ຕອນເຊົ້າວັນທີ 2 ຕຸລາ, ຢູ່ຫໍສະພາແຫ່ງຊາດ, ທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກິມເງິນໄດ້ມີການພົບປະ ກັບທ່ານ ນາຍົກລັດຖະມົນຕີ ສປປ. ລາວ ທອງລຸນ ສີສຸລິດ ທີ່ພວມມີການຢ້ຽມຢາມ ຫວຽດນາມ ຢ່າງເປັນທາງການ.
        ທ່ານນາງປະທານສະພາແຫ່ງຊາດ ຢັ້ງຢືນວ່າ ສະພາແຫ່ງຊາດ ຫວຽດນາມ ສະໜັບສະໜູນ ແລະ ສ້າງເງື່ອນໄຂສະດວກເພື່ອຊຸກຍູ້ການຮ່ວມມື, ຜັນຂະຫຍາຍການປະຕິບັດບັນດາຂໍ້ຕົກລົງ, ເອກະສານການຮ່ວມມືເຊິ່ງໄດ້ຮັບການລົງນາມລະຫວ່າງ ສອງປະເທດ, ສອງລັດຖະບານ.
        ສ່ວນທ່ານທອງລຸນ ສີສຸລິດໄດ້ແຈ້ງໃຫ້ຊາບວ່າ ການຢ້ຽມຢາມຫວຽດນາມຢ່າງເປັນທາງການຄັ້ງນີ້ບັນລຸໄດ້ຫຼາຍໝາກຜົນທີ່ເປັນໜ້າຮັບຮູ້, ສອງຝ່າຍໄດ້ລົງນາມໃນເອກະສານການຮ່ວມມື 8 ສະບັບ. ຄຽງຄູກັບບັນດາການເຄື່ອນໄຫວພົບປະ, ເຈລະຈາ, ປຶກສາຫາລືກັບບັນດາການນຳຂັ້ນສູງ ຫວຽດນາມ, ທ່ານນາຍົກລັດຖະມົນຕີ ລາວ ກໍ່ໄດ້ພົບປະກັບບັນດາວິສາຫະກິດກຸ່ມບໍລິສັດໃຫຍ່ຂອງ ຫວຽດນາມ, ນັບທັງວິສາຫະກິດທີ່ໄດ້ໄປລົງທຶນ ແລະ ຍັງບໍ່ທັນໄປລົງທຶນຢູ່ລາວ, ຮັບຟັງຄຳເຫັນ ແລະ ຄວາມຫຍຸ້ງຍາກ, ຂໍ້ຕິດຂັດຂອງ ເຂົາເຈົ້າ,ຊອກຫາວິທີການແກ້ໄຂໂດຍໄວ, ຊຸກຍູ້ການຜັນຂະຫຍາຍບັນດາໂຄງການລົງທຶນ.