ພາບປະກອບ
ວັນທີ 23 ທັນວາ, ທ່ານປະທານາທິບໍດີ ອິນໂດເນເຊຍ Joko Widodo ໄດ້ຮຽກຮ້ອງໃຫ້ທຸກໆອົງການທີ່ກ່ຽວຂ້ອງຢູ່ປະເທດນີ້ຕ້ອງມີປະຕິກິລິຍາຮີບດ່ວນເພື່ອຮັບມືກັບໄພພິບັດທຳມະຊາດຄື້ນຟອງຍັກຊຸນາມິຢູ່ອ້ອມແອ້ມເຂດຊ່ອງແຄບທະເລ Sunda, ນອນລະຫວ່າງເກາະ Sumatra ແລະ Java. ທ່ານປະທານາທິບໍດີ ອິນໂດເນເຊຍ ຮຽກຮ້ອງໃຫ້ບັນດາອົງການປະຕິບັດບາດກ້າວທີ່ຈຳເປັນ, ຮີບດ່ວນ ເພື່ອຊອກຫາຜູ້ປະສົບເຄາະຮ້າຍ ແລະ ເບິ່ງແຍງສຸຂະພາບໃຫ້ຜູ້ຖືກຮັບບາດເຈັບ.
ວົງການເຈົ້າໜ້າທີ່ ອິນໂດເນເຊຍ ໄດ້ກ່າວເຕືອນປະຊາຊົນ ແລະ ແຂກທ່ອງທ່ຽວຢູ່ບັນດາເຂດແຄມທະເລຢູ່ອ້ອມແອ້ມຊ່ອງແຄບທະເລ Sunda ໃຫ້ຫຼີກລ້ຽງເຂົ້າໃກ້ກັບບັນດາຫາດຊາຍທະເລ ແລະ ກ່າວເຕືອນເຖິງການຂຶ້ນນ້ຳທະເລແມ່ນຍັງສູງ ແລະ ຈະແກ່ຍາວຮອດວັນທີ 25 ທັນວາ.ກໍ່ກ່ຽວຂ້ອງເຖິງເຫດການດັ່ງກ່າວ, ວັນທີ 23 ທັນວາ, ທ່ານເລຂາທິການໃຫຍ່, ປະທານປະເທດ ຫວຽດນາມ ຫງວຽນຝູຈ້ອງ; ທ່ານນາຍົກລັດຖະມົນຕີ ຫງວຽນຊວນຟຸກໄດ້ສົ່ງໂທລະເລກຢື້ຢາມຖາມຂ່າວເຖິງທ່ານປະທານາທິບໍດີ ອິນໂດເນເຊຍ Joko Widodo. ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄດ້ສົ່ງໂທລະເລກຢື້ຢາມຖາມຂ່າວເຖິງທ່ານປະທານສະພາປຶກສາການເມືອງປະຊາຊົນ ອິນໂດເນເຊຍ Zulkifli Hasan.
ພາບປະກອບ
ການນຳ ຫວຽດນາມ ໄດ້ຝາກຄຳແບ່ງເບົາຄວາມເສົ້າສະຫຼົດໃຈຢ່າງເລິກເຊິ່ງເຖິງການນຳ ອິນໂດເນເຊຍ ຕໍ່ບັນດາຜົນເສຍຫາຍອັນໃຫຍ່ຫຼວງກ່ຽວກັບຊີວິດອິນຊີ ແລະ ຊັບສິນຍ້ອນໄພພິບັດທຳມະຊາດນີ້ກໍ່ຂຶ້ນ. ການນຳ ຫວຽດນາມ ໄດ້ສະແດງນ້ຳໃຈສາມັກຄີ, ພ້ອມແລ້ວແບ່ງປັນຄວາມຫຍຸ້ງຍາກຂອງປະຊາຊົນ ຫວຽດນາມ ກັບ ປະຊາຊົນ ອິນໂດເນເຊຍ ແລະ ເຊື່ອໝັ້ນວ່າ ປະຊາຊົນ ອິນໂດເນເຊຍ ຈະແກ້ໄຂຜົນຮ້າຍຢ້ອນຫຼັງ, ສ້າງຊີວິດການເປັນຢູ່ເປັນປົກກະຕິໂດຍໄວ.
ແລະກໍ່ໃນວັນທີ 23 ທັນວາ, ທ່ານຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ ຫວຽດນາມ ຟ້າມບີ່ງມິງ ໄດ້ສົ່ງໂທລະເລກຢື້ຢາມຖາມຂ່າວເຖິງທ່ານລັດຖະມົນຕີກະຊວງການຕ່າງປະເທດ ອິນໂດເນເຊຍ Retno Marsudi.
(ແຫຼ່ງຄັດຈາກ VOV)
