ຊຸດຝຶກອົບຮົມຖືກດຳເນີນໃນລະຫວ່າງວັນທີ 06 – 10/05, ຢູ່ນະຄອນຫຼວງວຽງຈັນ
ຊຸດຝຶກອົບຮົມຖືກດຳເນີນໃນລະຫວ່າງວັນທີ 06 – 10/05, ຢູ່ນະຄອນຫຼວງວຽງຈັນ, ລາວ ເຊິ່ງລວມມີສຳມະນາກອນ 110 ຄົນ ທີ່ມາຈາກບັນດາສໍານັກພິມຈຳໜ່າຍ, ໂຮງພິມຂອງລັດ ແລະ ເອກະຊົນ ໃນຂອບເຂດນະຄອນຫຼວງວຽງຈັນຄື: ສໍານັກພິມຈຳໜ່າຍພູມປັນຍາ, ສໍານັກພິມຈຳໜ່າຍການສຶກສາ, ສໍານັກພິມຈຳໜ່າຍວັນນະຄະດີ, ສໍານັກພິມຈຳໜ່າຍແສງສະຫວ່າງພູມປັນຍາ... ເຂົ້າຮ່ວມການສອນໃນຊຸດຝຶກອົບຮົມຄັ້ງນີ້ ແມ່ນບັນດາຄູສອນທີ່ມີອິດທິພົນຊື່ສຽງ ທີ່ມາຈາກສະມາຄົມການພິມນະຄອນໂຮ່ຈີມິນ, ບໍລິສັດຫຸ້ນສ່ວນການພິມ Scitech, ບໍລິສັດຫຸ້ນສ່ວນວັດທະນະທຳ ແລະ ຖະແຫຼງຂ່າວ ຍ໊ານາມ, ບໍລິສັດຫຸ້ນສ່ວນການສຶກສາດ້າຍເຈື່ອງຟາດ, ບໍລິສັດການພິມ ຕ໊ຽນໂບະ. ຕາງໜ້າຄະນະຈັດຕັ້ງຊຸດຝຶກອົບຮົມ, ທ່ານນາງ ມາຍທິເຮືອງ, ຫົວໜ້າຫ້ອງການຄຸ້ມຄອງການພິມ, ກົມພິມຈຳໜ່າຍ, ການພິມ ແລະ ຈຳໜ່າຍ ຫວຽດນາມ ໃຫ້ຮູ້ວ່າ:
“ບັນດາຄູສອນຄັ້ງນີ້ ລວມມີບັນດານັກຄຸ້ມຄອງ, ນັກຊ່ຽວຊານ ໃນຂົງເຂດພິມຈຳໜ່າຍ, ພິມ ແລະ ຈຳໜ່າຍ, ເຂົາເຈົ້າເປັນເຈົ້າຂອງວິສາຫະກິດໃຫຍ່, ບັນດາວິສາຫະກິດນັ້ນ ມີການເຄື່ອນໄຫວຢ່າງເຂັ້ມແຂງ ແລະ ມີຜົນສະທ້ອນຕໍ່ສັງຄົມ ຢູ່ຫວຽດນາມ. ມີນັກຊ່ຽວຊານຫຼາຍຄົນໄດ້ມານີ້ຫຼາຍເທື່ອດ້ວຍຖານະເປັນຄູສອນ ກໍຄືໃນຖານະເປັນເຈົ້າຂອງວິສາຫະກິດ ເພື່ອແບ່ງປັນປະສົບການຕົວຈິງ ແລະ ຮ່ວມມືກັນ”.ປັດຈຸບັນ, ຕາມທ່າອ່ຽງລວມຂອງທົ່ວໂລກແລ້ວ, ວຽງງານການພິມຈຳໜ່າຍ, ການພິມ ແລະ ຈຳໜ່າຍ ນັບມື້ນັບພັດທະນາຢ່າງເລິກເຊິ່ງກວ້າງຂວາງ. ບັນດາສໍານັກພິມຈຳໜ່າຍ, ບໍລິສັດຈຳໜ່າຍ ຕ້ອງມານະພະຍາຍາມຫຼາຍຢ່າງ ເພື່ອຜ່ານຜ່າທຸກສິ່ງທ້າທາຍ. ໃນຊຸດຝຶກອົບຮົມ, ບັນຫາລິຂະສິດ ແມ່ນບັນຫາໜຶ່ງທີ່ບັນດາສຳມະນາກອນລາວ ມີຄວາມສົນໃຈ ແລະ ຕັ້ງຄຳຖາມຫຼາຍທີ່ສຸດ, ຍ້ອນເຂົາເຈົ້າປະສົບກັບຄວາມຫຍຸ້ງຍາກກ່ຽວກັບບັນຫານີ້. ເພື່ອແບ່ງປັນຄວາມຫຍຸ້ງຍາກດັ່ງກ່າວ, ທ່ານ ຫງວຽນເຍິດແອັງ, ຜູ້ອຳນວຍການບໍລິສັດຫຸ້ນສ່ວນວັດທະນະທຳ ແລະ ຖະແຫຼງຂ່າວ ຍ໊ານາມ ໃຫ້ຮູ້ວ່າ:
“ກ່ອນນີ້ 15 ປີ, ກ່ອນທີ່ຈະດຳເນີນການຊື້ລິຂະສິດນັ້ນ, ພວກຂ້າພະເຈົ້າໄດ້ມີຄວາມເປັນຫ່ວງເປັນໃຍຫຼາຍຢ່າງ ບໍ່ຮູ້ວ່າ ເຮັດແນວໃດຈິ່ງຊື້ລິຂະສິດດ້ວຍລາຄາຖືກຈາກບັນດາໂຮງພິມຈຳໜ່າຍຂະໜາດໃຫຍ່ຂອງທະວີບເອີຣົບ, ທະວີບ ອາເມລິກາ ໄດ້. ຖ້າຫາກວ່າ ພວກເພື່ອນຢາກຊື້ລິຂະສິດຈາກບັນດາປະເທດນັ້ນ ພວກຂ້າພະເຈົ້າ ພ້ອມແລ້ວທີ່ຈະໃຫ້ການໜູນຊ່ວຍພວກເພື່ອນໃນຂອບເຂດການຮ່ວມມືລະຫວ່າງກົມພິມຈຳໜ່າຍລະຫວ່າງສອງປະເທດ, ກໍຄືບັນດາໂຄງການບຳລຸງສ້າງກ່ຽວກັບຂົງເຂດລິຂະສິດ ຫຼື ອາດຈະໜູນຊ່ວຍກ່ຽວກັບການໂຄສະນາ, ສ້າງບັນດາຮ້ານຂາຍປຶ້ມ ຫຼືບັນດາການເຄື່ອນໄຫວອື່ນໆ ພວກຂ້າພະເຈົ້າ ກໍພ້ອມແລ້ວທີ່ຈະໃຫ້ການຊ່ວຍເຫຼືອ”.
ທ່ານ ຫງວຽນເຍິດແອັງ, ຜູ້ອຳນວຍການບໍລິສັດຫຸ້ນສ່ວນວັດທະນະທຳ ແລະ ຖະແຫຼງຂ່າວ ຍ໊ານາມ
ໃນໄລຍະຈະມາເຖິງ, ກົມພິມຈຳໜ່າຍ, ການພິມ ແລະ ຈຳໜ່າຍ ຫວຽດນາມ ແລະ ກົມພິມຈຳໜ່າຍ ລາວ ຈະມີບັນດາລາຍການຮ່ວມມືອັນແທດຈິງກວ່າອີກໃນຂົງເຂດພິມຈຳໜ່າຍ, ການພິມ ແລະ ຈຳໜ່າຍ ຄື ແລກປ່ຽນກ່ຽວກັບວິຊາສະເພາະ, ຈັດຕັ້ງງານວາງສະແດງ, ພິມຈຳໜ່າຍປຶ້ມ ຫວຽດນາມ - ລາວ... ເພື່ອແນໃສ່ເພີ່ມທະວີຄວາມເຂົ້າໃຈ, ຍົກສູງວັດທະນະທຳການອ່ານປື້ມລະຫວ່າງປະຊາຊົນສອງປະເທດ ແລະ ຮັດແໜ້ນສາຍພົວພັນມິດຕະພາບແບບພິເສດ ລະຫວ່າງຫວຽດນາມ - ລາວ ໃຫ້ດີຍິ່ງໆຂຶ້ນ./.
(ແຫຼ່ງຄັດຈາກ VOV)
