ທ່ານເລຂາທິການໃຫຍ່ ຫງວຽນຟູ໋ຈ້ອງ ຕ້ອນຮັບທ່ານປະທານາທິບໍດີ ສ. ເກົາຫຼີ Moon Jae – in
ຕອນເຊົ້າວັນທີ 23 ມີນາ, ທີ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ຕ້ອນຮັບທ່ານປະທານາທິບໍດີ ສ. ເກົາຫຼີ Moon Jae – in ພວມຢ້ຽມຢາມທາງລັດຖະກິດ ຫວຽດນາມ. ທີ່ການຕ້ອນຮັບ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຖືວ່າ ການຢ້ຽມຢາມ ຂອງທ່ານປະທານາທິບໍດີ Moon Jae – in ດຳເນີນໄປໃນຈຸດເວລາມີຄວາມໝາຍປະຫວັດສາດເມື່ອ 2 ປະເທດຫາກໍ່ສະເຫຼີມສະຫຼອງ 25 ປີແຫ່ງວັນສ້າງຕັ້ງການພົວພັນທາງການທູດ ແລະ ພວມຢູ່ໃນບັນດາບາດກ້າວທຳອິດຂອງໄລຍະທາງແຫ່ງການພົວພັນ 25 ປີຕໍ່ໜ້າ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຕີລາຄາສູງການການພັດທະນາຕັ້ງໜ້າ, ມີປະສິດທິຜົນຂອງການພົວພັນຮ່ວມມື ຫວຽດນາມ - ສ ເກົາຫຼີ ໃນຂົງເຂດຕ່າງໆໃນຊຸມປີຜ່ານມາ, ພິເສດແມ່ນການຮ່ວມມືດ້ານເສດຖະກິດ, ການຄ້າ ແລະ ການລົງທຶນ.
ສ່ວນທ່ານປະທານາທິບໍດີ ສ. ເກົາຫຼີ Moon Jae – in ໃຫ້ຮູ້ວ່າ: ສ. ເກົາຫຼີ ຈະມານະພະຍາຍາມກ່ວາອີກ ເພື່ອພ້ອມກັບ ຫວຽດນາມ ຮ່ວມແຮງຮ່ວມໃຈເພີ່ມພູນຄູນສ້າງໃຫ້ອະນາຄົດອັນສົດໃສຂອງການພົວພັນ ຫວຽດນາມ - ສ. ເກົາຫຼີ, ນຳມາເຊິ່ງຜົນປະໂຫຍດແທດຈິງໃຫ້ແກ່ປະຊາຊົນ 2 ປະເທດເພື່ອສັນຕິພາບ, ຄວາມໝັ້ນຄົງ, ສະຖຽນລະພາບ, ການພັດທະນາ ແລະ ຄວາມວັດທະນາຖາວອນຂອງພາກພື້ນ ແລະ ສາກົນ.
(ແຫຼ່ງຄັດຈາກ VOV)
