\ວັນທີ 26 ຕຸລາ, ທີ່ຫໍປະຊຸມສາກົນ, ທ່ານຮອງນາຍົກລັດຖະມົນຕີ ຫວຽດນາມ ຟ້າມບີ່ງມິງ ມີການເຈລະຈາກັບທ່ານນາງ Wan Azizah, ຮອງນາຍົກລັດຖະມົນຕີ ມາເລເຊຍ ເນື່ອງໃນໂອກາດມາຢ້ຽມຢາມ ຫວຽດນາມ ຢ່າງເປັນທາງການ ແລະ ເຂົ້າຮ່ວມກອງປະຊຸມລັດຖະມົນຕີຍິງ ອາຊຽນ ຄັ້ງທີ 3 ແຕ່ວັນທີ 24 – 26 ຕຸລາ 2018.

        ທີ່ການເຈລະຈາ, ສອງຝ່າຍໄດ້ເຫັນດີເປັນເອກະພາບເພີ່ມທະວີການແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນໃນທຸກຊ່ອງທາງພັກ, ລັດຖະບານ, ລັດ, ສະພາແຫ່ງຊາດ ແລະ ພົບປະແລກປ່ຽນປະຊາຊົນ; ສືບຕໍ່ຜັນຂະຫຍາຍບັນດາກົນໄກຮ່ວມມືສອງຝ່າຍຢ່າງມີປະສິດທິຜົນ; ແລະ ແລກປ່ຽນ, ເປັນເອກະພາບຫຼັກໝັ້ນໃນບັນດາບັນຫາພາກພື້ນ, ສາກົນທີ່ຕ່າງຝ່າຍຕ່າງມີຄວາມສົນໃຈ. ສອງຝ່າຍໃຫ້ຄຳໝັ້ນສັນຍາສືບຕໍ່ປັບປຸງການຮ່ວມມືເສດຖະກິດ, ຊຸກຍູ້ນຳວົງເງິນການຄ້າສອງສົ້ນໃຫ້ບັນລຸລະດັບ 15 ຕື້ USD ຫຼື ສູງກ່ວາໃນປີ 2020, ເນັ້ນໜັກວ່າຄວນເພີ່ມທະວີການໂອ້ລົມສົນທະນາລະຫວ່າງລັດຖະບານ ແລະ ວິສາຫະກິດສອງປະເທດກ່ວາອີກ.

        ເມື່ອແລກປ່ຽນກ່ຽວກັບບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ, ສອງຝ່າຍເຫັນດີເປັນເອກະພາບໂດຍຖືວ່າ ໃນສະພາບການຂອງພາກພື້ນໃນປະຈຸບັນ, ສອງຝ່າຍຄວນຮັກສາການປຶກສາຫາລືກ່ຽວກັບບັນດາບັນຫາກ່ຽວຂ້ອງເຖິງຄວາມໝັ້ນຄົງແລະ ຍຸດທະສາດຢູ່ພາກພື້ນ; ສົມທົບກັນສ້າງ ອາຊຽນ ສາມັກຄີ, ປະຕິບັດສຳເລັດວິໄສທັດອາຊຽນ 2025; ເພີ່ມທະວີບົດບາດໃຈກາງຂອງ ອາຊຽນ ໃນໂຄງປະກອບພາກພື້ນ ແລະ ເສີມຂະຫຍາຍບົດບາດຂອງ ອາຊຽນ ໃນການແກ້ໄຂບັນດາບັນຫາຍຸດທະສາດຢູ່ພາກພື້ນ.