ໂດຍສືບຕໍ່ການຢ້ຽມຢາມທາງລັດຖະກິດ ອິນເດຍ, ຕອນຄ່ຳວັນທີ 06 ພຶດສະພາ, ຢູ່ນະຄອນຫຼວງ New Delhi, ປະເທດ ອິນເດຍ, ທ່ານ ໂຕເລິມ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ໄດ້ເຂົ້າຮ່ວມ ແລະ ກ່າວຄຳເຫັນທີ່ເວທີປາໄສນະວັດຕະກຳ ຫວຽດນາມ - ອິນເດຍ ດ້ວຍຫົວຂໍ້ “ການຮ່ວມມືພັດທະນາແຫຼ່ງຊັບພະຍາກອນມະນຸດ, ວິທະຍາສາດ, ເຕັກໂນໂລຊີ, ນະວັດຕະກຳ ແລະ ການຫັນເປັນດີຈີຕອນ”.
ກ່າວຄຳເຫັນທີ່ເວທີປາໄສ, ທ່ານເລຂາທິການໃຫຍ່, ປະທານປະເທດ ໂຕເລິມ ສະເໜີໃຫ້ ເວທີປາໄສສຸມໃສ່ແລກປ່ຽນ ແລະ ຊຸກຍູ້ການກຳນົດທິດຈຸດສຸມ 5 ປະການ, ໃນນັ້ນກຳນົດແຈ້ງບັນດາຂົງເຂດໃຫ້ບຸລິມະສິດຮ່ວມມື, ສຸມໃສ່ບັນດາຂົງເຂດເຕັກໂນໂລຊີຍຸດທະສາດກຳນົດທິດໃນສະຕະວັດທີ 21, ລວມມີປັນຍາປະດິດ, ເຕັກໂນໂລຊີ, ພະລັງງານສະອາດ…
“ສ້າງບັນດາຂົງເຂດຮ່ວມມືໃໝ່ດ້ານວິທະຍາສາດ, ເຕັກໂນໂລຊີ, ຜ່ານບັນດາໂຄງການມີຂອບຂະໜາດໃຫຍ່ ແລະ ກົນໄກຮ່ວມມືໃນໄລຍະຍາວ, ໃນນັ້ນ, ຊຸກຍູ້ການສ້າງຄູ່ຮ່ວມມືດີຈີຕອນ ຫວຽດນາມ - ອິນເດຍ. ຍູ້ແຮງຮູບແບບ “ພ້ອມກັນຄົ້ນຄວ້າ, ພ້ອມກັນພັດທະນາ, ພ້ອມກັນຜະລິດ”, ມຸ່ງໄປເຖິງການຜະລິດອອກບັນດາຜະລິດຕະພັນເຕັກໂນໂລຊີຖືເຄື່ອງໝາຍການຄ້າລວມ, ມີຄວາມສາມາດເຂົ້າຮ່ວມລະບົບມູນຄ່າທົ່ວໂລກຢ່າງເລິກເຊິ່ງ”.
ໃນຂອບເຂດການຢ້ຽມຢາມນີ້, ຕອນບ່າຍວັນດຽວກັນ, ທ່ານເລຂາທິການໃຫຍ່, ປະທານປະເທດ ໂຕເລິມ ກໍ່ໄດ້ໃຫ້ການຕ້ອນຮັບທ່ານນາງ Kusum Jain, ປະທານສະພາຄົມມິດຕະພາບ ອິນເດຍ - ຫວຽດນາມ.
