ກອງປະຊຸມຄັ້ງນີ້ ບັນລຸໄດ້ຄວາມເຫັນດີເປັນເອກະພາບຢ່າງສູງຕໍ່ບັນດາເນື້ອໃນພື້ນຖານ ແລະ ພິເສດແມ່ນໃນນັ້ນ ໄດ້ຮັບຮອງເອົາການແນະນຳ, ເພີ່ມເຕີມ, ສະເໜີບຸກຄະລາກອນ “ພິເສດ” ເຂົ້າຮ່ວມຄະນະບໍລິຫານງານສູນກາງພັກຊຸດທີ 13 ແລະ ບັນຊີລາຍຊື່ຜູ້ສະໝັກເລືອກຕັ້ງເຂົ້າບັນດາຕຳແໜ່ງນຳພາຫຼັກແຫຼ່ງຂອງພັກ ແລະ ລັດ ໃນອາຍຸການ ຊຸດທີ 13.
        ທີ່ກອງປະຊຸມຄັ້ງນີ້, ຄະນະບໍລິຫານງານສູນກາງພັກກອມມູນິດຫວຽດນາມ ກໍປຶກສາຫາລື ແລະ ເຫັນດີເປັນເອກະພາບຢ່າງສູງຕໍ່ໃບສະເໜີຂອງກົມການເມືອງ ກ່ຽວກັບຮ່າງບັນຊີລາຍຊື່ຄະນະປະທານ, ຄະນະເລຂາ ແລະ ຄະນະກວດກາຄຸນລັກສະນະ ຜູ້ແທນ ຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກ. ສູນກາງກໍໄດ້ຮັບຮອງເອົາບົດລາຍງານຂອງຄະນະບໍລິຫານງານສູນກາງພັກຊຸດທີ 12 ກ່ຽວກັບເອກະສານທີ່ຈະຍື່ນສະເໜີຕໍ່ກອງປະຊຸມໃຫຍ່ຊຸດທີ 13, ກ່ຽວກັບວຽງານບຸກຄະລາກອນ ຄະນະບໍລິຫານງານສູນກາງພັກຊຸດທີ 13; ປະກອບຄຳເຫັນໃສ່ບົດລາຍງານສະຫຼຸບວຽກງານການເງິນຂອງພັກ ໃນອາຍຸການ 2016 – 2020. ທ່ານເລຂາທິການໃຫຍ່, ປະທານປະເທດ ຫງວຽນຝູຈ້ອງ ຢັ້ງຢືນວ່າ ກອງປະຊຸມຄັ້ງທີ 15 ຂອງຄະນະບໍລິຫານງານສູນກາງພັກ ກໍແມ່ນກອງປະຊຸມສຸດທ້າຍຂອງອາຍຸການຊຸດທີ 12 ໄດ້ປະສົບຜົນສຳເລັດຢ່າງຈົບງານ; ວຽກງານກະກຽມໃຫ້ແກ່ກອງປະຊຸມໃຫຍ່ຄັ້ງທີ 13 ຂອງ ພັກ ກໍປະຕິບັດສຳເລັດໂດຍພື້ນຖານ, ຖືກຕ້ອງຕາມຈຸດປະສົງ, ຄຳຮຽກຮ້ອງ ແລະ ແຜນການທີ່ໄດ້ວາງອອກ ໂດຍໄດ້ປະຕິບັດຢ່າງຮັດກຸ່ມ, ມີປະຊາທິປະໄຕ, ທ່ຽງທຳ, ພາວະວິໄສ, ມີແບບມີແຜນ ແລະ ມີຄວາມເປັນເອກະພາບຢ່າງສູງ.