ព័ត៌មាន
វៀតណាមចូលរួមក្នុងជំនួបពិភាក្សាតាមវីដេអូរបស់ក្រុមប្រឹក្សាសន្តិសុខអង្គការសហប្រជាជាតិក្រោមប្រធានបទអំពីជំងឺរាតត្បាតនិងសន្តិសុខ
អនុរដ្ឋមន្រ្តីការបរទេស វៀតណាម លោក To Anh Dung
នាយប់ថ្ងៃទី២ ខែកក្កដា ឆ្នាំ២០២០ អនុរដ្ឋមន្រ្តីការបរទេស វៀត ណាម លោក To Anh Dung បានចូលរួមកិច្ចពិភាក្សាតាមប្រព័ន្ធវីដេអូ របស់ក្រុមប្រឹក្សាអង្គការសហប្រជាជាតិ ស្តីពី “ជំងឺរាតត្បាតនិងសន្តិសុខ” ដឹកនាំដោយរដ្ឋ មន្រ្តីការបរទេសអាល្លឺម៉ង។
កិច្ចប្រជុំនេះមានការចូលរួមពី អគ្គលេខាធិការអង្គការសហប្រជាជាតិលោក Antonio Guterres ប្រធាន គណៈ កម្មាធិការកាកបាទក្រហមអន្តរជាតិ Peter Maurer និងឧត្តមស្នងការសហភាពអាហ្វ្រិកទទួលបន្ទុកកិច្ចការសង្គម លោកស្រី Amira Elfadil Mohammed ផងដែរ។
ថ្លែងនៅក្នុងពិធីបើក អគ្គលេខាធិការនៃអង្គការសហប្រជាជាតិ លោក Antonio Guterres បានឲ្យដឹងថា ជំងឺរាតត្បាត COVID-19 បានបន្ត ប៉ះពាល់យ៉ាងខ្លាំងដល់សន្តិភាព សន្តិសុខនិងសេដ្ឋកិច្ចសង្គមនៅលើពិភព លោក។ អគ្គលេខាធិការអង្គការ សហប្រជាជាតិបានអំពាវនាវឱ្យសហគមន៍អន្តរជាតិ បង្កើនកិច្ចសហប្រតិបត្តិការដើម្បីឆ្លើយតបទៅនឹងជំងឺរាតត្បាតនិងបញ្ហាសន្តិសុខរួម ធានាការផ្តល់ជំនួយមនុស្សធម៌ ការពារសុខភាព សន្តិសុខនិងសុវត្ថិភាពរបស់ប្រជាជននៅជុំវិញពិភពលោក។
ថ្លែងនៅក្នុងកិច្ចប្រជុំ អនុរដ្ឋមន្រ្តីការបរទេសវៀតណាម លោក To Anh Dung បានបញ្ជាក់ពីសារៈសំខាន់នៃការបង្កើនកិច្ចសហប្រតិបត្តិការ ដើម្បីឆ្លើយតបនឹងជំងឺរាតត្បាត COVID-19 ទន្ទឹមនឹងការស្តារសេដ្ឋកិច្ច - សង្គមប្រកបដោយនិរន្តរភាព។ ជាមួយគ្នានេះ អនុរដ្ឋមន្រ្តីការបរទេសលោក To Anh Dung បានសង្កត់ធ្ងន់ថា វៀតណាមគាំទ្រសេចក្តីអំពាវនាវរបស់អគ្គលេខាធិការអង្គការសហប្រជាជាតិ ស្តីពីការលើកលេងបទដាក់ទណ្ឌកម្មដែលប៉ះពាល់ដល់កិច្ចខិតខំប្រឹងប្រែងរាំងស្កាត់ COVID-19 និងមានគោលបំណងចង់ឲ្យក្រុមប្រឹក្សាសន្តិសុខនិងប្រទេសដទៃទៀត ចាត់វិធានការសមស្រប ដើម្បីជួយសម្រួលដល់ជំនួយមនុស្សធម៌ ដល់បណ្តាប្រទេសដែលរងបទដាក់ទណ្ឌកម្ម ដើម្បីប្រយោជន៍សម្រាប់ប្រជាជន។ លោកអនុរដ្ឋមន្ត្រីបានមានប្រ សាសន៍ថា វៀតណាមទទួលបានលទ្ធផលជាវិជ្ជមានជំហានដំបូង ក្នុងការគ្រប់គ្រងជំងឺឆ្លង ដោយធានាថា សកម្មភាពសេដ្ឋកិច្ចសង្គម នឹងវិលមករកភាពប្រក្រតីឡើងវិញជាពុំខាន៕
តាម VOV5 - វិទ្យុសំឡេងវៀតណាម
