ຕອນບ່າຍວັນທີ 21 ມິຖຸນາ, ຢູ່ສຳນັກງານລັດຖະບານ, ທີ່ ຮ່າໂນ້ຍ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ຕ້ອບຮັບຄະນະຜູ້ແທນມາດຕາ IV, ກອງທຶນເງິນຕາສາກົນ (IMF), ໂດຍທ່ານ Paulo Medas ເປັນຫົວໜ້າຄະນະ.
ເມື່ອແຈ້ງຂໍ້ມູນກັບຄະນະ, ທ່ານນາຍົກລັດຖະມົນຕີ ຟ້າມມິງຈິງ ໃຫ້ຮູ້ວ່າ, ເພື່ອຮັກສາທ່າເຕີບໂຕສູງ ແລະ ຍືນຍົງນັ້ນ, ລັດຖະບານ ຫວຽດນາມ ມີແຜນນະໂຍບາຍເຮັດໃໝ່ບັນດາກຳລັງໜູນການເຕີບໂຕທີ່ເປັນມູນເຊື້ອ (ການລົງທຶນ, ສົ່ງອອກ, ໃຊ້ສອຍ) ພ້ອມທັງຊຸກຍູ້ບັນດາກຳລັງໜູນການເຕີບໂຕໃໝ່ (ເສດຖະກິດດີຈີຕອນ, ເສດຖະກິດໝູນວຽນ, ເສດຖະກິດພູມປັນຍາ…). ຫວຽດນາມ ກໍ່ພວມຊຸກຍູ້ການລົງທຶນພາກລັດຢ່າງແຮງ, ໂດຍສະເພາະແມ່ນການພັດທະນາພື້ນຖານໂຄງລ່າງຄົມມະນາຄົມ; ຈະຈຳໜ່າຍພັນທະບັດລັດຖະບານ, ວິສາຫະກິດ, ກິດຈະກຳ; ປະຕິບັດບັນດາມາດຕະການຫຼຸດຜ່ອນພາສີ, ຄ່າທຳນຽມ ແລະ ບັນດານະໂຍບາຍອື່ນເພື່ອໜູນຊ່ວຍວິສາຫະກິດພັດທະນາ, ສ້າງຄວາມໄວ້ເນື້ອເຊື່ອໃຈ.
ສ່ວນທ່ານ Paulo Medas ສະເໜີແນະໃຫ້ ຫວຽດນາມ ຕ້ອງສືບຕໍ່ສ້າງລະບອບລະບຽບການໃຫ້ສົມບູນແບບ, ສ້າງສະພາບແວດລ້ອມການດຳເນີນທຸລະກິດໂປ່ງໃສ; ເພີ່ມທະວີການຄຸ້ມຄອງ, ປ້ອງກັນຕ້ານການສໍ້ລາດບັງຫຼວງ; ສ້າງຄວາມສະດວກເພື່ອດຶງດູດການລົງທຶນ, ໂດຍສະເພາະແມ່ນໃນບັນດາຂົງເຂດພັດທະນາພື້ນຖານໂຄງລ່າງ, ພະລັງງານທົດແທນ… ທ່ານຢືນຢັນວ່າ, IMF ພ້ອມແລ້ວທີ່ຈະໜູນຊ່ວຍ ຫວຽດນາມ ຄືດັ່ງການສະເໜີຂອງທ່ານນາຍົກລັດຖະມົນຕີ ຟ້າມມິງຈິງ.
