມ ໄດ້ປະຕິບັດບັນດາມາດຕະການທີ່ເໝາະສົມຢ່າງວ່ອງໄວ, ຂ້ຽວຂາດ ແລະ ມີປະສິດທິຜົນຖືກຕ້ອງຕາມການຊີ້ນຳຂອງຄະນະເລຂາ, ລັດຖະບານ, ນາຍົກລັດຖະມົນຕີ ແລະ ຫົວໜ້າຄະນະຊີ້ນຳແຫ່ງຊາດ, ຄວບຄຸມສະພາບການຢ່າງວ່ອງໄວ, ບໍ່ປະໃຫ້ໂລກລະບາດແຜ່ລະບາດອອກສູ່ວົງກວ້າງຢ່າງເດັດຂາດ.
ໃນການຜັນແປຫຼ້າສຸດ, ທີ່ກອງປະຊຸມກັບ 63 ແຂວງ, ນະຄອນກ່ຽວກັບວຽກງານປ້ອງກັນ, ຕ້ານໂລກລະບາດໂຄວິດ-19, ທ່ານນາຍົກລັດຖະມົນຕີຫວຽດນາມ ຟ້າມມິນຈິ໊ງ ໄດ້ຮຽກຮ້ອງໃຫ້ຄະນະພັກທຸກຂັ້ນເສີມຂະຫຍາຍບົດບາດຊີ້ນຳນຳພາ, ບໍລິຫານ, ຄຸ້ມຄອງຂອງອຳນາດການປົກຄອງ ແລະ ປຸກລະດົມການເຂົ້າຮ່ວມຂອງທົ່ວປວງຊົນ, ທັງລະບົບການເມືອງ, ເປັນເຈົ້າການເສີມຂະຫຍາຍກຳລັງພາຍໃນດ້ວຍຈິດໃຈ: “ປ້ອງກັນ” ເປັນພື້ນຖານ, ມີຍຸດທະສາດຍາວນານ, ມີລັກສະນະຕັດສິນ; “ຕ້ານ” ແມ່ນຮີບດ່ວນ, ຂ້ຽວຂາດ, ວ່ອງໄວ ດ້ວຍຈິດໃຈ “ຕ້ານໂລກລະບາດຄືດັ່ງຕ້ານສັດຕູ”. ຕາມນັ້ນແລ້ວ, ວຽກງານປ້ອງກັນ, ສະກັດກັ້ນໂລກລະບາດໂຄວິດ-19 ຂອງຫວຽດນາມ ເລີ່ມຫັນຈາກສະພາບປ້ອງກັນເປັນຕົ້ນໄປສູ່ສະພາບສົມທົບກັນຢ່າງກົມກຽວ; ເພີ່ມທະວີການນຳໃຊ້ເຕັກໂນໂລຊີເພື່ອຕິດຕາມກວດກາ; ປະຕິບັດທິດທາງ “ຕັ້ງໜ້າ ປ້ອງກັນ, ກວດພົບໄວ, ແຍກຕົວໄວ, ປິ່ນປົວຢ່າງມີປະສິດທິຜົນ, ແກ້ໄຂຢ່າງເຖິງຖອງ, ຮັບປະກັນສະພາບການເປັນປົກກະຕິໂດຍໄວ”.
ຕາມຄຳຮຽກຮ້ອງຂອງທ່ານນາຍົກລັດຖະມົນຕີ ຟ້າມມິນຈິ໊ງ ແລ້ວ, ບັນດາກະຊວງ, ອົງການຈັດຕັ້ງ, ທ້ອງຖິ່ນ ຕ້ອງເພີ່ມທະວີການຕິດຕາມກວດກາການປະຕິບັດວຽກງານປ້ອງກັນ, ຕ້ານໂລກລະບາດໃນຂອບເຂດພາລະບົດບາດ, ໜ້າທີ່, ສິດທີ່ໄດ້ຮັບມອບໝາຍ. ຄະນະຊີ້ນຳແຫ່ງຊາດກ່ຽວກັບການປ້ອງກັນ, ຕ້ານໂລກລະບາດໂຄວິດ-19 ຕ້ອງຫັນຂອບເຂດໜ້າທີ່ຄວາມຮັບຜິດຊອບໃຫ້ເປັນລະອຽດຢ່າງຈະແຈ້ງ, ແຫ່ງໃດປະໝາດ, ຂາດຄວາມລະມັດລະວັງຕ້ອງສຳຫຼວດກວດກາ, ແກ້ໄຂຄວາມຮັບຜິດຊອບຕາມຂໍ້ກຳນົດຂອງພັກ ແລະ ກົດໝາຍຂອງລັດ. ທ່ານນາຍົກລັດຖະມົນຕີ ຟ້າມມິນຈິ໊ງ, ຊີ້ແຈ້ງວ່າ.
“ຕ້ອງແກ້ໄຂຢ່າງເຂັ້ມງວດ ແລະ ເປີດເຜີຍບັນດາກໍລະນີລະເມີດ, ນັບທັງລັດຖະກອນ. ເມື່ອໄດ້ຮັບໜ້າທີ່, ສິດ, ໄດ້ນຳໃຊ້ບັນດາເຄື່ອງມືອຸປະກອນຂອງລັດ ແຕ່ບໍ່ເຮັດ, ແມ່ນຕ້ອງມອບໃຫ້ຜູ້ອື່ນເຮັດແທນ. ພວກເຮົາບໍ່ຈົ່ງຈຽມ, ຫຼົບຫຼີກ. ອັນໃດເຮັດຖືກຕ້ອງກໍ່ລະດົມກຳລັງໃຈ, ອັນໃດຍັງບໍ່ທັນເຮັດໄດ້ພວກເຮົາຕ້ອງມານະພະຍາຍາມ, ຖ້າເຮັດບໍ່ໄດ້ກໍ່ຕ້ອງແກ້ໄຂຕາມຄວາມຮັບຜິດຊອບ”.
