23/03/2021 10:03 GMT+7 Email Print Like 0

ການນຳ ສສ.ຫວຽດນາມ ອວຍພອນການນຳ ສປປ.ລາວ

ບັນດາການນຳຂັ້ນສູງຫວຽດນາມ ສະແດງຄວາມເຊື່ອໝັ້ນວ່າ ຄະນະການນຳໃໝ່ຂອງລາວ ຈະຊີ້ນຳຢ່າງມີປະສິດທິຜົນການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ແລະ ແຜນການພັດະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX ໄລຍະ 2021 – 2025 ຢ່າງມີໄຊ.
ທ່ານ ທອງລຸນ ສີສຸລິດ, ປະທານປະເທດລາວ. (ພາບ: KPL)

ໂດຍຮັບຂ່າວວ່າ, ກອງປະຊຸມຄັ້ງປະຖົມມະລຶກ, ສະພາແຫ່ງຊາດສປປ.ລາວ ຊຸດທີ IX ໄດ້ເລືອກຕັ້ງທ່ານ ທອງລຸນ ສີສຸລິດ, ເປັນປະທານປະເທດ; ທ່ານ ພັນຄຳ ວິພາວັນ, ເປັນນາຍົກລັດຖະມົນຕີ; ທ່ານ ໄຊສົມພອນ ພົມວິຫານ, ເປັນປະທານສະພາແຫ່ງຊາດ; ທ່ານ ບຸນທອງ ຈິດມະນີ, ເປັນຮອງປະທານປະເທດ ແລະ ທ່ານນາງ ປານີ ຢາທໍ່ຕູ້, ເປັນຮອງປະທານປະເທດ. ວັນທີ 22 ມີນາ 2021, ທ່ານເລຂາທິການໃຫຍ່, ປະທານປະເທດຫວຽດນາມ ຫງວຽນຝູຈ້ອງ, ທ່ານນາຍົກລັດຖະມົນຕີ ຫງວຽນຊວັນຟຸກ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ແລະ ທ່ານນາງຮອງປະທານປະເທດ ດັ້ງທິງອັກທິ້ງ ໄດ້ສົ່ງໂທລະເລກຊົມເຊີຍເຖິງບັນດາການນຳຂັ້ນສູງຢູ່ຂັ້ນທຽບເທົ່າຂອງລາວ.

        ໃນບັນດາໂທລະເລກຊົມເຊີຍ, ບັນດາການນຳຂັ້ນສູງຫວຽດນາມ ສະແດງຄວາມເຊື່ອໝັ້ນວ່າ ຄະນະການນຳໃໝ່ຂອງລາວ ຈະຊີ້ນຳຢ່າງມີປະສິດທິຜົນການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ແລະ ແຜນການພັດະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX ໄລຍະ 2021 – 2025 ຢ່າງມີໄຊ, ສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນສຳເລັດຜົນ, ມີທີ່ຕັ້ງ ແລະ ບົດບາດນັບມື້ນັບສຳຄັນຢູ່ພາກພື້ນ ແລະ ບົນເວທີສາກົນ. ການນຳຂັ້ນສູງຫວຽດນາມ ກໍ່ຢືນຢັນວ່າ ຈະສືບຕໍ່ຮ່ວມມືກັນຢ່າງແໜ້ນແຟ້ນກັບບັນດາການນຳລາວ ເພື່ອເພີ່ມພູນຄູນສ້າງ ແລະ ພັດທະນາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຢ່າງຮອບດ້ານລະຫວ່າງຫວຽດນາມ - ລາວ ຢ່າງບໍ່ຢຸດຢັ້ງ ໃຫ້ຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ, ເພື່ອຄວາມວັດທະນາຖາວອນ ແລະ ຄວາມຜາສຸກຂອງປະຊາຊົນ 2 ປະເທດ.

        ແລະກໍ່ໃນວັນດຽວກັນ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ໄດ້ສົ່ງຈົດໝາຍອວຍພອນເຖິງທ່ານ ສະເຫຼີມໄຊ ກົມມະສິດ ເນື່ອງໃນໂອກາດທີ່ສະພາແຫ່ງຊາດລາວ ຊຸດທີ IX ສືບຕໍ່ເລືອກຕັ້ງທ່ານເປັນລັດຖະມົນຕີກະຊວງການຕ່າງປະເທດລາວ.

(ແຫຼ່ງຄັດຈາກ VOV)