14/12/2021 10:06 GMT+7 Email Print Like 0

ຫວຽດ​ນາມ ຮຽກ​ຮ້ອງ​ໃຫ້​ບັນ​ດາ​ປະ​ເທດ G7 ໜູນ​ຊ່ວຍ ອາ​ຊຽນ ໄດ້​ເຂົ້າ​ເຖິງ ແລະ ແຈກ​ຢາຍ​ວັກ​ຊິນ​ຢ່າງ​ປອ​ດ​ໄພ

ຕອນບ່າຍວັນທີ 12 ທັນວາ, ຢູ່ຮ່າໂນ້ຍ, ທ່ານລັດຖະມົນຕີການຕ່າງປະເທດ ບຸຍແທັງເຊີນ ໄດ້ເຂົ້າຮ່ວມກອງປະຊຸມລັດຖະມົນຕີການຕ່າງປະເທດ ອາຊຽນ - G7 ແບບທາງໄກ. ນີ້ແມ່ນກອງປະຊຸມຄັ້ງທຳອິດ ລະຫວ່າງ ລັດຖະມົນຕີການຕ່າງປະເທດ ອາຊຽນ ແລະລັດຖະມົນຕີການຕ່າງປະເທດ ແລະ ພັດທະນາ G7.
ທ່ານບຸຍແທັງເຊີນ ລັດຖະມົນຕີການຕ່າງປະເທດ ຫວຽດນາມ (ພາບ: TTXVN)

ກ່າວຄຳເຫັນທີ່ກອງປະຊຸມ, ທ່ານບຸຍແທັງເຊີນ ລັດຖະມົນຕີການຕ່າງປະເທດ ຫວຽດນາມ ໄດ້ຮຽກຮ້ອງໃຫ້ບັນດາປະເທດ G7 ໜູນຊ່ວຍ ອາຊຽນ ໄດ້ເຂົ້າເຖິງ ແລະ ແຈກຢາຍວັກຊິນຢ່າງປອດໄພ, ມີປະສິດທິຜົນຢ່າງທັນການ ແລະ ສະໝ່ຳສະເໝີກໍ່ຄືຖ່າຍທອດເຕັກໂນໂລຢີວັກຊິນ, ຊ່ວຍຍົກສູງຄວາມສາມາດໃນການສ້າງຄວາມເຂັ້ມແຂງດ້ວຍຕົນເອງ, ເປັນເຈົ້າຕົນເອງ ຂອງ ອາຊຽນ ແລະ ພາກພື້ນ. ໄປຄຽງຄູ່ກັນນັ້ນ, ບັນດາປະເທດຕ້ອງຮັກສາການເປີດຕະຫຼາດ, ຕ້ອງລົງທຶນຫຼາຍກ່ວາອີກເຂົ້າໃນພື້ນຖານໂຄງລ່າງ ແບບຍືນຍົງ, ຊຸກຍູ້ການຫັນເປັນດີຈີຕອນ, ການເຕີບໂຕຂຽວ ແລະ ສະອາດກ່ວາອີກ.

ເມື່ອເນັ້ນໜັກເຖິງການພົວພັນຄູ່ຮ່ວມມື ອາຊຽນ - G7 ໃນການຜັນຂະຫຍາຍບັນດາຄຳໝັ້ນສັນຍາຢູ່ ກອງປະຊຸມ COP26 ຢູ່ Glasgow, ທ່ານລັດຖະມົນຕີ ບຸຍແທັງເຊີນ ໄດ້ສະເໜີ G7 ຕ້ອງນຳໜ້າໃນການຫຼຸດຜ່ອນການປ່ອຍອາຍພິດ, ເພີ່ມທະວີການຮ່ວມມືກັບ ຫວຽດນາມ ແລະ ບັນດາປະເທດ ອາຊຽນ ເພື່ອແນໃສ່ປະຕິບັດຄຳໝັ້ນສັນຍາ ຫຼຸດຜ່ອນການປ່ອຍອາຍພິດລົງ 0 ຜ່ານການລົງທຶນການເງິນຂຽວ, ເຕັກໂນໂລຢີສະອາດ, ພ້ອມທັງໜູນຊ່ວຍຮັດແຄບຊ່ອງຫວ່າງ ໃນການພັດທະນາຢູ່ ອາຊຽນ.

ທ່ານລັດຖະມົນຕີກໍ່ສະເໜີໃຫ້ G7 ສະໜັບສະໜູນບັນດາຄວາມມານະພະຍາຍາມຂອງ ອາຊຽນ ເພື່ອແນໃສ່ຮັບປະກັນທະເລຕາເວັນອອກ ແມ່ນ ເຂດທະເລແຫ່ງສັນຕິພາບ, ສະຖຽນລະພາບ, ມີການຮ່ວມມື ແລະ ພັດທະນາ, ພ້ອມທັງຜັນຂະຫຍາຍຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ແລະ ຄວາມມານະພະຍາຍາມບັນລຸໄດ້ກົດແຫ່ງການປະພຶດຢູ່ທະເລຕາເວັນອອກ (COC) ຢ່າງມີປະສິດທິຜົນ, ມີຜົນສັກສິດ, ສອດຄ່ອງກັບກົດໝາຍສາກົນ ໃນນັ້ນມີ UNCLOS 1982.

(ແຫຼ່ງຄັດຈາກ VOV)