ໃນກາງເດືອນ ກັນຍາ 2022, ເມື່ອ ຮ່າໂນ້ຍ ກ້າວເຂົ້າສູ່ລະດູໃບໄມ້ຫຼົ່ນ ທີ່ເຢັນສະບາຍ, ພວກຂ້າພະເຈົ້າໄດ້ຕັດສິນໃຈໄປຄົ້ນຫາອາຫານການກິນຢູ່ ຮ່າໂນ້ຍ, ເຊິ່ງ ເຝີ, ກາເຟ, ເຂົ້າຈີ່ ແມ່ນເຍື່ອງອາຫານທີ່ຂາດບໍ່ໄດ້ຈາກລາຍການອາຫານຂອງ ຮ່າໂນ້ຍ.
ເຝີ ຖືວ່າ ແມ່ນ “ອາຫານປະຈຳຊາດ” ຂອງຊາວ ຫວຽດນາມ, ພິເສດແມ່ນຢູ່ ຮ່າໂນ້ຍ. ທົ່ວທຸກແຫ່ງຢູ່ນະຄອນຫຼວງ ຮ່າໂນ້ຍ, ຈາກຖະໜົນນ້ອຍ ຫາຖະໜົນໃຫຍ່, ທ່ານ ສາມາດເຫັນຊາວ ຮ່າໂນ້ຍ ເລືອກກິນອາຫານເຊົ້າ ຢູ່ບັນດາຮ້ານ ເຝີ ມູນເຊື້ອ ຕືລຸ່ນ ຫຼື ນັກທ່ອງທ່ຽວຕ່າງປະເທດ ມັກມາຮ້ານອາຫານ ທີ່ມີຊື່ສຽງ ເພື່ອຮັບປະທານອາຫານຢ່າງມ່ວນຊື່ນເຊັ່ນ: ເຝີ ຫຼີກວັກຊື, ເຝີ ບາດດ່ານ, ເຝີ ຖິ່ນ...
ບາງທີບໍ່ມີໃຜຮູ້ວ່າ ເຝີ ຮ່າໂນ້ຍ ມີແຕ່ເມື່ອໃດ, ແຕ່ແນ່ນອນ ທຸກຄົນໃຜກໍ່ຮູ້ວ່າ ເຝີແຊບຖ້ວຍໜຶ່ງ ແມ່ນຂຶ້ນກັບປະສົບການ ແລະ ຄວາມລັບທີ່ເປັນມູນເຊື້ອຂອງພໍ່ຄົວ, ໃນນັ້ນສິ່ງທີ່ສຳຄັນແມ່ນ ນໍ້າເຝີ. ນ້ຳ ທີ່ນຳໃຊ້ເພື່ອປຸງແຕ່ງ ເຝີ ແມ່ນມັກຕົ້ມຈາກກະດູກງົວ ພ້ອມດ້ວຍເຄື່ອງເທດຫຼາຍຊະນິດເຊັ່ນ: ແຄ່, ຕົ້ນອານິດ, ແກ່ນຜັກຫອມປ້ອມ... ຕົ້ມດ້ວຍໄຟອ່ອນໆ. ເຝີ ຖ້ວຍໜຶ່ງປະ ກອບດ້ວຍເສັ້ນ ເຝີ ໄດ້ຕັດເປັນເສັ້ນນ້ອຍ ແລ້ວປະກອບໄປດ້ວຍຊີ້ນງົວ ເຊັ່ນ: ເຄິ່ງສຸກເຄິ່ງດິບ, ສຸກ ຫຼື ຊີ້ນໄກ່ ສີກເປັນ ເສັ້ນໆ ແລ້ວໃສ່ນໍ້າເຝີ ທີ່ຮ້ອນໆ ຈະມີລົດຊາດໂດຍສະເພາະຂອງ ຮ່າໂນ້ຍ, ບໍ່ມີບ່ອນອື່ນຄື ຫຼື ສາມາດພົບເຫັນໄດ້ທ່ີອື່ນ.
ຫຼັງຈາກກິນ ເຝີ ທີ່ສົດໆ ຮ້ອນໆ, ເໝາະກັບອາກາດລະດູໃບໄມ້ຫຼົ່ນທີ່ເຢັນສະບາຍ, ພວກຂ້າພະເຈົ້າເລືອກໄປດື່ມກາເຟ. ວັດ ທະນະທຳ ແລະ ນິໄສການດື່ມ ກາເຟ ຢູ່ ຮ່າໂນ້ຍ ແມ່ນມັກໄປກັບໝູ່ເພື່ອນ. ສະນັ້ນ ເມື່ອແລ່ນຜ່ານຮ້ານ ກາເຟ ທີ່ມີຊື່ສຽງຢູ່ ຮ່າໂນ້ຍ ຈຳນວນໜຶ່ງເຊັ່ນ: ກາເຟ ຢາງ, ກາເຟ ເລີມ, ກາເຟ ເຖາະ, ກາເຟ ອຽນ, ກາເຟ ດິງ... ຈະພົບເຫັນຜູ້ຄົນນັ່ງຕາມກຸ່ມ, ທັງລົມກັນ ທັງຈິບ ກາເຟ ໄປນໍາ.
