ຫໍໂມງ ອະນຸສອນຂອງຊາວ ຫວຽດນາມ ອາໄສຢູ່ແຂວງ ນະຄອນພະນົມ

      ຫໍໂມງ ອະນຸສອນຂອງຊາວ ຫວຽດນາມ ອາໄສຢູ່ແຂວງ ນະຄອນພະນົມ ມີຄວາມສູງປະມານ 50 ແມັດ, ການທາສີເຫຼືອງ ແລະ ມີໂມງໜ່ວຍໜຶ່ງຕິດຕັ້ງຢູ່ເທິງຫໍ ໄດ້ເຮັດໃຫ້ຫໍໂມງ ພົ້ນເດັ່ນຂຶ້ນ ໃນເສັ້ນທາງໜຶ່ງທີ່ມີຄວາມຄຶກຄັກໜາແໜ້ນທີ່ສຸດໃນໃຈກາງແຂວງນະຄອນພະນົມ ທີ່ຕັ້ງຢູ່ໃກ້ແຄມຝັ່ງແມ່ນ້ຳຂອງ. ຫຼັງຄາຫໍໂມງ ໄດ້ອອກແບບຕາມສະຖາປັດຕະຍາກຳເກົ່າແກ່ຂອງຫວຽດນາມ. ຢູ່ທາງກາງຫໍໂມງມີແຖວໜັງສື “ຊາວ ຫວຽດນາມ ອະນຸສອນກ່ອນຍ້າຍກັບຫວຽດນາມ ປີ ພສ.2503”. ຫໍໂມງ ຍິ່ງສວຍງາມ ແລະ ເປັນໜ້າຈັບໃຈກັບແຂກທ່ອງທ່ຽວ ເມື່ອມີນ້ຳພຸຢູ່ທາງດ້ານໜ້າ, ຮອດຕອນຄ່ຳ, ແສງໄຟຈາກຫໍໂມງນີ້ ແຈ້ງສະຫວ່າງໄປທົ່ວບໍລິເວນ. ໃນວັນທ້າຍອາທິດ, ສະຖານທີ່ແຫ່ງນີ້ ໄດ້ກາຍເປັນບ່ອນຈັດຕະຫຼາດມືດ ໂດຍມີຄົນມາຊື້-ຂາຍຢ່າງຄັບຄາໜາແໜ້ນ. ຫໍໂມງ ອະນຸສອນຂອງຊາວຫວຽດນາມ ອາໄສ ຢູ່ ແຂວງ ນະຄອນພະນົມ ໄດ້ເລີ່ມລົງມືກໍ່ສ້າງໃນວັນທີ 1 ທັນວາ ປີ 1960 ແລະ ກໍ່ສ້າງສຳເລັດພາຍໃນ 3 ເດືອນ ດ້ວຍການປະກອບສ່ວນຂອງປະຊາຄົມຊາວຫວຽດນາມ ອາໄສຢູ່ແຂວງ ນະຄອນພະນົມ ໃນຄາວນັ້ນ. ແບ່ງປັນກ່ຽວກັບຄວາມໝາຍຂອງການກໍ່ສ້າງຫໍໂມງແຫ່ງນີ້, ທ່ານ ເຈິ່ນວັນເຊົ໊າ, ປະທານສະມາຄົມ  ໄທ - ຫວຽດ ຢູ່ແຂວງ ນະຄອນພະນົມ ໃຫ້ຮູ້ວ່າ: ວັນທີ 21 ມີນາ 1946, ຝລັ່ງກັບມາຢຶດຄອງພາກພື້ນ ອິນດູຈີນ ຄັ້ງທີ 2. ກອງທັບ ຝລັ່ງ ໄດ້ລະດົມທຸກແຫຼ່ງກຳລັງເພື່ອແນໃສ່ຢືດເອົາເມືອງ ທ່າແຂກ, ແຂວງ ຄຳມ່ວນ ຂອງ ລາວ - ເຊິ່ງເປັນເມືອງທີ່ຊາວຫວຽດນາມ ດຳລົງຊີວິດເປັນຈຳນວນຫຼາຍ. ປະຊາຊົນຢູ່ທີ່ນີ້ ຕ້ອງປະລະເຮືອນຊານ, ຂ້າມແມ່ນ້ຳຂອງໄປຍັງປະເທດ ໄທ ເພື່ອຫຼົບລີ້ສົງຄາມ. ໃນເດືອນສິງຫາ ປີ 1959, ສະພາກາແດງ ໄທ ແລະ ຫວຽດນາມ ໄດ້ເຫັນດີເປັນເອກະພາບນຳກັນກ່ຽວກັບການອະນຸຍາດໃຫ້ຊາວລີ້ໄພ, ຜູ້ທີ່ມີຄວາມປາດຖະໜາ ແລະ ສະໝັກໃຈ ໄດ້ຈົດທະບຽນກັບຄືນເມືອປະເທດ ຫວຽດນາມ. ທ່ານກ່າວວ່າ:

