ທ່ານ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ຟ້າມບິ່ງມິງ ແລະ ທ່ານນາງ Retno Marsudi ລັດຖະມົນຕີການຕ່າງປະເທດ ອິນໂດເນເຊຍ (ພາບ: Thế giới&Việt Nam)
ທີ່ການພົບປະສອງຝ່າຍໄດ້ເຫັນດີຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງສອງປະເທດໃຫ້ນັບມື້ນັບພັດທະນາຢ່າງແທດຈິງ ແລະ ມີປະສິດທິຜົນ, ຕ່າງຝ່າຍຕ່າງມີຜົນປະໂຫຍດ. ສອງຝ່າຍໄດ້ແບ່ງປັນບົດຮຽນໃນການພັດທະນາເສດຖະກິດແບບຍືນຍົງ, ພິເສດແມ່ນ ບົດຮຽນໃນການພັດທະນາເສດຖະກິດທາງທະເລ, ການຮ່ວມມືຄຸ້ມຄອງ, ອະນຸລັກຮັກສາຊັບພະຍາກອນທາງທະເລ, ຖືວ່ານີ້ແມ່ນໜຶ່ງໃນບັນດາເສົາຄ້ຳສຳຄັນໃນການພົວພັນຄູ່ຮ່ວມມືຍຸດທະສາດ. ບົນຈິດໃຈນັ້ນ, ລັດຖະມົນຕີສອງທ່ານໄດ້ເຫັນດີສືບຕໍ່ຊຸກຍູ້ການເຈລະຈາກຳນົດແບ່ງ ເຂດເສດຖະກິດພິເສດທັບຊ້ອນລະຫວ່າງສອງປະເທດ, ສ້າງພື້ນຖານດ້ານກົດໝາຍເພື່ອຄຸ້ມຄອງ ເຂດທະເລທີ່ຂຶ້ນກັບອະທິປະໄຕຂອງແຕ່ລະປະເທດກໍ່ຄືຊຸກຍູ້ການຮ່ວມມືສາກົນຢ່າງມີປະສິດທິຜົນ, ພ້ອມທັງໃຫ້ຄຳໝັ້ນສັນຍາວ່າ ຈະຮ່ວມມືກັນຢ່າງແໜ້ນແຟ້ນ, ແບ່ງປັນຂໍ້ມູນຂ່າວສານກ່ຽວກັບ ຊາວປະມົງ, ເຮືອຫາປາ, ແກ້ໄຂບັນດາສິ່ງແຕກຕ່າງກັນບົນເນື້ອໃນຈິດໃຈມະນຸດສະທຳ, ການພົວພັນຄູ່ຮ່ວມມືຍຸດທະສາດກໍ່ຄືຄວາມສາມັກຄີ ອາຊຽນ. ສ່ວນບັນຫາ ທະເລຕາເວັນອອກ, ສອງຝ່າຍໄດ້ໃຫ້ ຄຳໝັ້ນສັນຍາວ່າຈະສືບຕໍ່ການຮ່ວມມື, ແບ່ງປັນຫຼັກໝັ້ນ, ທັດສະນະເຊິ່ງກັນ ແລະ ກັນ ແລະ ກັບບັນດາປະເທດ ອາຊຽນ ເພື່ອພ້ອມກັນຮັກສາຄວາມສາມັກຄີ ແລະ ສຽງເວົ້າລວມ. ຮັບປະກັນສັນຕິພາບ, ຄວາມໜັ້ນຄົງ, ສະຖຽນລະພາບ ຢູ່ທະເລຕາເວັນອອກ, ຊຸກຍູ້ການປະຕິບັດ ຖະແຫຼງການປີ 2002 ກ່ຽວກັບການປະພຶດຢູ່ ທະເລຕາເວັນອອກ (DOC) ແລະ ບັນລຸໄດ້ ກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ ຢ່າງແທດຈິງ, ມີປະສິດທິຜົນ ແລະ ຮອບດ້ານໂດຍໄວ.
(ແຫຼ່ງຄັດຈາກ VOV)