ພວກຂ້າພະເຈົ້າເລືອກຮ້ານ ກາເຟ ດິງ ທີ່ຕັ້ງຢູ່ຊັ້ນ 2 ຂອງເຮືອນ ຝຣັ່ງ ເກົ່າຫຼັງໜຶ່ງ. ບາງທີນອກຈາກຈອກ ກາເຟ ທີ່ມີລົດຊາດ ຫອມແຊບແລ້ວ, ສະຖາປັດຕະຍະກໍາ ຝຣັ່ງ ທີ່ເກົ່າແກ່ ຍັງເປັນເຫດຜົນທີ່ເຮັດໃຫ້ຮ້ານ ກາເຟ ດິງ ເຖິງວ່ານ້ອຍ, ແຕ່ກໍ່ຍັງເປັນຮ້ານທີ່ຫຼາຍຄົນຢາກຊອກຫາ.
ກາເຟ ຮ່າໂນ້ຍ ຈະບໍ່ເຂັ້ມຂຸ້ນ ແລະ ອຸດົມດ້ວຍຫຼາຍທາງເລືອກເຊັ່ນ: ກາເຟດຳຮ້ອນ, ກາເຟດຳເຢັນ, ກາເຟ ນົມຮ້ອນ, ກາເຟນົມເຢັນ... ພິເສດແມ່ນກາເຟໄຂ່ ໄດ້ຖືວ່າ ແມ່ນຈຸດພິເສດຂອງນະຄອນຫຼວງ ຮ່າໂນ້ຍ. ເປັນເຄື່ອງດື່ມທີ່ແຊບ ແລະ ແປກໃໝ່ ທີ່ໃຜໆ ກໍ່ຢາກລອງຄັ້ງໜຶ່ງ ຖ້າມີໂອກາດໄດ້ມາຕັ້ງໂຕະຢູ່ທີ່ນີ້. ເພາະມັນບໍ່ພຽງແຕ່ມີລົດຊາດ ຂອງໄຂ່ແດງເທົ່ານັ້ນ, ແຕ່ຍັງມີລົດຊາດ ທີ່ເຂັ້ມຂຸ້ນ ຂອງ ກາເຟ ແລະ ຮູບນອກທີ່ງາມອີກດ້ວຍ.
ນາງ ມາລານ, ນັກທ່ອງທ່ຽວຊາວ ອິນເດຍ ກ່າວວ່າ: “ເມື່ອມາຢ້ຽມຢາມ ຮ່າໂນ້ຍ, ຂ້າພະເຈົ້າໄດ້ພົບເຫັນວັດທະນະທຳ ກາເຟ ຂອງປະຊາຊົນຢູ່ທີ່ນີ້ ສຸດທີ່ພິເສດ. ປະຊາຊົນ ສາມາດນັ່ງດື່ມຢູ່ຂ້າງທາງ, ໃນຮ່ອມບ້ານທີ່ນ້ອຍໆ ຫຼື ໃນຮ້ານ ແລະ ເມື່ອໄປຮ້ານ ກາເຟ ດິງ ເພື່ອດື່ມ ກາເຟ ທີ່ມີລົດຊາດເຂັ້ມຂຸ້ນ ໃນບັນຍາກາດຂອງຄຸ້ມເມືອງເກົ່າ, ຂ້າພະເຈົ້າຮູ້ສຶກປະທັບໃຈແທ້ໆ”.
