ក្នុងក្របខ័ណ្ឌនៃពិធីបុណ្យវប្បធម៌ពិភពលោកលើកទីពីរនៅទីក្រុងហាណូយ - ឆ្នាំ២០២៦ កាលពីយប់ថ្ងៃទី៣ ខែតុលា ពិធីបុណ្យតាមដងផ្លូវ «ពណ៌នៃទ្វីបទាំងប្រាំ» បានប្រារព្ធធ្វើឡើងនៅក្នុងតំបន់ដើរថ្មើរជើងជុំវិញបឹងហ័នគៀម។
ដោយមានប្រធានបទ «ប្រមូលផ្តុំបេតិកភណ្ឌ - កសាងអនាគត» ពិធីបុណ្យ «ពណ៌នៃទ្វីបទាំងប្រាំ» ត្រូវបានរចនាឡើងជាកន្លែងផ្លាស់ប្តូរវប្បធម៌ដ៏បើកចំហ និងរស់រវើក។ តាមរយៈអាវផាយ សិល្បៈសម្តែង និងសកម្មភាពតាមដងផ្លូវ កម្មវិធីនេះបានឧទ្ទេសនាមតម្លៃពិសេសនៃវប្បធម៌វៀតណាម ព្រមទាំង បង្កើតឱកាសសម្រាប់ប្រទេសនានា ចែករំលែក ផ្លាស់ប្តូរ និងលើកតម្កើងលក្ខណៈវប្បធម៌ពិសេស នៃប្រទេសនីមួយៗ។
នៅក្នុងពិធីនេះ លោក Pham Tuan Long នាយកនៃមន្ទីរវប្បធម៌ កីឡា និងទេសចរណ៍ទីក្រុងហាណូយ បានសង្កត់ធ្ងន់ថា ក្រុមសិល្បៈ សិល្បករ និងសិប្បករមកពី ប្រទេសចំនួន ១៨ បានបង្កើតការជួបជុំវប្បធម៌អន្តរជាតិដ៏រស់រវើក បើកចំហ និងសម្បូរទៅដោយចំណាប់អារម្មណ៍។ នៅក្នុងដំណើរសមាហរណកម្មរបស់ខ្លួន ទីក្រុងហាណូយជានិច្ចកាលឱ្យតម្លៃវប្បធម៌ជាស្ពានដែលមាននិរន្តរភាពបំផុត ដើម្បីនាំមនុស្សឱ្យកាន់តែជិតស្និទ្ធគ្នា។ យោងតាមលោក Pham Tuan Long សិល្បៈត្រូវបាននាំយកចេញពីឆាក លាយឡំទៅក្នុងជីវភាពរស់នៅរបស់ប្រជាជន និងអ្នកទេសចរ ដោយក្លាយជាផ្នែកមួយនៃពិធីបុណ្យ។ នេះក៏ជារបៀបដែលទីក្រុងហាណូយពង្រីកតម្លៃនៃកេរ្តិ៍ដំណែលជាតិពិសេស បឹងហ័នគៀម ដែលជានិមិត្តរូបប្រវត្តិសាស្ត្រ និងវប្បធម៌របស់រដ្ឋធានីផងដែរ៕
