28/10/2019 09:12 GMT+7 Email Print Like 0

ນັກສຶກສາລາວແຂ່ງບັນລະຍາຍດ້ວຍພາສາຫວຽດ

      ຮອບຄັດເລືອກການແຂ່ງບັນລະບາຍດ້ວຍພາສາຫວຽດ ສໍາລັບນັກສຶກສາລາວ - ເຂດພາກເໜືອ ຫວຽດນາມ ຖືກຈັດຂຶ້ນຢູ່ ມະຫາວິທະຍາໄລ ຊົນລະປະທານ ຫວ່າງມໍ່ໆມານີ້ ດ້ວຍຫົວຂໍ້ ຫວຽດນາມ - ປະເທດທີ່ຂ້ອຍຮັກເປັນເວທີທີ່ມີຄວາມໝາຍ ແລະ ເປັນປະໂຫຍດສໍາລັບ ນັກສຶກສາລາວ ທີ່ພວມດໍາລົງຊີວິດ ແລະ ຮໍ່າຮຽນຢູ່ຫວຽດນາມ. ຕໍ່ໄປນີ້, ເຊີນທ່ານຕິດຕາມບົດຂຽນຂອງນັກຂ່າວ ເຈິ່ນຕ໊ວນທີ່ມີຫວົຂໍ້ ນັກສຶກສາລາວ ແຂ່ງບັນລະຍາຍດ້ວຍພາສາຫວຽດ”.
      ທີ່ທ່ານຫາກໍຟັງຜ່ານໄປແລ້ວນັ້ນ ແມ່ນຄວາມຮູ້ສຶກຂອງນັກສຶກສາລາວມາຈາກ 42 ໂຮງຮຽນ ທີ່ເຂົ້າຮ່ວມການແຂ່່ງບັນລະຍາຍຄັ້ງນີ້, ເຊິ່ງປັດຈຸບັນກໍາລັງຮຽນປະລິນຍາຕີ, ປະລິນຍາໂທ, ເປັນນັກສຶກສາຝຶກຫັດ ຫຼື ກໍາລັງຮຽນກຽມພາສາຫວຽດ ຢູ່ຫວຽດນາມ.
ບົດບັນລະຍາຍມີຫົວຂໍ້ “ເຂດປູຊະນີຍະສະຖານ ລາວ ໂຄ (ເຊີນລາ) ຂອງນາງ ອາລຸນນີ ໄຊສົງຄາມ 
      ດ້ວຍຄວາມສາມາດເວົ້າພາສາຫວຽດ ໄດ້ຢ່າງລ່ຽນໄຫຼ, ມີສໍານຽງສຽງເວົ້າທີ່ໜ້າຈັບໃຈ ປະກອບດ້ວຍການສະແດງທີ່ມີຊີວິດຊີວາ ຂອງລວມໝູ່່ນັກສຶກສາລາວ ທີ່ພວມຮໍ່າຮຽນຢູ່ສະຖາບັນການເງິນ, ບົດບັນລະຍາຍມີຫົວຂໍ້ “ເຂດປູຊະນີຍະສະຖານ ລາວ ໂຄ (ເຊີນລາ) - ເຊິ່ງເປັນສັນຍາລັກອັນດີງາມຂອງນໍ້າໃຈໄມຕີຈິດມິດຕະພາບລະຫວ່າງ ຫວຽດນາມ - ລາວ” ຂອງນາງ ອາລຸນນີ ໄຊສົງຄາມ ກໍ່ໄດ້ສ້າງຄວາມປະທັບໃຈຕໍ່ຄະນະກໍາມະການ ແລະ ທ່ານຜູ້ຊົມ. ເມື່ອແບ່ງປັນກ່ຽວກັບເຫດຜົນທີ່ເລືອກເອົາຫົວຂໍ້ນີ້, ອາລຸນນີ ໃຫ້ຮູ້ວ່າ: ນີ້ແມ່ນໜຶ່ງໃນບັນດາຖານທີ່ໝັ້ນການປະຕິວັດແຫ່ງທໍາອິດ ລຽບຕາມເສັ້ນຊາຍແດນ ຫວຽດນາມ - ລາວ, ເຊິ່ງເປັນບ່ອນທີ່ໄດ້ສ້າງຂີດໝາຍ ກ່ຽວກັບການຊ່ວຍເຫຼືອຂອງປະຊາຊົນໃນເຂດດັ່ງກ່າວທີ່ມີຕໍ່ກັບຜູ້ບັນຊາຄະນະປະຈັນບານ ລາວ - ເໜືອ (ລາວ)  ນັ້ນຄືທ່ານປະທານ ໄກສອນ ພົມວິຫານ. 

