ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ
(ພາບ: TTXVN)
ຢູ່ນອກກອງປະຊຸມສຸດຍອດອາຊຽນ ຄັ້ງທີ 36, ຕອນບ່າຍວັນທີ 26 ມິຖຸນາ, ໄດ້ດຳເນີນການພົບປະທາງອອນລາຍລະຫວ່າງການນຳອາຊຽນ ແລະ ສະພາລັດຖະສະພາລະຫວ່າງຊາດອາຊຽນ (AIPA). ກ່າວຄຳເຫັນທີ່ການພົບປະ, ໃນຖານະເປັນປະທານ AIPA ຄັ້ງທີ 41, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ຢືນຢັນວ່າ, AIPA ປາດຖະໜາຢາກມີການແລກປ່ຽນ, ສົມທົບກັນລະຫວ່າງ AIPA ແລະ ອາຊຽນ ຢູ່ທຸກຂັ້ນໃຫ້ຫຼາຍກວ່າອີກ. ເນື່ອງໃນໂອກາດນີ້, ທ່ານນາງປະທານສະພາແຫ່ງຊາດ ຫງວຽນທິກິມເງິນ, ໄດ້ສະເໜີ 3 ຂົງເຂດເຊິ່ງ AIPA ຈະຍູ້ແຮງໃນການຮ່ວມມືກັບອາຊຽນ. ທ່ານນາງກ່າວວ່າ.
“ກ່ຽວກັບດ້ານການເມືອງ - ຄວາມໝັ້ນຄົງ, AIPA ສືບຕໍ່ເພີ່ມທະວີການຮ່ວມມືຮັບປະກັນລັກສະນະກະຈ່າງແຈ້ງ, ເປີດອົກເປີດໃຈ, ວິທີສຳຜັດອີງໃສ່ກົດໝາຍ ແລະ ເນັ້ນໜັກເຖິງບົດບາດໃຈກາງຂອງອາຊຽນ. ບັນດາລັດຖະສະພາ AIPA ໄດ້ຮັບຮູ້ຄວາມສຳຄັນຂອງສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ ແລະ ຄວາມເສລີໃນການເດີນເຮືອ, ການບິນຢູ່ທະເລຕາເວັນອອກ, ກໍຄືຊຸກຍູ້ການສ້າງຄວາມໄວ້ເນື້ອເຊື່ອໃຈ, ບັນດາມາດຕະການປ້ອງກັນ ເພື່ອຍົກສູງຄວາມໄວ້ເນື້ອເຊື່ອໃຈລະຫວ່າງບັນດາຝ່າຍ. ພວກຂ້າພະເຈົ້າໄດ້ເນັ້ນໜັກເຖິງຄວາມຈຳເປັນຂອງການລະງັບໃຈດ້ວຍຕົນເອງ, ບໍ່ມີການກະທຳທີ່ຈະເຮັດໃຫ້ສະພາບການສັບສົນຂຶ້ນຕື່ມ; ຢຶດໝັ້ນແກ້ໄຂການຂັດແຍ້ງກັນໂດຍສັນຕິວິທີ ເໝາະສົມກັບກົດໝາຍສາກົນ ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982. ພ້ອມທັງສະເໜີເພີ່ມທະວີການຮ່ວມມືຢ່າງແທ້ຈິງລະຫວ່າງ AIPA ແລະ ອາຊຽນ, ເສີມຂະຫຍາຍການພົວພັນຄູ່ຮ່ວມມືໃນການເຊື່ອມຕໍ່ໃນພາກພື້ນ, ຍົກສູງກຳລັງຄວາມສາມາດຂອງບັນດາປະເທດອາຊຽນ ຮັບມືກັບບັນດາບັນຫາຄວາມໝັ້ນຄົງແບບໃໝ່.”ກ່ຽວກັບດ້ານເສດຖະກິດ, ເພື່ອປະກອບສ່ວນສ້າງປະຊາຄົມເສດຖະກິດອາຊຽນ ກວມລວມ ແລະ ເຂັ້ມແຂງດ້ວຍຕົນເອງ, ບັນດາລັດຖະສະພາສະມາຊິກ AIPA ໃຫ້ຄຳໝັ້ນສັນຍາຊຸກຍູ້ການໃຫ້ສັດຕະຍາບັນບັນດາສັນຍາ, ຂໍ້ຕົກລົງພາກພື້ນ ຕາມທິດຍູ້ແຮງການຮ່ວມມືເພື່ອສ້າງບັນດານະໂຍບາຍພັດທະນາພື້ນຖານເສດຖະກິດ.
ກ່ຽວກັບດ້ານວັດທະນະທຳ-ສັງຄົມ, AIPA ສົ່ງເສີມຍົກສູງບົດບາດຂອງແມ່ຍິງ, ເດັກນ້ອຍ ແລະ ຜູ້ອາຍຸສູງ ໃນການປະຕິບັດບັນດານະໂຍບາຍພັດທະນາເສດຖະກິດ, ສັງຄົມ, ຊົມເຊີຍບັນດາຄວາມມານະພະຍາຍາມຂອງອາຊຽນ ໃນປີ 2020 ກ່ຽວກັບການຊຸກຍູ້ຄວາມສະເໝີພາບລະຫວ່າງຍິງ-ຊາຍ ແລະ ການມອບສິດໃຫ້ແກ່ແມ່ຍິງ.
(ແຫຼ່ງຄັດຈາກ VOV)
