14/09/2020 06:50 GMT+7 Email Print Like 0

ຈຳນວນຜູ້ຕິດເຊື້ອໂຄວິດ - 19 ໃນທົ່ວໂລກ ໃກ້ຈະລືນກາຍຕົວເລກ 29 ລ້ານຄົນ

      ໄລ່ຮອດຕອນເຊົ້າວັນທີ 13 ກັນຍາ, ມີ 213 ປະເທດ ແລະ ເຂດແຄວ້ນໃນໂລກ ໄດ້ຢັ້ງຢືນມີຜູ້ຕິດເຊື້ອໂຄວິດ - 19 ເປັນຈຳນວນຫຼາຍກວ່າ 28,9 ລ້ານຄົນ.

(ພາບປະກອບ:THX/TTXVN) 
      ຕາມເວັບໄຊ worldometers.info ແລ້ວ, ໄລ່ຮອດຕອນເຊົ້າວັນທີ 13 ກັນຍາ, ມີ 213 ປະເທດ ແລະ ເຂດແຄວ້ນໃນໂລກ ໄດ້ຢັ້ງຢືນມີຜູ້ຕິດເຊື້ອໂຄວິດ - 19 ເປັນຈຳນວນຫຼາຍກວ່າ 28,9 ລ້ານຄົນ ເພີ່ມຂຶ້ນ 278.000 ຄົນ ໃນ 24 ຊົ່ວໂມງທີ່ຜ່ານມາ. ໃນນັ້ນ ມີ 924.000 ຄົນ ເສຍຊີວິດ. ອາເມລິກາ, ອິນເດຍ ແລະ ບຣາຊິນ ແມ່ນ 3 ປະເທດທີ່ມີຈຳນວນຜູ້ຕິດເຊື້ອຫຼາຍກວ່າໝູ່ໃນໂລກຕາມລຳດັບ.
          ຢູ່ເອີຣົບ, ລັດເຊຍສືບຕໍ່ແມ່ນປະເທດຖືກຜົນສະທ້ອນຢ່າງໜັກໜ່ວງທີ່ສຸດໃນພາກພື້ນ ດ້ວຍຈຳນວນຜູ້ຕິດເຊື້ອຫຼາຍກວ່າ 1 ລ້ານຄົນ, ຖັດມາແມ່ນ ແອັດສະປາຍ. ໃນຂະນະນັ້ນ, ຝລັ່ງ, ອັງກິດ ແລະ ຢູແກຼນ ແມ່ນບັນດາປະເທດເອີຣົບມີລະດັບເພີ່ມໄວພໍສົມຄວນ ຄືຫຼາຍກວ່າ 3.000 ຄົນໃນແຕ່ລະປະເທດໃນເວລາ 1 ວັນຜ່ານມາ.
          ຢູ່ ອາຊີ, ໃນ 24 ຊົ່ວໂມງຜ່ານມາ, ຈຳນວນຜູ້ຕິດເຊື້ອໂຄວິດ - 19 ໄດ້ເພີ່ມຂຶ້ນຕື່ມອີກ 125.000 ຄົນ. ອິນເດຍສືບຕໍ່ແມ່ນປະເທດຖືກຜົນສະທ້ອນຢ່າງໜັກຈາກໂລກລະບາດ, ດ້ວຍຈຳນວນຜູ້ຕິດເຊື້ອໃໝ່ເກືອບ 94.500 ກໍລະນີ. ສ່ວນ ຟີລິບປິນ ແມ່ນປະເທດມີຈຳນວນຜູ້ຕິດເຊື້ອໃໝ່ຫຼາຍກວ່າໝູ່ໃນເວລາ 24 ຊົ່ວໂມງທີ່ຜ່ານມາ ຢູ່ພາກພື້ນ ອາຊີຕາເວັນອອກສ່ຽງໃຕ້, ຖັດມາແມ່ນ ອິນໂດເນເຊຍ.
(ແຫຼ່ງຄັດຈາກ VOV)