ថ្លែងមតិបើកសម័យប្រជុំពិសេសរបស់ក្រុមប្រឹក្សាសិទ្ធិមនុស្សអង្គការសហប្រជាជាតិស្តីពីស្ថានភាពនៅសាធារណរដ្ឋប្រជាធិបតេយ្យកុងហ្គោ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សលោក Volker Turk បានសម្តែងការព្រួយបារម្ភអំពីការកើនឡើងនៃអំពើហិង្សានៅភាគខាងកើតនៃប្រទេសនេះ ដោយព្រមានពីផលវិបាកមិនត្រឹមតែសម្រាប់ប្រជា ជនក្នុងតំបន់ប៉ុណ្ណោះទេ ប៉ុន្តែសម្រាប់តំបន់ទាំងមូលទៀតផង។ លោក Volker Turk បានអំពាវនាវឱ្យភាគីពាក់ព័ន្ធបញ្ឈប់ការប្រយុទ្ធគ្នា បន្តការសន្ទនា បង្កើនកិច្ចខិតខំប្រឹងប្រែងរាំងស្កាត់ជម្លោះ និងគាំទ្រដំណើរការសន្តិភាព។ លោកក៏បានបញ្ជាក់ពីសារៈសំខាន់នៃការលើកកម្ពស់សិទ្ធិមនុស្សអន្តរជាតិ និងច្បាប់មនុស្សធម៌។
ជាមួយគ្នានេះ ក្រុមប្រឹក្សាសិទ្ធិមនុស្សអង្គការសហប្រជាជាតិកាលពីថ្ងៃទី៧ ខែកុម្ភៈ បានថ្កោលទោសចំពោះការគាំទ្ររបស់រវ៉ាន់ដាចំពោះក្រុមប្រដាប់អាវុធ M23 នៅសាធារណរដ្ឋប្រជាធិបតេយ្យកុងហ្គោ និងបានតែងតាំងក្រុមអ្នកជំនាញដើម្បីស៊ើបអង្កេតការរំលោភសិទ្ធិមនុស្សនៅក្នុងតំបន់។ ក្រុមប្រឹក្សាសិទ្ធិមនុស្សអង្គការសហប្រជាជាតិបានទាមទារឱ្យពួកសកម្មប្រយុទ្ធបញ្ឈប់ជាបន្ទាន់នូវអរិភាពទាំងអស់ ហើយដកខ្លួនចេញពីតំបន់កាន់កាប់ ខណៈជំរុញឱ្យពួកគេធានាការទទួលបានជំនួយមនុស្សធម៌ដោយមិនមានការរារាំង៕