ໃນຈຸດເວລານີ້, ບັນດາກະຊວງ, ຂະແໜງການຂັ້ນສູນກາງ, ຄະນະກຳມະການປະຊາຊົນບັນດາທ້ອງຖິ່ນຂອງຫວຽດນາມ ກໍ່ໄດ້ຮຽກຮ້ອງຕ້ອງຮີບເຮັ່ງ, ເດັດດ່ຽວປັບປຸງການປະຕິບັດການແຍກຕົວ, ຕິດຕາມອາການສຸຂະພາບພາຍຫຼັງທີ່ແຍກຕົວລວມໝູ່ສຳລັບຜູ້ເຂົ້າເມືອງ ຮັບປະກັນການແຍກຕົວໃຫ້ໝົດເວລາກຳນົດ, ພິເສດແມ່ນປະຕິບັດການມອບ-ຮັບ, ຕິດຕາມອາການສຸຂະພາບໃນເວລາແຍກຕົວຢູ່ເຮືອນ, ທີ່ບ່ອນຢູ່ອາໄສ; ເພີ່ມທະວີການຄຸ້ມຄອງຄົນເຂົ້າ-ອອກເມືອງໃຫ້ຖືກຕ້ອງຕາມການຊີ້ນຳຂອງນາຍົກລັດຖະມົນຕີຢ່າງເຄັ່ງຄັດ. ບັນດາກະຊວງທີ່ກ່ຽວຂ້ອງ, ຄະນະກຳມະການປະຊາຊົນຂັ້ນແຂວງ ຊີ້ນຳການສຳຫຼວດ, ກວດຄືນການຄຸ້ມຄອງຄົນຊາວຕ່າງປະເທດເຂົ້າ-ອອກເມືອງ, ແກ້ໄຂບັນດາຂໍ້ບົກຜ່ອງໃນການແຍກຕົວສຳລັບຄົນເຂົ້າເມືອງ, ການຄຸ້ມຄອງຊາວຕ່າງປະເທດທີ່ອາໄສຢ່າງຜິດກົດໝາຍໂດຍທັນທີ.
ບັນດາແຂວງ, ນະຄອນຂຶ້ນກັບສູນກາງ ກໍໄດ້ຮຽກຮ້ອງເລື່ອງເປັນເຈົ້າການຍົກສູງກຳລັງຄວາມສາມາດໃນການວິໄຈ, ກຳລັງຄວາມສາມາດໃນການແຍກຕົວໃນບໍລິເວນ, ຮັບປະກັນການຕອບສະໜອງຕໍ່ບັນດາສະພາບການຕ້ານໂລກລະບາດຕາມເນື້ອໃນຈິດໃຈຊີ້ນຳຂອງຄະນະຊີ້ນຳແຫ່ງຊາດ. ທ່ານນາຍົກລັດຖະມົນຕີ ຟ້າມມິນຈິ໊ງ, ຊີ້ແຈ້ງວ່າ.
“ບັນດາແຂວງ ມີຂໍ້ຕົກລົງນຳໃຊ້ມາດຕະການແຍກຫ່າງສັງຄົມຕາມການຈັດແບ່ງຂັ້ນ ຕ້ອງຮັບປະກັນຂອບເຂດການນຳໃຊ້ໃຫ້ກະທັດລັດ, ໃນຂອບເຂດນ້ອຍສຸດ ເພື່ອສາມາດຫຼີກລ້ຽງການສົ່ງຜົນກະທົບທີ່ບໍ່ດີຕໍ່ເສດຖະກິດ, ສັງຄົມ, ບໍ່ສົ່ງຜົນກະທ້ອນເຖິງການຂົນສົ່ງສິນຄ້າຜ່ານດ່ານຊາຍແດນ, ເອົາໃຈໃສ່ເຖິງການຮັບປະກັນວັດຖຸໃນການຜະລິດ”.
ທ່ານນາຍົກລັດຖະມົນຕີກໍ່ຮຽກຮ້ອງໃຫ້ກະຊວງສາທາລະນະສຸກຫວຽດນາມ ສືບຕໍ່ອັບເດດ, ມີແຜນການກະກຽມໃຫ້ທຸກສະພາບການ, ບໍ່ປະໃຫ້ຖືກຕົກຢູ່ທ່າຮັບ, ກະທັນຫັນ; ຍູ້ແຮງການຊອກຫາ, ພົວພັນກັບບັນດາປະເທດທີ່ມີວັກຊິນໂດຍໄວ ເພື່ອຊື້ວັກສິນປ້ອງກັນໂລກລະບາດ, ຊອກຫາແຫຼ່ງສະໜອງວັກຊິນຢູ່ຫຼາຍປະເທດ, ຮັບປະກັນໃຫ້ມີວັກຊິນໄວທີ່ສຸດ ແລະ ສັກວັກຊິນໃຫ້ຫຼາຍຄົນທີ່ສຸດເທົ່າທີ່ຈະເຮັດໄດ້ ເພື່ອຍູ້ໂລກລະບາດໂຄວິດ-19 ຄັ້ງໃໝ່ໃຫ້ຖອຍໄປໂດຍໄວ ຮັບປະກັນເປົ້າໝາຍຄວບຄູ່ທັງປ້ອງກັນ, ຕ້ານໂລກລະບາດ, ທັງພັດທະນາເສດຖະກິດຢູ່ຫວຽດນາມ.
(ແຫຼ່ງຄັດຈາກ VOV)
