ຕອນເຊົ້າວັນທີ 19 ພະຈິກ, ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ໄດ້ໄປຢ້ຽມຢາມ ແລະ ເຮັດວຽກກັບບັນດາກົມກອງທະຫານ ແລະ ອົງຄະນະພັກ, ອຳນາດການປົກຄອງແຂວງ ກ່າເມົາ ຢູ່ເກາະ ຮ່ອນຄວາຍ (ຂຶ້ນກັບຕາແສງ ເດີດມຸຍ, ແຂວງ ກ່າເມົາ).
ທີ່ການເຮັດວຽກ, ທ່ານເລຂາທິການໃຫຍ່ ໂຕເລິມ ຮຽກຮ້ອງໃຫ້ແຂວງ ກ່າເມົາ ສືບຕໍ່ຍູ້ແຮງການສ້າງແຜນຮ່າງພັດທະນາກຸ່ມເກາະ ຮ່ອນຄວາຍ ໃຫ້ມີຄວາມເຂັ້ມແຂງດ້ານເສດຖະກິດ, ມີຄວາມໝັ້ນຄົງດ້ານປ້ອງກັນຊາດ - ປ້ອງກັນຄວາມສະຫງົບ, ມີທິດທາງການລົງທຶນທີ່ຄົບຊຸດດ້ານພື້ນຖານໂຄງລ່າງພະລັງງານ, ຄົມມະນາຄົມ, ໂທລະຄົມ, ກິດຈະກຳທະຫານ, ບ່ອນຫຼີກລ້ຽງພາຍຸ… ໃຫ້ສົມບູນແບບ. ໃນການຜັນຂະຫຍາຍ, ຕ້ອງເອົາໃຈໃສ່ເປັນພິເສດເຖິງປະສິດທິຜົນດ້ານເສດຖະກິດ - ສັງຄົມ, ປົກປັກຮັກສາສິ່ງແວດລ້ອມປ່າ, ທະເລ, ໝູ່ເກາະ, ຮັບປະກັນການພັດທະນາແບບຍືນຍົງ; ສ້າງບັນດາສາຍເຊື່ອມຕໍ່ບັນດາເຂດເສດຖະກິດ, ອຸດສາຫະກຳ, ເຂດຕົວເມືອງ, ເຂດ logistics ທ່າກຳປັ່ນ ຕິດພັນກັບທ່າກຳປັ່ນ ຮ່ອນຄວາຍ ແລະ ທ່າອາກາດສະຍານ ກ່າເມົາ ໃຫ້ສົມບູນແບບເປັນເທື່ອລະກ້າວ.
ຕອນບ່າຍວັນດຽວກັນ, ທ່ານເລຂາທິການໃຫຍ່ ໂຕເລິມ ໄດ້ໄປຢ້ຽມຢາມ, ເຮັດວຽກຢູ່ເຂດພິເສດ ໂຖເຈົາ, ແຂວງ ອານຢາງ. ຢູ່ທີ່ນີ້, ທ່ານເລຂາທິການໃຫຍ່ ໂຕເລິມ ເນັ້ນໜັກວ່າ ຕ້ອງສ້າງ ໂຖເຈົາ ໃຫ້ມີເສດຖະກິດທີ່ໝັ້ນຄົງເຂັ້ມແຂງ, ມີຊີວະພາບແບບຍືນຍົງ, ສ້າງການປ້ອງກັນຊາດ - ປ້ອງກັນຄວາມສະຫງົບໃຫ້ໝັ້ນແກ່ນໜັກແໜ້ນ, ເພື່ອໃຫ້ແຫ່ງນີ້ກາຍເປັນເຂດພິເສດທີ່ມີເກາະສີຂຽວ - ເຂັ້ມແຂງ - ຍືນຍົງ; ທ່ານຢືນຢັນວ່າ ໂຖເຈົາ ບໍ່ພຽງແຕ່ນຳມາເຊິ່ງຜົນປະໂຫຍດດ້ານເສດຖະກິດເທົ່ານັ້ນ, ຫາກກ່ອນອື່ນໝົດແມ່ນຄຸນຄ່າຂອງຍຸດທະສາດດ້ານປ້ອງກັນຊາດສຳຄັນພິເສດ.
