(ທ່ານນາງປະທານສະພາແຫ່ງຊາດ ຫງວຽນທິກິມເງິນ
ກ່າວປາໄສໃນວາລະປະຊຸມ)
ຕອນຄ່ຳວັນທີ 12/12, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ໄດ້ມີບົດກ່າວປາໄສໃນວາລະປະຊຸມຄັ້ງທີ 3 ຢູ່ກອງປະຊຸມສຸດຍອດບັນດາປະທານສະພາແຫ່ງຊາດຍິງໂລກ ຄັ້ງທີ 11. ທ່ານນາງປະທານສະພາແຫ່ງຊາດ ຫງວຽນທິກິມເງິນ ສະເໜີໃຫ້ບັນດາປະເທດ ຕ້ອງເພີ່ມທະວີການຮ່ວມມືສາກົນ, ແບ່ງປັນບົດຮຽນ, ໜູນຊ່ວຍດ້ານເຕັກນິກ, ມອບສົ່ງເຕັກໂນໂລຊີ ແລະ ສຳພັດບັນດາແຫຼ່ງການເງິນເພື່ອພ້ອມກັນກໍ່ສ້າງບັນດາລາຍການ, ໂຄງການ ກ້າວໄປເຖິງພື້ຶ້ນຖານເສດຖະກິດ ກ໋າກບອນ ຕ່ຳ, ຮັບມືກັບການປ່ຽນແປງຂອງດິນຟ້າອາກາດ ມີລັກສະນະຄົບຖ້ວນ ແລະ ການປະຕິບັດຄວາມສະເໝີພາບລະຫວ່າງຍິງ - ຊາຍ. ທ່ານນາງປະທານສະພາແຫ່ງຊາດ ຖືວ່າ, ຫວຽດນາມ ແມ່ນໜຶ່ງໃນບັນດາປະເທດຖືກຜົນກະທົບຢ່າງໜັກໜ່ວງຈາກການປ່ຽນແປງຂອງດິນຟ້າອາກາດ, ພິເສດແມ່ນສະພາບນ້ຳທະເລຂຶ້ນສູງ, ກໍຜົນສະທ້ອນເຖິງສິ່ງແວດລ້ອມ ແລະ ຄວາມໝັ້ນຄົງແຫ່ງຊາດ. ຫວຽດນາມ ໄດ້ເຊັນຂໍ້ຕົກລົງ ປາຣີ ໃນວັນທີ 03/11/2016, ກ່ອນທີ່ຂໍ້ຕົກລົງມີຜົນສັກສິດ.
“ດ້ວຍຄວາມຮັບຜິດຊອບຮ່ວມແຮງຮ່ວມໃຈເພື່ອໜ່ວຍພິພົບຂຽວສົດ, ປະຊາຄົມສາກົນຮ່ວມແຮງຮ່ວມໃຈເພື່ອຮັບມືກັບການປ່ຽນແປງຂອງດິນຟ້າອາກາດ ແລະ ການໜູນຊ່ວຍຂອງປະຊາຄົມສາກົນ, ຫວຽດນາມ ພວມຜັນຂະຫຍາຍຍຸດທະສາດແຫ່ງຊາດ ກ່ຽວກັບການປ່ຽນແປງຂອງດິນຟ້າອາກາດ ແລະ ຍຸດທະສາດແຫ່ງຊາດກ່ຽວກັບການເຕີບໂຕຂຽວ. ຫວຽດນາມ ໄດ້ຮັບຮອງເອົາກົດໝາຍວ່າດ້ວຍການປົກປັກຮັກສາສິ່ງແວດລ້ອມ, ໃນນັ້ນມີໂຄງການສະເພາະກ່ຽວກັບການຮັບມືກັບການປ່ຽນແປງຂອງດິນຟ້າອາກາດ ແລະ ບັນດາກົດໝາຍອື່ນໆ”.
ທ່ານນາງປະທານສະພາແຫ່ງຊາດ ຫງວຽນທິກິມເງິນ ຖືວ່າ, ຫວຽດນາມ ພວມຜັນຂະຫຍາຍການປະຕິບັດບັນດາຄຳໝັ້ນສັນຍາຂອງຕົນ ນັ້ນແມ່ນປະຕິບັດຍຸດທະສາດຮັບມືແຫ່ງຊາດກ່ຽວກັບການປ່ຽນແປງຂອງດິນຟ້າອາກາດ; ຍຸດທະສາດເຕີບໂຕຂຽວ. ລັດຖະບານຫວຽດນາມ ພວມສ້າງນະໂຍບາຍຫັນເປັນລະອຽດການປະຕິບັດດ້ວຍ 5 ໝວດລາຍການ. ສະພາແຫ່ງຊາດຫວຽດນາມ ມີຄວາມເອົາໃຈໃສ່ທີ່ສຸດ ແລະ ສະໜັບສະໜູນ, ຕິດຕາມການປະຕິບັດຂອງລັດຖະບານ.
“ສະພາແຫ່ງຊາດຕ້ອງຕິດຕາມກວດກາວຽກງານປະຕິບັດຂອງລັດຖະບານ ເພື່ອຮັບປະກັນບັນດາຄຳໝັ້ນສັນຍາເຊິ່ງຫວຽດນາມ ໄດ້ຮັບຮອງເອົາ, ມີຜົນສັກສິດ ແລະ ມີປະສິດທິຜົນ. ສະພາແຫ່ງຊາດຫວຽດນາມ ພວມເຮັດໃຫ້ທັດສະນະເປັນການກະທຳ ຄືດັ່ງຖະແຫຼງການ ຮ່າໂນ້ຍ IPU 132 ປີ 2015. ບັນດາວຽກງານດັ່ງກ່າວຈະປະກອບສ່ວນສ້າງ ແລະ ປົກປັກຮັກສາໜ່ວຍພິພົບຂອງພວກເຮົາໃຫ້ນັບມື້ນັບເຂັ້ມແຂງກວ່າ.”
(ແຫຼ່ງຄັດຈາກ VOV)