ຫວຽດນາມ ຍົກອອກຫຼາຍຂໍ້ລິ້ເລີ່ມຮັບມືກັບໄພພິບັດທຳມະຊາດ
ໃນຂອບເຂດກອງປະຊຸມຄັ້ງທຳອິດບັນດາເຈົ້າໜ້າທີ່ຂັ້ນສູງ APEC (SOM1) ທີ່ດຳເນີນ ຢູ່ນະຄອນ ຍາຈາງ, ແຂວງ ແຄ໋ງຮ່ວາ ແຕ່ວັນທີ 18/2-3/3 ນັ້ນ, ຈະດຳເນີນບັນດາກອງປະຊຸມ: ກອງປະຊຸມຄັ້ງທີ 9 ກຸ່ມກົນໄກຄູ່ຮ່ວມມືນະໂຍບາຍ ວິທະຍາສາດ, ເຕັກໂນໂລຢີ ແລະ ການປ່ຽນໃໝ່ APEC (PPSTI-9), ການປະຊຸມຄັ້ງທຳອິດ ອະນຸກຳມະການມາດຕະຖານ ແລະ ການຮ່ວມມື APEC (SCSC – 1) ແລະ ການປະຊຸມຄັ້ງທີ 44 ກຸ່ມນັກຊ່ຽວຊານ APEC ກ່ຽວກັບຊັບສິນທາງປັນຍາ (IPEG-44).ກ່າວຄວາມເຫັນທີ່ການປະຊຸມຄັ້ງທີ 11 ກຸ່ມປະຕິບັດງານກະກຽມຮັບມືກັບໄພທຳມະຊາດຢ່າງຮີບດ່ວນ APEC, ທ່ານ ເຈິ່ນກວາງຮ່ວາຍ, ກຳມະການຜູ້ປະຈຳການ ຄະນະຊີ້ນຳສູນກາງກ່ຽວກັບການປ້ອງກັນ ແລະ ຕ້ານໄພທຳມະຊາດ ຢູ່ ຫວຽດນາມ, ໃຫ້ຮູ້ວ່າ ເພື່ອຮັບມືກັບໄພທຳມະຊາດ, ລັດຖະບານ ຫວຽດນາມ ໄດ້ມີຫຼາຍມາດຕະການສຳຄັນ, ພິເສດແມ່ນພວມປັບປຸງຍຸດທະສາດແຫ່ງຊາດກ່ຽວກັບການປ້ອງກັນ ແລະ ຕ້ານໄພທຳມະຊາດຮອດປີ 2025, ວິໄສທັດເຖິງປີ 2030. ກ່ຽວຂ້ອງເຖິງການເຄື່ອນໄຫວຂອງກຸ່ມປະຕິບັດງານ APEC, ທ່ານເຈິ່ນກວາງຮ່ວາຍ, ໃຫ້ຮູ້ວ່າ:
“ໃນປີ APEC 2017, ພວກຂ້າພະເຈົ້າສະເໜີຄວນບຸລິມາສິດເພີ່ມທະວີຊຸກຍູ້ການຄົ້ນຄ້ວາ, ການໝູນໃຊ້ວິທະຍາສາດ, ເຕັກໂນໂລຢີທີ່ກ້າວໜ້າ ເພື່ອແນໃສ່ໜູນຊ່ວຍວຽກງານຮັບມືກັບໄພທຳມະຊາດຢ່າງຮີບດ່ວນ. ຜ່ານການເຄື່ອນໄຫວກຸ່ມປະຕິບັດງານ,ພວກຂ້າພະເຈົ້າຫວັງວ່າຈະໄດ້ຮັບການສະໜັບສະໜູນທັດສະນະຂອງ ຫວຽດນາມ ແລະ ພ້ອມກັນເຂົ້າຮ່ວມຮ່າງບາງຂໍ້ສະເໜີລວມກ່ຽວກັບ “ການເພີ່ມທະວີດ້ານວິທະຍາສາດ ເຕັກໂນໂລຢີ ເພື່ອແນໃສ່ເພີ່ມທະວີຄວາມສາມາດຮັບມືກັບໄພທຳມະຊາດ“ ເພື່ອຍື່ນສະເໜີ ການນຳບັນດາພື້ນຖານເສດຖະກິດ APEC ຮັບຮອງເອົາໃນປີ 2017“.
ຕາມລາຍການດຳເນີນງານຂອງ PPSTI-9 ບັນດາພື້ນຖານເສດຖະກິດສະມາຊິກ APEC ຈະປຶກສາຫາລື, ອັບເດັດຂໍ້ມູນຂ່າວກ່ຽວກັບບັນດາໂຄງການພວມໄດ້ຮັບການຜັນຂະຫຍາຍ ແລະ ຮັບຮອງເອົາບັນດາໂຄງການຮ່ວມມືໃໝ່ໃນຂອບເຂດ PPSTI; ປຶກສາຫາລື, ສະເໜີທິດທາງເພີ່ມທະວີການເຄື່ອນໄຫວຂອງກຸ່ມ PPSTI ກັບບັນດາອະນຸກຳມະການ, ກຸ່ມປະຕິບັດງານອື່ນໆໃນຂອບເຂດກົນໄກຮ່ວມມື APEC.
ໃນຂອບເຂດການປະຊຸມ SCSC – 1 ຈະມີສອງເຫດການແມ່ນ: ການປະຊຸມຂອງບັນດາອົງການສະເພາະຂະແໜງພາກພື້ນ APEC (SRB) ແລະ ກອງປະຊຸມຂອງອະນຸກຳມະການມາດຕະຖານ ແລະ ການຮ່ວມມື SCSC. ບັນດາກອງປະຊຸມນີ້ສຸມໃສ່ແລກປ່ຽນບັນດາເນື້ອໃນຍູ້ແຮງການເຄື່ອນໄຫວມາດຕະຖານ, ຕີລາຄາວຽກງານຮ່ວມມາດຕະຖານ ເພື່ອແນໃສ່ຊຸກຍູ້ການຫັນເປັນການຄ້າໃນພາກພື້ນ APEC ຢ່າງສະດວກ, ບຸລິມາສິດໃນການຊຸກຍູ້ພື້ນຖານເສດຖະກິດດີຈີຕອນ ໃນສະພາບການປະຕິວັດອຸດສາຫະກຳຄັ້ງທີ 4; ແບ່ງປັນການປະຕິບັດຂໍ້ກຳນົດທີ່ດີ (GRP).
ສ່ວນການປະຊຸມ IPEG-44 ຈະປຶກສາຫາລືບັນດາເນື້ອໃນຄື: ເພີ່ມທະວີການເຈລະຈາກ່ຽວກັບນະໂຍບາຍຊັບສິນທາງປັນຍາ ແລະ ປຶກສາຫາລືບັນດາມາດຕະການຍົກສູງປະສິດທິຜົນຂອງລະບົບປົກປ້ອງຊັບສິນທາງປັນຍາ; ພັດທະນາແຫຼ່ງຊັບພະຍາກອນມະນຸດກ່ຽວກັບຊັບສິນທາງປັນຍາໃຫ້ບັນດາພື້ນຖານເສດຖະກິດພວມພັດທະນາ ແລະ ດ້ອຍພັດທະນາ; ຍູ້ແຮງການໂຄສະນາ, ຍົກສູງຄວາມຮູ້ຂອງມະຫາຊົນກ່ຽວກັບຊັບສິນທາງປັນຍາ.
(ແຫຼ່ງຄັດຈາກ VOV)
