ເນື່ອງໃນໂອກາດກອງປະຊຸມສຸດຍອດ ອາຊຽນ ຄັ້ງທີ 31 ແລະ ບັນດາກອງປະຊຸມທີ່ກ່ຽວຂ້ອງ ຢູ່ Manila, ປະເທດ ຟີລິບປີນ, ໃນຕອນຄ່ຳວັນທີ 13 ພະຈິກ, ທ່ານ ຫງວຽນຊວນຟູ໋ກ ນາຍົກລັດຖະມົນຕີ ຫວຽດນາມ  ໄດ້ມີບັນດາການພົບປະກັບ ທ່ານ Antonio Guterres ເລຂາທິການໃຫຍ່ ສະຫະປະຊາຊາດ ແລະ ທ່ານ Donald Tusk ປະທານສະພາ ເອີລົບ. ທ່ານ ເລຂາທິການໃຫຍ່ ສະຫະປະຊາຊາດ Antonio Guterres ໃຫ້ຮູ້ວ່າ ບັນດາຄະນະກຳມະການດ້ານເສດຖະກິດ ຂອງ ສະຫະປະຊາຊາດ ຈະລະດົມແຫ່ງກຳລັງຢ່າງສຸດຂີດເພື່ອສົມທົບກັນ, ໜູນຊ່ວຍໃຫ້ຫວຽດນາມ ປະຕິບັດສຳເລັດ ແຜນການຍຸດທະສາດຮ່ວມກ່ຽວກັບການຮ່ວມມືລະຫວ່າງ ຫວຽດນາມ ແລະ ສະຫະປະຊາຊາດ ໃນໄລຍະ 2017 – 2021, ຜ່ານນັ້ນປະກອບສ່ວນປະຕິບັດບັນດາເປົ້າໝາຍພັດທະນາແບບຍືນຍົງ.
ສອງຝ່າຍເຫັນດີເປັນເອກະພາບສະໜັບສະໜູນ, ຊຸກຍູ້ການແກ້ໄຂບັນດາການຂັດແຍ້ງທີ່ບົນທະເລຕາເວັນອອກໂດຍສັນຕິວິທີບົນພື້ນຖານກົດໝາຍ ສາກົນ, ໃນນັ້ນມີ ສົນທິສັນຍາສະຫະປະຊາຊາດ ກ່ຽວກັບ ກົດໝາຍວ່າດ້ວຍທະເລ 1982; ປາຖະໜາວ່າ ອາຊຽນ ແລະ ຈີນ ຈະສ້າງກົດແຫ່ງການປະພຶດຂອງຝ່າຍຕ່າງໆທະເລຕາເວັນອອກ(COC) ສຳເລັດໂດຍໄວ
ທີ່ການພົບປະລະຫວ່າງ ທ່ານ ນາຍົກລັດຖະມົນຕີ ຫງວຽນຊວນຟູ໋ກ ແລະ ທ່ານ ປະທານສະພາ ເອີລົບ Donald Tusk, ສອງຝ່າຍເຫັນດີເປັນເອກະພາບສືບຕໍ່ຊຸກຍູ້ບັນດາຄວາມມານະພະຍາຍາມເພື່ອແນໃສ່ນຳສາຍພົວພັນກ້າວເຂົ້າສູ່ລວງເລິກ, ເປັນຕົ້ນແມ່ນໃນການສືບຕໍ່ຊຸກຍູ້ການຮ່ວມມືແໜ້ນແຟ້ນໃນຂອບເຂດການຮ່ວມມື ເວທິປາໄສ ອາຊີ - ເອີລົບ (ASEM) ແລະ ອາຊຽນ - ອີຢູ.
ທ່ານ ນາຍົກລັດຖະມົນຕີ ຫງວຽນຊວນຟູ໋ກ ສະເໜີ ສະພາເອີລົບ ລົງນາມ ແລະ ໃຫ້ສັດຕະຍາບັນສັນຍາການຄ້າເສລີ ຫວຽດນາມ - ອີຢູ (EVFTA) ໂດຍໄວ; ສືບຕໍ່ໜູນຊ່ວຍ ຫວຽດນາມ ໃນບັນດາຂົງເຂດດ້ານການສຶກສາ - ບຳລຸງສ້າງ, ວິທະຍາສາດ - ເຕັກໂນໂລຢີ, ການຮັບມືກັບປ່ຽນແປງຂອງດິນຟ້າອາກາດ.