ຕອນຄ່ຳວັນທີ 28 ສິງຫາ, ກະຊວງສາທາລະນະສຸກ ຫວຽດນາມ ໃຫ້ຮູ້ວ່າ: ນັບແຕ່ເວລາ 18 ໂມງຂອງວັນທີ 27 ສິງຫາ ຫາ ເວລາ 18 ໂມງຂອງວັນທີ 28 ສິງຫາ, ຫວຽດນາມ ຢັ້ງຢືນມີຜູ້ຕິດເຊື້ອພະຍາດໂຄວິດ - 19ໃໝ່ຕື່ມອີກ 12.103 ຄົນ, ໃນນັ້ນມີ 12.097 ຄົນ ຕິດເຊື້ອພາຍໃນປະເທດ. ແລະ ກໍ່ໃນວັນທີ 28 ສິງຫາ, ຫວຽດນາມ ມີ12.375 ຄົນໄດ້ຮັບການປິ່ນປົວຫາຍດີ ແລະ ມີ352 ຄົນເສຍຊີວິດ.
ສ່ວນຢູ່ໃນໂລກ, ຕາມເວັບໄຊສະຖິຕິ worldometers.info ແລ້ວ, ໄລ່ຮອດເວລາ 8 ໂມງຂອງວັນທີ 28 ສິງຫາ (ຕາມເວລາ ຫວຽດນາມ), ທົ່ວໂລກຢັ້ງຢືນມີຜູ້ຕິດເຊື້ອພະຍາດໂຄວິດ - 19 ກ່ວາ 216,16 ລ້ານຄົນ, ໃນນັ້ນມີຜູ້ເສຍຊີວິດກ່ວາ 4,49 ລ້ານຄົນ. ໃນຮອບເວລາ 24 ຊົ່ວໂມງທີ່ຜ່ານມາ, ທົ່ວໂລກໄດ້ຢັ້ງຢືນມີຜູ້ຕິດເຊື້ອພະຍາດໂຄວິດ - 19 ໃໝ່ຕື່ມອີກ 709.300 ຄົນ ແລະ ມີຜູ້ເສຍຊີວິດຕື່ມອີກຫຼາຍກ່ວາ 9.880 ຄົນ. ໃນນັ້ນ, ອາເມລິກາມີຜູ້ຕິດເຊື້ອໃໝ່ຫຼາຍທີ່ສຸດ ແມ່ນຫຼາຍກ່ວາ 189.100 ຄົນ, ຖັດຈາກນັ້ນແມ່ນ ອິນເດຍ, ອັງກິດ, ອີຣານ, ບຣາຊິນ…
ກ່ຽວກັບບັນຫາແບ່ງປັນວັກຊິນໃນທົ່ວໂລກ, ກຸ່ມບັນດານັກວາງແຜນກຳນົດນະໂຍບາຍ ທີ່ມີໜ້າທີ່ຮັບມືກັບວິກິດການໂລກລະບາດໂຄວິດ - 19 ໄດ້ຮຽກຮ້ອງໃຫ້ບັນດາປະເທດທີ່ມີແຫຼ່ງ ວັກຊິນສຳຮອງໃຫຍ່ ຄວນແບ່ງປັນ “ວັກຊິນໃຫ້ມີປະສິດທິຜົນ” ໃນການຕໍ່ສູ້ຕ້ານໂລກລະບາດໂຄວິດ - 19 ກັບບັນດາໂຄງການແຈກຢາຍໄປຍັງບັນດາປະເທດທີ່ມີລາຍຮັບຕ່ຳກ່ວາ.
(ແຫຼ່ງຄັດຈາກ VOV)
