ຂ່າວສານ
ຕອນເຊົ້າ 25/4: ຊາວ ຫວຽດນາມ ເກືອບ 199.000 ຄົນໄດ້ສັກວັນຊີນກັນໂຄວິດ 19 ແລະ ບໍ່ກວດພົບຜູ້ຕິດໂຄວິດ 19 ລາຍໃຫມ່
ກະຊວງສາທາລະນະສຸກ ຫວຽດນາມ ໃຫ້ຮູ້ວ່າ: ແຕ່ເວລາ 18 ໂມງຂອງວັນທີ 24 ເມສາ ຮອດ 6 ໂມງເຊົ້າວັນທີ 25 ເມສາ ຫວຽດນາມ ບໍ່ກວດພົບຜູ້ຕິດເຊື້ອໂຄວິດ 19 ລາຍໃຫມ່. ປະຈຸບັນ ຈຳນວນຜູ້ຕິດເຊື້ອສະສົມແມ່ນ 2.833 ຄົນ, ໃນນັ້ນ 1.570 ຄົນ ຕິດແປດພາຍໃນປະເທດ, 35 ຄົນເສຍຊີວິດ.
10 ແຂວງ, ນະຄອນ ຢູ່ຫວຽດນາມ ຄື: ຮ່ວາບີງ, ດຽນບຽນ, ບີ່ງເຢືອງ, ,ຮ່າຢາງ, ຮືງອຽນ, ບັກຢາງ, ຢາລາຍ, ບັກນີງ, ກວ໋າງນີງ ແລະ ນະຄອນ ໂຮ່ຈີມິນ ໃນເວລາ 71 ມື້ຜ່ານມາບໍ່ກວດພົບກໍລະນີໃດຕິດເຊື້ອໃນວົງຄະນາຍາດ. ຮ່າໂນ້ຍ ແມ່ນ 67 ມື້, ຫາຍຟ່ອງ 61 ມື້ ແລະ ຫາຍເຢືອງ ແມ່ນ 31 ມື້ ບໍ່ກວດພົບຜູ້ຕິດເຊື້ອໃນວົງຄະນາຍາດ.ແລະໄລ່ຮອດຕອນເຊົ້າວັນທີ 25 ເມສາ, ຫວຽດນາມ ມີເກືອບ 199.000 ຄົນໄດ້ສັກວັນຊີນ ກັນໂຄວິດ 19.
ທ່ານ ຫງວຽນແທ່ງລອງ ລັດຖະມົນຕີກະຊວງສາທາລະນະສຸກຫວຽດນາມ ໃຫ້ຮູ້ວ່າ: ຍ້ອນສະພາບການໂລກລະບາດໂຄວິດ 19 ໃນໂລກ ແລະ ພາກພື້ນ ພວມຜັນແປໄປຢ່າງສັບສົນ ເຮັດໃຫ້ຄວາມສ່ຽງແຜ່ລະບາດຈາກຕ່າງປະເທດ ເຂົ້າຫວຽດນາມ ແມ່ນສູງທີ່ສຸດ ສະນັ້ນ ກະຊວງສາທາລະນະສຸກ ພວມເປັນເຈົ້າການ ຊີ້ນຳຢ່າງຂ້ຽວຂາດໃຫ້ເຂດທາງທິດຕາເວັນຕົກພາກໃຕ້ ເພີ່ມທະວີການປ້ອງກັນ ສະກັດກັ້ນໂລກລະບາດ.
(ແຫຼ່ງຄັດຈາກ VOV)
