ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ໄດ້ເຂົ້າຮ່ວມກອງປະຊຸມນັດສາມັດເດືອນເມສາ ຂອງລັດຖະບານ (ພາບ:VGP)

 ຕອນເຊົ້າວັນທີ 5 ພຶດສະພາ, ຢູ່ສໍານັກງານລັດຖະບານ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ໄດ້ເຂົ້າຮ່ວມກອງປະຊຸມນັດສາມັດເດືອນເມສາ ຂອງລັດຖະບານ ແລະ 4 ເດືອນຕົ້ນປີ 2020. ກ່ຽວກັບສະພາບການເສດຖະກິດສັງຄົມໃນເດືອນ ເມສາ ແລະ 4 ເດືອນຜ່ານມາ, ທ່ານນາຍົກລັດຖະມົນຕີ ໃຫ້ຮູ້ວ່າ ກອງທຶນເງິນຕາສາກົນ ໄດ້ຢັ້ງຢືນວ່າ, ປີນີ້, ເສດຖະກິດໂລກເຕີບໂຕດ້ວຍລະດັບລົບ 3%. ໃນສະພາບການດັ່ງກ່າວ, ຫວຽດນາມ ປະຕິບັດເປົ້າໝາຍຄວບຄູ່, ນັ້ນແມ່ນ ຮັກສາສຸຂະພາບຂອງປະຊາຊົນໃນໄລຍະສັ້ນ ແມ່ນໜ້າທີ່ແຖວໜ້າ ແລະ ພ້ອມທັງສືບຕໍ່ຕ້ອງຊຸກຍູ້ການພັດທະນາເສດຖະກິດ. ລັດຖະບານ ໄດ້ປະກາດໃຊ້ຄໍາສັ່ງ, ມະຕິສະບັບຕ່າງໆຢ່າງທັນການ ເພື່ອແກ້ໄຂຄວາມຫຍຸ້ງຍາກໃນການຜະລິດດໍາເນີນທຸລະກິດ, ເລື່ອນກໍານົດວັນເວລາການເສຍພາສີ... ເພາະສະນັ້ນ, ພື້ນຖານເສດຖະກິດ ຈຶ່ງບໍ່ຖືກຂາດວັກຂາດຕອນ ແລະ ຍັງຄົງບັນລຸລະດັບເຕີບໂຕ 3,82% ເມື່ອທຽບໃສ່ໄລຍະດຽວກັນ.

        ເນື້ອໃນຈິດໃຈຕ້ອງຟື້ນຟູ ແລະ ພັດທະນາບັນດາການເຄື່ອນໄຫວເສດຖະກິດສັງຄົມ ແມ່ນຄໍາຮຽກຮ້ອງອັນຮີບດ່ວນຂອງພື້ນຖານເສດຖະກິດ, ຂອງວົງຄະນະຍາດ ແລະ ຂອງປະຊາຊົນໃນທົ່ວປະເທດ, ທ່ານນາຍົກລັດຖະມົນຕີ ຖືວ່າ ຕ້ອງສຸມໃສ່ບຸລິມະສິດເລີ່ມເຄື່ອນໄຫວພື້ນຖານເສດຖະກິດຄືນໃໝ່, ຊຸກຍູ້ການພັດທະນາເພື່ອຮັກສາທ່ວງທ່າພັດທະນາທີ່ຈໍາເປັນຂອງປະເທດຊາດ.

“ພວກເຮົາສືບຕໍ່ປະຕິບັດແຜນນະໂຍບາຍເຊິ່ງພວກເຮົາໄດ້ຍົກອອກມາ ນັ້ນແມ່ນຕ້ອງບັນລຸໄດ້ເປົ້າໝາຍຄວບຄູ່, ທັງປ້ອງກັນ ຕ້ານໂລກລະບາດບັນລຸຜົນສຳເລັດ, ທັງພັດທະນາເສດຖະກິດສັງຄົມ. IMF ໃຫ້ຂໍ້ສັງເກດວ່າ, ຫວຽດນາມ ຈະບັນລຸການເຕີບໂຕສູງທີ່ສຸດຢູ່ເຂດອາຊີຕາເວັນອອກສ່ຽງໃຕ້ ໃນປີ 2020 ແລະ ບັນລຸປະມານ 2,7%. ພວກເຮົາຕ້ອງບັນລຸໃຫ້ໄດ້ລະດັບສູງກວ່ານີ້, ຍ້ອນທຸກຂັ້ນ, ທຸກຂະແໜງການ, ວິສາຫະກິດໄດ້ເລີ່ມເຄື່ອນໄຫວ ດ້ວຍຫຼາຍມາດຕະການຂຽວຂາດກວ່າ. ນັ້ນແມ່ນພື້ນຖານສຳຄັນເພື່ອບັນລຸການເຕີບໂຕ.”

        ທີ່ກອງປະຊຸມນີ້, ລັດຖະບານໄດ້ປຶກສາຫາລືກ່ຽວກັບສະພາບການເສດຖະກິດ - ສັງຄົມໃນເດືອນ ເມສາ ແລະ 4 ເດືອນຕົ້ນປີ 2020; ສະພາບການຕ້ານໂລກລະບາດໂຄວິດ-19; ກຳນົດການຈັດແບ່ງການແຜນລາຍຈ່າຍງົບປະມານຂອງລັດປີ 2021…

(ແຫຼ່ງຄັດຈາກ VOV)