នាយករដ្ឋមន្ត្រីថៃ លោកស្រី Paetongtarn Shinawatra ថតរូបជាមួយរដ្ឋមន្ត្រីអាស៊ាន ស្តីពីវិស័យឌីជីថល។ រូបភាព៖ ខុទ្ទកាល័យនាយករដ្ឋមន្ត្រីថៃ

ដោយប្រធានបទ “សុវត្ថិភាព ច្នៃប្រឌិត ទូលំទូលាយ៖ បង្កើតអនាគតឌីជីថលរបស់អាស៊ាន” កិច្ចប្រជុំនេះបានប្រព្រឹត្តទៅក្នុងរយៈពេល ២ ថ្ងៃ គឺថ្ងៃទី១៦ និង ១៧ខែមករា នៅទីក្រុងបាងកក ប្រទេសថៃ ដែលឆ្លុះបញ្ចាំងពីការសន្យារបស់សមាគមប្រជាជាតិអាស៊ីអាគ្នេយ៍ (អាស៊ាន) ក្នុងការកសាងបរិយាកាសឌីជីថលប្រកបដោយសុវត្ថិភាព។ ប្រការនេះរួមបញ្ចូលទាំងការឆ្លើយតបដោយទាន់ពេលវេលា ចំពោះការគំរាមកំហែងតាមអ៊ីនធឺណិត និងបទល្មើសតាមអ៊ីនធឺណិត អភិវឌ្ឍន៍គំនិតផ្ដួចផ្ដើម និងបច្ចេកវិទ្យាថ្មីៗ ធានាឱ្យមានការចូលប្រើប្រាស់បច្ចេកវិទ្យាដោយសមភាព។ កិច្ចប្រជុំបានពិភាក្សាអំពីក្របខណ្ឌកិច្ចសហប្រតិបត្តិការផ្សេងៗ រួមទាំងសន្តិសុខតាមអ៊ីនធឺណិត ការផ្លាស់ប្តូរទិន្នន័យឆ្លងដែន និងការអភិវឌ្ឍរួមនៃសេដ្ឋកិច្ចឌីជីថល។

គណៈប្រតិភូក៏បានគាំទ្រសេចក្តីប្រកាសឌីជីថលទីក្រុងបាងកក ជាឯកសារណែនាំអំពីរបៀបដែលសមាជិកអាស៊ានអាចនិងគួរតែធ្វើការកាន់តែជិតស្និទ្ធជាមួយគ្នាក្នុងការទប់ស្កាត់និងដោះស្រាយបទល្មើសតាមអ៊ីនធឺណិត៕