ພິທີສະເຫຼີມສະຫຼອງວັນໄຊຊະນະໃນສົງຄາມປົກປັກຮັກສາປະເທດຊາດທີ່ຍິ່ງໃຫຍ່ຢູ່ນະຄອນຫລວງມົດສະດູ, ລັດເຊຍ ວັນທີ 09/05/2019 (ພາບ: AFP/TTXVN)
ໃນຈົດໝາຍມີຕອນຂຽນວ່າ: “ໄຊຊະນະຂອງການຕໍ່ສູ້ຕ້ານລັດທິຟາດຊິດ ກ່ອນນີ້ 75 ປີ ແມ່ນຂີດໝາຍທີ່ຮຸ່ງເຮືອງເຫລືອງເຫລື້ອມໃນປະຫວັດສາດມວນມະນຸດ, ແມ່ນໜຶ່ງໃນໄຊຊະນະຍິ່ງໃຫຍ່ທີ່ສຸດຂອງສະຕະວັດທີ 20, ມີຂອບຂະໜາດ, ຄຸນຄ່າ ແລະ ຄວາມໝາຍຍຸກສະໄໝເລິກເຊິ່ງ. ໄຊຊະນະຂອງໂຊວຽດ ແລະ ສຳພັນທະມິດໄດ້ສ້າງກະແສການປະຕິວັດປົດປ່ອຍຊາດໃນທົ່ວບັນດາທະວີບ, ເຮັດໃຫ້ລະບົບຫົວເມືອງຂຶ້ນຂອງລັດທິຈັກກະພັດ ແລະ ລ່າເມືອງຂຶ້ນ ອາຊີ, ອາຟຣີກາ ແລະ ອາເມລິກາລາຕິນ ສັ່ນສະເທືອນ ແລະ ລົ້ມລະລາຍເທື່ອລະກ້າວ. ໂດຍໄດ້ຮັບການຕໍ່ກຳລັງແຮງຈາກໄຊຊະນະປະຫວັດສາດນີ້, ປະຊາຊົນ ຫວຽດນາມ ໄດ້ສາມັກຄີ ເປັນຈິດໜຶ່ງໃຈດຽວກັນ, ດຳເນີນການລຸກຮື້ຂຶ້ນຄັ້ງໃຫຍ່ ຍາດເອົາອຳນາດການປົກຄອງ, ສ້າງເປັນໄຊຊະນະທີ່ສະຫງ່າລາສີຂອງການປະຕິວັດເດືອນສິງຫາ 1945, ສະຖາປະນາປະເທດສາທາລະນະລັດປະຊາທິປະໄຕ ຫວຽດນາມ, ເປີດສັງກາດເອກະລາດແຫ່ງຊາດ ແລະ ສັງຄົມນິຍົມ. ປີ 2020 ແມ່ນຂີດໝາຍສຳຄັນ ເມື່ອ ຫວຽດນາມ ແລະ ລັດເຊຍ ສະເຫຼີມສະຫຼອງ 70 ປີແຫ່ງວັນສ້າງຕັ້ງການພົວພັນທາງການທູດ, ພ້ອມກັນນັ້ນ ກໍ່ເປັນປີທີ່ໄດ້ເຫັນປະຈັກຕາ ກ່ຽວກັບສິ່ງທ້າທາຍທີ່ບໍ່ເຄີຍມີມາກ່ອນ ສຳລັບບັນດາປະເທດໃນໂລກທັງໝົດ ເມື່ອປະເຊີນໜ້າກັບພະຍາດໂຄວິດ-19. ຂ້າພະເຈົ້າເຊື່ອໝັ້ນວ່າ ຫວຽດນາມ ແລະ ລັດເຊຍ ຈະພ້ອມກັບບັນດາປະເທດອື່ນ ເພີ່ມທະວີຄວາມສາມັກຄີ, ຊຸກຍູ້ການຮ່ວມມືສາກົນ, ຕັດສິນໃຈ ຍູ້ຖອຍ ແລະ ຄວບຄຸມໂລກລະບາດ, ຜ່ານຜ່າໄລຍະທີ່ຫຍຸ້ງຍາກນີ້ໂດຍໄວ”.
ແລະກໍ່ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫວຽດນາມ ຫງວຽນຊວັນຟຸກ ກໍ່ໄດ້ສົ່ງຈົດໝາຍສະແດງຄວາມຊົມເຊີຍເຖິງທ່ານນາຍົກລັດຖະມົນຕີ ລັດເຊຍ Mikhail Vladimirovich Mishustin, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຫວຽດນາມ ຟ້າມບີງມິງ ກໍ່ໄດ້ສົ່ງຈົດໝາຍສະແດງຄວາມຊົມເຊີຍເຖິງທ່ານລັດຖະມົນຕີກະຊວງການຕ່າງປະເທດ ລັດເຊຍ Sergei Viktorovich Lavrov ເຊັ່ນດຽວກັນ.
(ແຫຼ່ງຄັດຈາກ VOV)
