នាព្រឹកថ្ងៃទី ៤ ខែមេសា នៅវិមានប្រធានរដ្ឋ ប្រធានរដ្ឋវៀតណាម លោក លឿង គឿង និងលោកជំទាវភរិយាបានអញ្ជើញជាអធិបតីក្នុងពិធីទទួលបដិសណ្ឋារកិច្ចជាផ្លូវការសម្រាប់ប្រធានាធិបតី នៃសាធារណរដ្ឋប៊ូរុនឌី Évariste Ndayishimiye និងលោកជំទាវភរិយា ក្នុងដំណើរបំពេញទស្សនកិច្ចផ្លូវការនៅវៀតណាម។
ក្នុងកិច្ចពិភាក្សាបន្ទាប់ពីពិធីទទួល លោកប្រធានរដ្ឋ លឿង គឿង និងប្រធានាធិបតី Évariste Ndayishimiye បានវាយតម្លៃថា ប្រទេសទាំងពីរនៅតែមានសក្ដានុពលជាច្រើនក្នុងការបង្កើនទំហំពាណិជ្ជកម្មទ្វេភាគី; ឯក ភាពជំរុញការផ្លាស់ប្តូរព័ត៌មានអំពីតម្រូវការទីផ្សារ ឱកាសវិនិយោគ និងសម្របសម្រួលអាជីវកម្មនៃប្រទេសទាំងពីរក្នុងការតភ្ជាប់ និងសហប្រតិបត្តិការ។ ថ្នាក់ដឹកនាំទាំងពីរបានឯកភាពបន្តផ្តោតលើការជំរុញកិច្ចសហប្រតិបត្តិការលើវិស័យដែលមានប្រៀបខ្លាំង និងមានផលប្រយោជន៍ទៅវិញទៅមក ជាពិសេសវិស័យកសិកម្ម។
ក្នុងឱកាសនេះ ប្រធានរដ្ឋលោកលឿងគឿងសង្ឃឹមថា ប្រធានាធិបតីប៊ូរុនឌី នឹងបន្តយកចិត្តទុកដាក់ និងបង្កើតលក្ខខណ្ឌអំណោយផលសម្រាប់ក្រុមហ៊ុនបណ្តាក់ទុនរួមទូរគមនាគមន៍ Viettel គ្រុប នៅប៊ូរុនឌី និងសហគ្រាសវៀតណាម ធ្វើអាជីវកម្មប្រកបដោយស្ថិរភាព និងយូរអង្វែងនៅ ប៊ូរុនឌី។ ស្តីពីបញ្ហាអន្តរជាតិ និងតំបន់ដែលមានការយកចិត្តទុកដាក់ទៅវិញទៅមក ថ្នាក់ដឹកនាំទាំងពីរបានឯកភាពពង្រឹងការសម្របសម្រួល កិច្ចសហប្រតិបត្តិការ និងការឧបត្ថម្ភគ្នាទៅវិញទៅមកនៅអង្គការអន្តរជាតិ វេទិកាពហុភាគី និងអន្តរតំបន់។ ប្រធានាធិបតីប៊ូរុនឌីបានសម្តែងនូវការត្រៀមជាស្រេចក្នុងការដើរតួជាស្ពានមួយ និងគាំទ្រវៀតណាមក្នុងការពង្រឹងកិច្ចសហប្រតិបត្តិការជាមួយសហភាពអាហ្វ្រិក និងបង្កើតទំនាក់ទំនងជាមួយសហគមន៍អាហ្វ្រិកខាងកើត។
បន្ទាប់ពីកិច្ចពិភាក្សា លោកប្រធានរដ្ឋ លឿង គឿង និងលោកប្រធានាធិបតី Évariste Ndayishimiye បានធ្វើជាសាក្សីក្នុងពិធីចុះហត្ថលេខាលើឯកសារកិច្ចសហប្រតិបត្តិការចំនួនពីរ រួមមាន៖ កិច្ចព្រមព្រៀងក្របខ័ណ្ឌស្តីពីកិច្ចសហប្រតិបត្តិការរវាងរដ្ឋាភិបាលទាំងពីរ និងអនុស្សរណៈនៃការយោគយល់គ្នាស្តីពីការបង្កើតយន្តការពិគ្រោះយោបល់ផ្នែកនយោបាយ និងការទូត៕
