09/04/2020 12:49 GMT+7 Email Print Like 0

ການ​ຜັນ​ແປ​ຫຼ້າ​ສຸດ​ກ່ຽວ​ກັບ​ໂລກ​ລະ​ບາດ​ໂຄວິດ - 19 ໃນ​ໂລກ

ນັບແຕ່ເວລາ 00 ໂມງ 00 ນາທີຂອງວັນທີ 8 ເມສາ, ນະຄອນ ອູຫັ້ນ ແຂວງຫູເປີຍຂອງຈີນ ເຊິ່ງເປັນແຫຼ່ງກຳເນີດໂລກລະບາດໂຄວິດ - 19 ຂອງຈີນ ໄດ້ຍົກເລີກຄຳສັ່ງປິດລ້ອມ ຢ່າງເປັນທາງການ. ພາຍຫຼັງຍົກເລີກຄຳສັ່ງດັ່ງກ່າວ, ມີປະຊາຊົນ ນັບພັນຄົນໄດ້ຫຼັ່ງໄຫຼໄປຍັງສະຖານີລົດໄຟ ເພື່ອເດີນທາງອອກຈາກ ອູຫັ້ນ. ກ່ອນໜ້ານັ້ນ, ໃນວັນທີ 07 ເມສາ, ຈີນ ໄດ້ຢັ້ງຢືນມີຜູ້ຕິດເຊື້ອພະຍາດໂຄວິດ - 19 ຕື່ມອີກ 62 ຄົນ.

ນັບແຕ່ເວລາ 00 ໂມງ 00 ນາທີຂອງວັນທີ 8 ເມສາ, ນະຄອນ ອູຫັ້ນ ແຂວງຫູເປີຍຂອງຈີນ ໄດ້ຍົກເລີກຄຳສັ່ງປິດລ້ອມ ຢ່າງເປັນທາງການ (ພາບ: TTXVN)

ສ່ວນຢູ່ໃນໂລກ, ຕາມການສະຖິຕິຂອງເວັບໄຊ worldometers.info ຍັງສະແດງໃຫ້ເຫັນບັນດາຕົວເລກທີ່ເປັນໜ້າວິຕົກກັງວົນ. ຕາມນັ້ນແລ້ວ, ໄລ່ຮອດຕອນເຊົ້າວັນທີ 08 ເມສາ, ຍອດຈຳນວນຜູ້ຕິດເຊື້ອພະຍາດໂຄວິດ 19 ໃນທົ່ວໂລກໄດ້ຂຶ້ນເຖິງ 1.426.600 ກໍລະນີ, ໃນນັ້ນ ຈຳນວນກໍລະນີເສຍຊີວິດແມ່ນເກືອບ 82.000 ກໍລະນີ ແລະ ໂລກກໍຢັ້ງຢືນວ່າ ມີຜູ້ຕິດເຊື້ອ 301.800 ຄົນ ໄດ້ຮັບການປິ່ນປົວຫາຍດີເປັນປົກກະຕິ. ປັດຈຸບັນ, ໂລກລະບາດໂຄວິດ - 19 ໄດ້ແຜ່ລະບາດອອກສູ່ 209 ປະເທດ ແລະ ເຂດແຄວ້ນໃນໂລກ.

ອາເມລິກາ ຍັງຄົງແມ່ນປະເທດມີຜູ້ຕິດເຊື້ອຫຼາຍກວ່າໝູ່ໃນໂລກດ້ວຍຈຳນວນຜູ້ຕິດເຊື້ອໄວຣັດ SARS-CoV-2 ຫຼາຍກວ່າ 396.400 ຄົນ ໃນນັ້ນ ມີກວ່າ 12.800 ຄົນເສຍຊີວິດ. ຖັດມາແມ່ນ ແອັດສະປາຍ, ອີຕາລີ, ຝລັ່ງ ແລະ ເຢຍລະມັນຕາມລຳດັບ.

ໃນຂະນະນັ້ນ, ຢູ່ອັງກິດ, ພາຍໃນ ເວລາພຽງແຕ່ 24 ຊົ່ວໂມງເທົ່ານັ້ນ, ປະເທດນີ້ໄດ້ຢັ້ງຢືນວ່າມີຜູ້ເສຍຊີວິດຕື່ມອີກ 786 ຄົນ.

ສ່ວນຢູ່ ລັດເຊຍ, ສະພາບການຮ້າຍແຮງສືບຕໍ່ເພີ່ມຂຶ້ນຢູ່ປະເທດນີ້, ເມື່ອໃນວັນທີ 7 ເມສາ, ວົງການເຈົ້າໜ້າທີ່ຂອງລັດເຊຍ ໄດ້ປະກາດວ່າ ປະເທດນີ້ໄດ້ຢັ້ງຢືນມີຫຼາຍກວ່າ 1.100 ກໍລະນີຕິດເຊື້ອ, ອັນໄດ້ຍົກຈໍານວນຜູ້ຕິດເຊື້ອຢູ່ປະເທດນີ້ຂຶ້ນເປັນເກືອບ 7.500 ຄົນ.

 (ແຫຼ່ງຄັດຈາກ VOV)