ການບັນລະຍາຍຂອງນາງ ວິພາວະດີ
      ເພື່ອບັນລຸໄດ້ຜົນງານສູງຄືແນວນີ້, ວິພາວະດີ ຕ້ອງຜ່ານການຝຶກຊ້ອມຢ່າງຫ້າວຫັນ ພ້ອມກັບໝູ່ເພື່ອນຂອງຕົນມາເປັນເວລາ 2 ອາທິດ, ຈາກຂອດກະກຽມບົດບັນລະຍາຍຕະຫຼອດຮອດຂອດສະແດງເທິງເວທີ. ກອງຟ້ອນປະກອບໃຫ້ແກ່ບົດບັນລະຍາຍຂອງ ວິພາວະດີ ລວມມີ 28 ຄົນ, ອາດເວົ້າໄດ້ວ່າ ແມ່ນຫຼາຍທີ່ສຸດເມື່ອທຽບໃສ່ໂຮງຮຽນແຫ່ງຕ່າງໆ.
        ນອກຈາກການຊ້ອມເວົ້າແນວໃດໃຫ້ລ່ຽນໄຫຼ, ອອກສຽງ ແລະ ຢຸດໃຫ້ຖືກຈັງຫວະແລ້ວ, ການສະແດງ, ສີໜ້າສີຕາຂອງຜູ້ເຂົ້າຮ່ວມການແຂ່ງຂັນກໍຕ້ອງໄດ້ກະກຽມຢ່າງລະອຽດລະອໍ, ພ້ອມກັນນັ້ນ ແມ່ນກະກຽມເຄື່ອງນຸ່ງ, ອຸປະກອນສະແດງຢ່າງລອບຄອບຖີ່ຖ້ວນນັ້ນ ກໍ່ໄດ້ເຮັດໃຫ້ບົດບັນລະຍາຍມີຊີວິດຊີວາຂຶ້ນຕື່ມອີກ.  ນັກຂ່າວ ຟຸ່ງຮຸຍທິ້ງ, ເປັນໜຶ່ງໃນບັນດາສະມາຊິກຄະນະກໍາມະການ ຕີລາຄາວ່າ:
        ຂ້າພະເຈົ້າຮູ້ສຶກແປກປະຫຼາດໃຈຕໍ່ການເວົ້າພາສາຫວຽດ ຂອງນັກສຶກສາລາວ, ມີເພື່ອນລາວຫຼາຍຄົນເວົ້າພາສາຫວຽດໄດ້ດີ ແລະ ອອກສຽງວັນນະຍຸດ ໄດ້ຢ່າງຖືກຕ້ອງ ແລະ ຊັດເຈນ. ຄວາມຈິງແລ້ວ, ຂ້າພະເຈົ້າມັກການບັນລະຍາຍຂອງນັກສຶກສາລາວບາງຄົນທີ່ເຂົ້າຮ່ວມການແຂ່ງຂັນນີ້ອີຫຼີ ແລະ ຂ້າພະເຈົ້າຖືວ່າ ນີ້ແມ່ນການແຂ່ງຂັນທີ່ມີຄຸນນະພາບສູງ”.
        ນ້ອງເຫັນວ່າ ນີ້ແມ່ນການແຂ່ງຂັນທີ່ມີຄວາມໝາຍ ແລະ ເປັນປະໂຫຍດທີ່ສຸດ, ຜ່ານການແຂ່ງຂັນຄ້ັງນີ້ ນ້ອງໄດ້ຮູ້ຈັກກັບເພື່ອນຄົນລາວຫຼາຍຄົນ. ໃນການແຂ່ງຂັນມື້ນີ້, ນ້ອງເຫັນວ່າ ບັນດາເພື່ອນລາວ ເວົ້າພາສາຫວຽດ ໄດ້ດີຫຼາຍ ແລະ ໄດ້ສົ່ງສານມີຄວາມໝາຍໄປໃຫ້ຜູ້ຊົມ, ບໍ່ພຽງແຕ່ແມ່ນຄວາມຮູ້ທາງດ້ານວັດທະນະທໍາຂອງຫວຽດນາມ ເທົ່ານັ້ນ ຫາກຍັງແມ່ນວັດທະນະທໍາຂອງລາວອີກດ້ວຍ”.
        ນ້ອງເຫັນວ່າ ບັນຍາກາດຂອງການແຂ່ງຂັນນີ້ ແມ່ນຟົດຟື້ນມ່ວນຊື່ນທີ່ສຸດ, ນັກສຶກສາທີ່ທີ່ເຂົ້າຮ່ວມການແຂ່ງຂັນໄດ້ກະກຽມບົດແຂ່ງຂັນຂອງຕົນຢ່າງລອບຄອບຖີ່ຖ້ວນ”.
        ການແຂ່ງບັນລະຍາຍດ້ວຍພາສາຫວຽດ ປີ 2019 ແກ່ຍາວເປັນເວລາກວ່າ 8 ຊົ່ວໂມງ. ຄະນະຈັດຕັ້ງ ໄດ້ມອບລາງວັນທີ 1 ສອງລາງວັນ, ລາງວັນທີ 2 ແມ່ນ4 ລາງວັນ ແລະ ລາງວັນທີ 3 ແມ່ນ 06 ລາງວັນ ໃຫ້ແກ່ບັນດາທິມທີ່ມີນັກສຶກສາດີເລີດ. ລາງວັນທີ 1 ໄດ້ແກ່ສະຖາບັນການຕ່າງປະເທດ ແລະ ມະຫາວິທະຍາໄລສ້າງຄູ (ມະຫາວິທະຍາໄລ ຖ໊າຍງວຽນ). ລາງວັນທີສອງ ໄດ້ແກ່ມະຫາວິທະຍາໄລເຕັກນິກອຸດສາຫະກໍາ, ມະຫາວິທະຍາໄລຄົມມະນາຄົມຂົນສົ່ງ, ມະຫາວິທະຍາໄລການຄ້າຕ່າງປະເທດ ແລະ ມະຫາວິທະຍາໄລອຸດສາຫະກໍາ ກວ໋າງນິງ.  ສໍາລັບທິມທີ່ຍາດໄດ້ລາງວັນທີ 1  ແລະ ທີ 2  ຈະໄດ້ເຂົ້າຮອບຊີງຊະນະເລີດລະດັບທົ່ວປະເທດ ເຊິ່ງຈະຈັດຂຶ້ນຢູ່ມະຫາວິທະຍາໄລ ຖ໊າຍງວຽນ ພາກເໜືອຫວຽດນາມໃນວັນທີ 8 ພະຈິກ ຈະມາເຖິງ.
 (ແຫຼ່ງຄັດຈາກ VOV)