ໃນຂອບເຂດການປະຕິບັດງານຢູ່ ຈີນ, ວັນທີ 4 ພະຈິກ, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ໄດ້ຕອບສຳພາດສຳນັກຂ່າວສານຊິນຮວາ - ເຊິ່ງແມ່ນອົງການສື່ມວນຊົນແຖວໜ້າຂອງຈີນ.

        ເມື່ອຕີລາຄາກ່ຽວກັບການພົວພັນ ຫວຽດນາມ - ຈີນ ໃນປະຈຸບັນ, ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ: ໃນໄລຍະຜ່ານມາ, ດ້ວຍຄວາມມານະພະຍາຍາມຂອງພັກ, ລັດ ແລະ ປະຊາຊົນສອງປະເທດ, ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ ໄດ້ຮັກສາທ່າພັດທະນາຕັ້ງໜ້າ, ບັນລຸໄດ້ບັນດາຜົນງານທີ່ເປັນໜ້າຊົມເຊີຍ. ຜົນງານໃຫຍ່ຫຼວງທີ່ສຸດ, ພົ້ນເດັ່ນທີ່ສຸດນັ້ນແມ່ນສອງປະເທດໄດ້ປັບປຸງ, ພັດທະນາການພົວພັນດ້ານການເມືອງ, ການທູດ ແລະ ເສດຖະກິດ. ຈີນ ກາຍເປັນໜຶ່ງໃນບັນດາຄູ່ຮ່ວມມືການຄ້າແຖວໜ້າຂອງ ຫວຽດນາມ ດ້ວຍວົງເງິນການຄ້າສອງສົ້ນເພີ່ມຂຶ້ນຢ່າງແຮງ; ຄວາມຜິດດ່ຽງດຸ່ນ ການຄ້າພວມຄ່ອຍໆໄດ້ຮັບການປັບປຸງ. ສອງປະເທດໄດ້ຜັນຂະຫຍາຍການເຄື່ອນໄຫວພົວພັນແລກປ່ຽນປະຊາຊົນຢ່າງຟົດຟື້ນ, ພິເສດແມ່ນລະຫວ່າງລຸ້ນໜຸ່ມ ແລະ ປະຊາຊົນບັນດາທ້ອງຖິ່ນເຂດຊາຍແດນ… ດ້ວຍບັນດາເນື້ອໃນພົວພັນແລກປ່ຽນ, ຮ່ວມມືຫຼາຍດ້ານ, ຫຼາຍສົ້ນ, ປະກອບສ່ວນເພີ່ມທະວີນ້ຳໃຈມິດຕະພາບທີ່ເປັນມູນເຊື້ອລະຫວ່າງ 2 ປະເທດ. ບັນດາໝາກຜົນນີ້ໄດ້ປະກອບສ່ວນສຳຄັນເຂົ້າໃນການປັບປຸງພື້ນຖານໃຫ້ແກ່ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ ກ່ວາອີກ.

        ທ່ານນາຍົກລັດຖະມົນຕີ ຫງວຽນຊວນຟຸກ ຕີລາຄາສູງເລື່ອງ ຈີນ ຈັດຕັ້ງ CIIE 2018, ສະແດງໃຫ້ເຫັນຈິນຕະນາການຮ່ວມມືພ້ອມກັນໄຊຊະນະ, ພ້ອມກັນມີຜົນປະໂຫຍດ, ສ້າງຊ່ອງທາງສົ່ງເສີມການຄ້າໃຫມ່, ສຳຄັນ ແລະ ມີອິດທິພົນຊື່ສຽງ.

        ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ: ຫວຽດນາມ ເຂົ້າຮ່ວມງານຕະຫຼາດນັດດ້ວຍບົດບາດແມ່ນ “ປະເທດກິດຕິມະສັກ” ໃນການຈັດຕັ້ງຄັ້ງທຳອິດນີ້, ຫວຽດນາມ ໄດ້ມີກາລະໂອກາດສຳພັດ ແລະ ພົວພັນແລກປ່ຽນ, ເປີດກ້ວາງການຮ່ວມມືດຳເນີນທຸລະກິດກັບວິສາຫະກິດ, ນັກລົງທຶນຈີນ ແລະ ປະເທດອື່ນກ່ວາ 150.000 ແຫ່ງ.

(ແຫຼ່ງຄັດຈາກ VOV)