ຕອນເຊົ້າວັນທີ 28 ຕຸລາ, ທີ່ຮ່າໂນ້ຍ, ໂດຍສືບຕໍ່ລາຍການກອງປະຊຸມສະໄໝສາມັນເທື່ອທີ 2 ສະພາແຫ່ງຊາດ ຫວຽດນາມ ຊຸດທີ 16, ພາຍໃຕ້ການເປັນປະທານຂອງ ທ່ານ ເຈິ່ນແທງເໝີ້ນ, ປະທານສະພາແຫ່ງຊາດ ຫວຽດນາມ ແລະ ການບໍລິຫານຂອງ ທ່ານນາງ ຫງວຽນທິຮົ່ງ, ຮອງປະທານສະພາແຫ່ງຊາດ, ບັນດາສະມາຊິກສະພາແຫ່ງຊາດໄດ້ປຶກສາຫາລືຢູ່ຫໍປະຊຸມ ກ່ຽວກັບຮ່າງກົດໝາຍສະບັບປັບປຸງ, ເພີ່ມເຕີມມາດຕາຈຳນວນໜຶ່ງກົດໝາຍວ່າດ້ວຍຫຼັກຊັບ.
ບັນດາຄຳເຫັນໄດ້ເຫັນດີໂດຍພື້ນຖານກ່ຽວກັບຄວາມຈຳເປັນຕ້ອງປະກາດໃຊ້ກົດໝາຍ ເພື່ອແນໃສ່ພັດທະນາຕະຫຼາດທຶນ, ຫຼຸດຜ່ອນລະບຽບການບໍລິຫານ, ຊຸກຍູ້ນະວັດຕະກຳ ແລະ ການຫັນເປັນດີຈີຕອນ; ຮັບປະກັນຄວາມປອດໄພຂອງຕະຫຼາດ ແລະ ປົກປ້ອງສິດ, ຜົນປະໂຫຍດອັນຖືກຕາມກົດໝາຍຂອງນັກລົງທຶນ. ທ່ານ ເຈິ່ນແອັງຕ໋ວນ, ສະມາຊິກສະພາແຫ່ງຊາດ ນະຄອນ ໂຮ່ຈິມິນ, ປະກອບຄຳເຫັນວ່າ:
"ກົດໝາຍປັດຈຸບັນຮຽກຮ້ອງໃຫ້ທະນາຄານຜູ້ຮັກສາຊັບສິນຕ້ອງຕອບສະໜອງອັດຕາສ່ວນຄວາມປອດໄພດ້ານທຶນຂັ້ນຕ່ຳສຸດ, ດຳເນີນທຸລະກິດມີກຳໄລໃນປີໃກ້ສຸດ, ມີສະຖານທີ່ ແລະ ອຸປະກອນເພື່ອຮັບໃຊ້ການຮັກສາຊັບສິນ. ຮ່າງກົດໝາຍໃນ ປັດຈຸບັນໄດ້ຍົກເລີກສາມເງື່ອນໄຂທັງນີ້. ຂ້າພະເຈົ້າເຫັນດີກັບການຍົກເລີກເງື່ອນໄຂນີ້, ເພາະມັນແມ່ນການຫຼຸດຜ່ອນໃບອະນຸຍາດ ແລະ ຫັນລະບຽບການບໍລິຫານໃຫ້ງາຍດ່າຍ".
ບັນດາສະມາຊິກສະພາແຫ່ງຊາດຍັງສະເໜີເພີ່ມເຕີມມາດຕາຈຳນວນໜຶ່ງ, ຢືນຢັນວ່າ ລັດມີນະໂຍບາຍ ແລະ ມາດຕະການທີ່ເໝາະສົມເພື່ອປົກປ້ອງບັນດາສິດ, ຜົນປະໂຫຍດອັນຊອບທຳຂອງນັກລົງທຶນໃນຕະຫຼາດຫຼັກຊັບ.