ທ່ານເອກອັກຄະລັດຖະທູດ ຫວຽດນາມ ປະຈຳ ໄທ ຖ່າຍຮູບ ກັບການນຳແຂວງນະຄອນພະນົມ

      ປີນີ້, ຫໍໂມງ ອະນຸສອນຊາວຫວຽດນາມ ອາໄສ ຢູ່ແຂວງນະຄອນພະນົມ ໄດ້ຄົບຮອບ 60 ປີ. ຫວ່າງມໍ່ໆມານີ້, ອຳນາດການປົກຄອງແຂວງ ນະຄອນພະນົມ ໄດ້ດຳເນີນການບູລະນະປະຕິສັງຂອນຫໍໂມງແຫ່ງນີ້ . ຢູ່ສະຖານທີ່ແຫ່ງນີ້ ໄດ້ດຳເນີນຫຼາຍເຫດການສຳຄັນຂອງແຂວງ ນະຄອນພະນົມ ກໍຄືຂອງປະຊາຄົມ ຊາວຫວຽດນາມ ອາໄສຢູ່ແຂວງ ນະຄອນພະນົມ ຄື ພິທີສະເຫຼີມສະຫຼອງຫໍໂມງ ຄົບຮອບ 60 ປີທີ່ຖືກຈັດຂຶ້ນໃນວັນທີ 22 ທັນວາ ຜ່ານມາ ໂດຍມີການເຂົ້າຮ່ວມຂອງຊາວຫວຽດນາມ ອາໄສຢູ່ ໄທກວ່າ 1.200 ຄົນ. 

 

      ອາດເວົ້າໄດ້ວ່າ ຫໍໂມງແຫ່ງນີ້ ບໍ່ພຽງແຕ່ແມ່ນຄວາມເອກອ້າງທະນົງໃຈຂອງ ຊາວຫວຽດນາມ ອາໄສ ຢູ່ ໄທ ເວົ້າລວມ ແລະ ຂອງແຂວງ ນະຄອນພະນົມ ເວົ້າສະເພາະ ຫາກຍັງເປັນສະຖານທີ່ໃກ້ຊິດກັບປະຊາຊົນຢູ່ທີ່ນີ້ອີກດ້ວຍ. 
      ປັດຈຸບັນນີ້, ຢູ່ແຂວງ ນະຄອນພະນົມ ມີເຂດປູຊະນີຍະສະຖານປະຫວັດສາດຫຼາຍແຫ່ງທີ່ກ່ຽວຂ້ອງເຖິງຊາວຫວຽດນາມ ເປັນຕົ້ນແມ່ນ ເຮືອນຢູ່ຂອງ ລຸງໂຮ່ ຢູ່ ບ້ານໄມ້, ໝູ່ບ້ານມິດຕະພາບ ຫວຽດ - ໄທ ແຂວງ ນະຄອນພະນົມ,… ແຕ່ ເມື່ອມີໂອກາດໄປຢ້ຽມຢາມແຂວງ ນະຄອນພະນົມ ທີ່ສວຍງາມ, ແຂກທ່ອງທ່ຽວສ່ວນຫຼາຍ ກໍບໍ່ພາດທີ່ຈະໄປຢ້ຽມຢາມຫໍໂມງ ເທື່ອໜຶ່ງ. ໄລຍະຜ່ານມາ, ຫໍໂມງ ຍັງຄົງຕັ້ງສະຫງ່າ ແລະ ຂະໜານຢູ່ແຄມຝັ່ງແມ່ນ້ຳຂອງທີ່ຄົດລ້ຽວ ແລະ ກາຍເປັນໜຶ່ງໃນບັນດາສັນອາລັກທີ່ດີງາມກ່ຽວກັບການພົວພັນແລກປ່ຽນວັດທະນະທຳ ລະຫວ່າງ ໄທ ແລະ ຫວຽດນາມ./.

(ແຫຼ່ງຄັດຈາກ VOV)