ຕອນບ່າຍວັນທີ 25 ສິງຫາ, ຢູ່ທຳນຽບປະທານປະເທດ, ທ່ານປະທານປະເທດຫວຽດນາມ ຫງວຽນຊວັນຟຸກ ໄດ້ໃຫ້ການຕ້ອນຮັບທ່ານນາງຮອງປະທານາທິບໍດີ ອາເມລິກາ Kamala Harris ເຊິ່ງພວມຢ້ຽມຢາມ ຫວຽດນາມ. ທີ່ການຕ້ອນຮັບ, ທ່ານປະທານປະເທດ ຫວຽດນາມ ຫງວຽນຊວັນຟຸກ ຢັ້ງຢືນວ່າ ຫວຽດນາມ ຍາມໃດກໍຖື ອາເມລິກາ ແມ່ນໜຶ່ງໃນບັນດາຄູ່ຮ່ວມມືສຳຄັນແຖວໜ້າ ແລະ ປາດຖະໜາວ່າຈະພ້ອມກັບ ອາເມລິກາ ສືບຕໍ່ຊຸກຍູ້ສາຍພົວພັນ ຫວຽດນາມ - ອາເມລິກາ ໃຫ້ພັດທະນາຢ່າງແທດຈິງ, ມີປະສິດທິຜົນ, ເຂົ້າສູ່ລວງເລິກ ແລະ ມີສະຖຽນລະພາບຍາວນານ. ທ່ານປະທານປະເທດຫວຽດນາມ ຫງວຽນຊວັນຟຸກ ກໍໄດ້ເນັ້ນໜັກເຖິງຄວາມສຳຄັນຂອງການຮ່ວມມືທາງດ້ານເສດຖະກິດ - ການຄ້າສອງຝ່າຍ ແລະ ຕີລາຄາສູງຕໍ່ເລື່ອງສອງຝ່າຍສ້າງຂໍ້ຕົກລົງກ່ຽວກັບບັນຫານະໂຍບາຍອັດຕາແລກປ່ຽນເງິນຕາ ບົນຈິດໃຈສ້າງສັນ, ຊຸກຍູ້ ແລະ ມຸ່ງໄປເຖິງການຄ້າທີ່ກົມກ່ຽວ, ຕ່າງຝ່າຍຕ່າງມີຜົນປະໂຫຍດ.
ສ່ວນທ່ານນາງຮອງປະທານາທິບໍດີ ອາເມລິກາ Kamala Harris ຕີລາຄາສູງຕໍ່ຄວາມມານະພະຍາຍາມຄວບຄຸມໂລກລະບາດໂຄວິດ - 19 ຂອງ ຫວຽດນາມ ແລະ ຢັ້ງຢືນຄືນຄຳໝັ້ນສັນຍາຂອງ ອາເມລິກາ ທີ່ວ່າ ຈະສືບຕໍ່ຊ່ວຍເຫຼືອ ຫວຽດນາມ ຍູ້ໂລກລະບາດໃຫ້ຖອຍໄປ. ທ່ານນາງຮອງປະທານາທິບໍດີ ອາເມລິກາ Kamala Harris ກໍສະເໜີໃຫ້ສອງຝ່າຍຮ່ວມມືກັນຢ່າງແໜ້ນແຟ້ນ ເພື່ອໜູນຊ່ວຍບັນດາວິສາຫະກິດ, ໂດຍສະເພາະແມ່ນບັນດາກຸ່ມບໍລິສັດໃຫຍ່ຂອງ ອາເມລິກາ ແລະ ຫວຽດນາມ ຈະສືບຕໍ່ຮັກສາລະບົບສະໜອງການຜະລິດ, ບໍ່ໃຫ້ຖືກຂາດວັກຂາດຕອນຍ້ອນຜົນກະທົບຈາກໂລກລະບາດໂຄວິດ - 19.
ທ່ານນາງຮອງປະທານປະເທດ ຫວຽດນາມ ຫວໍທິແອັງຊວັນຕ້ອນຮັບ ທ່ານນາງຮອງປະທານາທິບໍດີ ອາເມລິກາ Kamala Harris (ພາບ:TTXVN)
ເມື່ອແລກປ່ຽນກ່ຽວກັບບັນດາມາດຕະການຊຸກຍູ້ສາຍພົວພັນສອງຝ່າຍໃນບາງຂົງເຂດສຳຄັນຄື ສາທາລະນະສຸກ, ການສຶກສາ, ການຟື້ນຟູພາຍຫຼັງໂລກລະບາດໂຄວິດ - 19, ທ່ານນາງຮອງປະທານປະເທດ ຫວຽດນາມ ຫວໍທິແອັງຊວັນ ຢັ້ງຢືນວ່າ ຫວຽດນາມ ຍາມໃດກໍມານະພະຍາມມຊຸກຍູ້ຄວາມສະເໝີພາບລະຫວ່າງຍິງ - ຊາຍ, ປົກປ້ອງເດັກ ແລະ ປະຕິບັດບັນດານະໂຍບາຍຊ່ວຍໜູນສັງຄົມໃຫ້ບັນດາເປົ້າໝາຍທີ່ມີຄວາມສ່ຽງສູງໃນສັງຄົມ. ເນື່ອງໃນໂອກາດນີ້, ທ່ານນາງຮອງປະທານປະເທດຫວຽດນາມ ຫວໍທິແອັງຊວັນ ກໍສະເໜີໃຫ້ລັດຖະບານ ອາເມລິກາ ສືບຕໍ່ສ້າງເງື່ອນໄຂສະດວກໃຫ້ປະຊາຄົມຊາວ ຫວຽດນາມ ອາໄສ ຢູ່ ອາເມລິກາ ເຮັດວຽກ, ດຳລົງຊີວິດ, ນັບມື້ນັບພັດທະນາ ແລະ ກາຍເປັນຂົວຕໍ່ຢ່າງມີປະສິດທິຜົນ ນຳສາຍພົວພັນລະຫວ່າງ ສອງປະເທດ ຫວຽດນາມ - ອາເມລິກາ ໃກ້ຊິດສະໜສະໜົມກວ່າອີກ.
(ແຫຼ່ງຄັດຈາກ VOV)