ຫຼັງຈາກສົນທະນາກັບກຸ່ມນັກທ່ອງທ່ຽວ ມາຈາກ ອິນເດຍ ແລ້ວກໍ່ເຖິງເວລາເກືອບທ່ຽງ, ດັ່ງນັ້ນພວກຂ້າພະເຈົ້າຕັດສິນໃຈເລືອກກິນເຂົ້າຈີ່ ເປັນອາຫານທ່ຽງ. ຜ່ານທາງ ອິນເຕີເນັດ, ຂ້າພະເຈົ້າໄດ້ເຫັນການທົບທວນຄືນທີ່ດີຈາກຜູ້ທີ່ເຄີຍໄປກິນຢູ່ຮ້ານ ເຂົ້າຈີ່ 25. ຈາກຄວາມຢາກຮູ້ຢາກເຫັນກ່ຽວກັບເຂົ້າຈີ່ຂອງຮ້ານ, ຂ້າ ພະເຈົ້າຈຶ່ງຕັດສິນໃຈທີ່ຈະມາລອງຊື້. ແທ້ຈິງແລ້ວ, ຂ້າພະເຈົ້າກໍ່ແປກໃຈຫຼາຍ ເມື່ອນັ່ງຢູ່ຮ້ານປະມານ 2 ຊົ່ວໂມງ, ຈະເຫັນລູກຄ້າສ່ວນໃຫຍ່ທີ່ມາຕໍ່ແຖວຊື້ ລ້ວນແຕ່ແມ່ນຄົນຕ່າງປະເທດ.
ທ່ານ ດົ່ງລິງເຟືອງ, ເຈົ້າຂອງຮ້ານເຂົ້າຈີ່ 25 ໃຫ້ຮູ້ວ່າ ຕາມປົກ ກະຕິແລ້ວ, ຢູ່ ຮ່າໂນ້ຍ, ຜູ້ຄົນມັກກິນເຂົ້າຈີ່ ທີ່ປະກອບດ້ວຍຂອງກິນມູນເຊື້ອຄື: ປາເຕ, ໄສ້ກອກ ແລະ ຊີ້ນ. ແຕ່ເຂົ້າຈີ່ 25 ແມ່ນແຕກຕ່າງ, ປະກອບດ້ວຍໃສ້ຫຼາຍຊະນິດທີ່ແຕກຕ່າງກັນ, ຕອບສະໜອງຄວາມ ຕ້ອງການກິນອາຫານທີ່ແຕກຕ່າງກັນ ຂອງ ຜູ້ຄົນຈໍານວນຫຼາຍ.
ຮ້ານ ເຂົ້າຈີ່ ຢູ່ຖະໜົນ ຮ່າງກາ. ພາບ: ແຄ໋ງລອງ/VNP
ຢູ່ ຮ່າໂນ້ຍ, ພຽງແຕ່ໃຊ້ເງິນ 25.000-35.000 ດົ່ງ ແມ່ນສາ ມາດ ຊື້ເຂົ້າຈີ່ ມີໃສ້ ທ່ີແຕກຕ່າງກັນ ດ້ວຍສ່ວນປະສົມທີ່ແຊບເຊັ່ນ: ເຂົ້າຈີ່ປະສົມ, ເຂົ້າຈີ່ ປາເຕ, ໄຂ່, ໄກ່... ມີທັງເຂົ້າຈີ່ ເພື່ອຮັບໃຊ້ໃຫ້ແກ່ຜູ້ກິນເຈ ອີກດ້ວຍ. ນອກຈາກນັ້ນ, ນັກທ່ອງທ່ຽວສາມາດນັ່ງກິນເຂົ້າຈີ່ ແລະ ຊົມວິຖີຊີວິດ ແລະ ຖະໜົນຫົນທາງໃນຄຸ້ມຖະໜົນເກົ່າ ຮ່າໂນ້ຍ.
ໃນຕອນທ້າຍຂອງລາຍການທ່ອງທ່ຽວຊີມອາຫານ ຮ່າໂນ້ຍ, ເຖິງວ່າ ກິນ ແຕ່ເຝີິ, ກາເຟ ແລະ ເຂົ້າຈີ່ ກໍ່ຕາມ, ແຕ່ພວກຂ້າພະ ເຈົ້າ ໄດ້ເຂົ້າໃຈສ່ວນໃດສ່ວນໜຶ່ງ ຄຸນຄ່າວັດທະນະທຳ ການປຸງແຕ່ງ ອາຫານຂອງຊາວ ຮ່າໂນ້ຍ ໂດຍສະເພາະ ແລະ ຫວຽດ ນາມ ເວົ້າລວມ, ໄດ້ສ້າງຄວາມປະທັບໃຈດ້ວຍວິທີປຸງແຕ່ງທີ່ທັນສະໄໝ, ການຈັດວາງຢ່າງງາມຕາ ແລະ ມີລົດຊາດທີ່ເປັນເອກະ ລັກສະເພາະຄືແນວໃດ ໃນສາຍຕາຂອງເພື່ອນມິດສາກົນເມື່ອມາທ່ຽວຢູ່ທີ່ນີ້.
ບົດ: VNP/ເງິນຮ່າ - ພາບ: ແຄ໋ງລອງ - ແປໂດຍ: ຢືຟຽນ
