ຂ່າວສານ
ການຢ້ຽມຢາມສະຫະພັນສະວິດ, ສະຫະພັນລັດເຊຍ ຢ່າງເປັນທາງການຂອງປະທານປະເທດ ຫງວຽນຊວັນຟຸກ ສິ້ນສຸດລົງຢ່າງຈົບງາມ
ການຢ້ຽມຢາມສະຫະພັນສະວິດ, ສະຫະພັນລັດເຊຍ ຢ່າງເປັນທາງການຂອງທ່ານປະທານປະເທດ ຫວຽດນາມ ຫງວຽນຊວັນຟຸກ ໄດ້ສິ້ນສຸດລົງຢ່າງຈົບງາມ. ນັ້ນແມ່ນຄຳຢືນຢັນຂອງທ່ານຮອງລັດຖະມົນຕີການຕ່າງປະເທດ ຫວຽດນາມ ໂຕແອັງຢຸງ ເມື່ອຕອບສຳພາດຕໍ່ສື່ມວນຊົນກ່ຽວກັບການເດີນທາງໄປຢ້ຽມຢາມ 2 ປະເທດດັ່ງກ່າວ.
ກ່ຽວກັບການຢ້ຽມຢາມສະຫະພັນ ສະວິດ (ໃນລະຫວ່າງວັນທີ 25 -29 ພະຈິກ) ຂອງທ່ານປະທານປະເທດ ຫງວຽນຊວັນຟຸກ, ທ່ານຮອງລັດຖະມົນຕີ ໂຕແອັງຢຸງ ໃຫ້ຮູ້ວ່າ, 2 ຝ່າຍໄດ້ແລກປ່ຽນຢ່າງເລິກເຊິ່ງ, ກວ້າງຂວາງ, ແທດຈິງ ແລະ ບັນລຸໄດ້ຄວາມເຫັນດີເຫັນພ້ອມສູງກ່ຽວກັບບັນດາມາດຕະການເພີ່ມທະວີການພົວພັນ 2 ຝ່າຍ ແລະ ຫຼາຍຝ່າຍ; ພ້ອມທັງແບ່ງປັນວິໄສທັດກ່ຽວກັບບັນຫາຍຸດທະສາດພາກພື້ນ ແລະ ທົ່ວໂລກ, ໃນນັ້ນມີຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນເຮືອຢູ່ທະເລຕາເວັນອອກ ເໝາະສົມກັບກົດໝາຍສາກົນ. ສະວິດ ຢືນຢັນວ່າ ຫວຽດນາມ ແມ່ນຄູ່ຮ່ວມມືເສດຖະກິດບຸລິມະສິດ, ສວມບົດບາດສຳຄັນໃນລະບົບສະໜອງ, ຜະລິດຢູ່ພາກພື້ນ ແລະ ໃນໂລກ.
ກ່ຽວກັບໝາກຜົນການຢ້ຽມຢາມສະຫະພັນ ລັດເຊຍ (ໃນລະຫວ່າງວັນທີ 29 ພະຈິກ - 02 ທັນວາ) ຂອງທ່ານປະທານປະເທດ ຫງວຽນຊວັນຟຸກ, ທ່ານຮອງລັດຖະມົນຕີການຕ່າງປະເທດ ໂຕແອັງຢຸງ ຊີ້ແຈ້ງວ່າ, 2 ຝ່າຍໄດ້ເຫັນດີເປັນເອກະພາບຮັບຮອງເອົາຖະແຫຼງການຮ່ວມກ່ຽວກັບວິໄສທັດການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສະຫະພັນລັດເຊຍ ຮອດປີ 2030. ສິ່ງດັ່ງກ່າວມີຄວາມໝາຍຍຸດທະສາດສຳຄັນ, ຕອບສະໜອງຜົນປະໂຫຍດຍາວນານຂອງ 2 ປະເທດ, ເພື່ອສັນຕິພາບ, ສະຖຽນລະພາບ ແລະ ວັດທະນາຖາວອນລວມຢູ່ໃນໂລກ.
(ແຫຼ່ງຄັດຈາກ VOV)
