11/06/2020 09:18 GMT+7 Email Print Like 0

ສື່ມວນຊົນ ແລະ ວົງການວິສາຫະກິດສາກົນຕີລາຄາສູງກາລະໂອກາດຈາກ EVFTA

      ເມື່ອສັນຍາການຄ້າເລີ່ມມີຜົນສັກສິດໃນຕົ້ນເດືອນ ສິງຫາ ຈະມາເຖິງນັ້ນ, EVFTA ຈະຊ່ວຍເພີ່ມ 44% ວົງເງິນສົ່ງອອກຂອງຫວຽດນາມ ໄປຍັງຕະຫຼາດອີຢູ ໃນປີ 2030.
      ສັນຍາການຄ້າເສລີລະຫວ່າງສະຫະພາບເອີລົບ (ອີຢູ) ແລະ ຫວຽດນາມ (EVFTA) ບໍ່ພຽງແຕ່ຊ່ວຍໃຫ້ຫວຽດນາມ ຊຸກຍູ້ການຜະລິດ ແລະ ການສົ່ງອອກເທົ່ານັ້ນ, ຫາກຍັງແມ່ນກາລະໂອກາດເພື່ອໃຫ້ບັນດາວິສາຫະກິດເອີລົບ ເພີ່ມທະວີການປະກົດຕົວຢູ່ປະເທດອາຊີ ທີ່ຫາກໍ່ພົ້ນເດັ່ນຂຶ້ນນີ້ອີກດ້ວຍ. ນີ້ແມ່ນຂໍ້ສັງເກດຈາກບັນດາສຳນັກຂ່າວສານ ແລະ ການນຳສະຫະສະມາຄົມວິສາຫະກິດເຢຍລະມັນ ຍົກອອກມາ ພາຍຫຼັງທີ່ສະພາແຫ່ງຊາດຫວຽດນາມ ໃຫ້ສັດຕະຍາບັນຂໍ້ຕົກລົງດ້ານການຄ້າໃນວັນທີ 08 ມິຖຸນາ.
        ສຳນັກຂ່າວສານເຢຍລະມັນ DPA ໃຫ້ຮູ້ວ່າ, ເມື່ອສັນຍາການຄ້າເລີ່ມມີຜົນສັກສິດໃນຕົ້ນເດືອນ ສິງຫາ ຈະມາເຖິງນັ້ນ, EVFTA ຈະຊ່ວຍເພີ່ມ 44% ວົງເງິນສົ່ງອອກຂອງຫວຽດນາມ ໄປຍັງຕະຫຼາດອີຢູ ໃນປີ 2030.
        ສ່ວນໜັງສືພິມອອນລາຍ DW ຖືວ່າ, ຂໍ້ຕົກລົງດ້ານການຄ້າກັບຫວຽດນາມ ແມ່ນຂໍ້ຕົກລົງມີຄວາມມັກໃຫຍ່ໄຝ່ສູງທີ່ສຸດຂອງອີຢູ ກັບປະເທດພວມພັດທະນາ. ຂໍ້ຕົກລົງດັ່ງກ່າວໄດ້ຊ່ວຍໃຫ້ຫວຽດນາມ ຊຸກຍູ້ພື້ນຖານເສດຖະກິດ ໃນສະພາບເກີດໂລກລະບາດໂຄວິດ-19 ຄືໃນປະຈຸບັນ.
        ສ່ວນທ່ານ Manfred Junkert, ຫົວໜ້າສະຫະສະມາຄົມເກີບໜັງເຢຍລະມັນ ກໍ່ໄດ້ຕີລາຄາສູງຕໍ່ເລື່ອງສັນຍາ EVFTA ໄດ້ຮັບການຮັບຮອງເອົາ ເຊິ່ງແມ່ນສັນຍານສຳຄັນສຳລັບການຄ້າເສລີ ແລະ ຕ້ານລັດທິອາລັກຂາດ້ານການຄ້າ.
        ສ່ວນໜັງສືພິມ Nikkei Asia Reviwe ຂອງຍີ່ປຸ່ນ ໄດ້ໄຈ້ແຍກວ່າ, ເມື່ອສັນຍາເລີ່ມມີຜົນສັກສິດໃນຕົ້ນເດືອນ ສິງຫາ 2020, ຫວຽດນາມ ຈະກາຍເປັນປະເທດທີ 2 ຢູ່ອາຊີຕາເວັນອອກສ່ຽງໃຕ້ ລົງນາມໃນສັນຍາ EVFTA, ຖັດຈາກສິງກະໂປ. ແນ່ນອນວ່າ, EVFTA ຈະເຮັດໃຫ້ອີຢູ ກາຍເປັນລູກຄ້າໃຫຍ່ກວ່າຂອງຫວຽດນາມ. ພິເສດ, ບັນດາຂະແໜງຕ່ຳແຜ່ນຕັດຫຍິບ, ເກີບໜັງ ຈະບັນລຸລະດັບເຕີບໂຕຢ່າງແຮງ.
        ກໍ່ຕາມໜັງສືພິມນີ້,  ກ່ຽວກັບຝ່າຍອີຢູ, EVFTA ຈະຊ່ວຍໃຫ້ອີຢູ ເພີ່ມທະວີຄວາມສາມາດສຳຜັດກັບຕະຫຼາດທີ່ດູດດື່ມ. ສະເພາະປະເທດອັງກິດ - ເຊິ່ງແມ່ນປະເທດທີ່ຖອນຕົວອອກຈາກອີຢູ, ຍັງແມ່ນສ່ວນໜຶ່ງຂອງ EVFTA ຈົນຮອດທ້າຍປີ 2020.
(ແຫຼ່ງຄັດຈາກ VOV)