អញ្ជើញចូលរួមពិធីនេះមានវត្តមាន អតីតថ្នាក់ដឹកនាំនៃបក្ស និងរដ្ឋ ជនបដិវត្តន៍ជើងចាស់ វីរបុរសនៃកងកម្លាំងប្រដាប់អាវុធប្រជាជន វីរបុរសពលកម្ម តំណាងបញ្ញវន្ត អ្នកប្រាជ្ញ មន្ត្រីសាសនា ជនជាតិភាគតិចគំរូ ប្រធានបេសកកម្មការទូត និងអង្គការអន្តរជាតិនៅទីក្រុងហាណូយ។

ចាប់ផ្ដើមសុន្ទរកថានៅក្នុងពិធីអបអរសាទរខួប លោកអគ្គលេខាបក្ស ប្រធានរដ្ឋ តូ ឡឹម បានសង្កត់ធ្ងន់លើសារៈសំខាន់ជាប្រវត្តិសាស្ត្រនៃព្រឹត្តិការណ៍ថ្ងៃទី ២ ខែកញ្ញា ឆ្នាំ ១៩៤៥ ដែលបានផ្តល់កំណើតដល់សាធារណរដ្ឋប្រជាធិបតេយ្យវៀតណាម សព្វថ្ងៃជាសាធារណរដ្ឋសង្គមនិយមវៀតណាម; អះអាងថា ប្រជាជនវៀតណាមទាំងមូលយល់ច្បាស់និងគោរពជាងពេលណាៗទាំងអស់ ចំពោះតម្លៃនៃឯករាជ្យភាព និងសេរីភាព ហើយនឹងចងចាំជារៀងរហូតនូវគុណូបការៈរបស់លោកប្រធានហូជីមិញ ដឹងគុណយ៉ាងជ្រាលជ្រៅចំពោះជនបដិវត្តន៍ជំនាន់មុនៗ វីរបុរស និងយុទ្ធជនពលី ដែលបានប្រយុទ្ធ និងពលីជីវិតយ៉ាងអង់អាចក្លាហានដើម្បីឯករាជ្យភាព អធិបតេយ្យភាព ឯកភាព និងបូរណភាពទឹកដីនៃមាតុភូមិផងដែរ។

លោកអគ្គលេខាបក្ស ប្រធានរដ្ឋ តូ ឡឹម បានសង្កត់ធ្ងន់ថា បន្ទាប់ពីយុគសម័យឯករាជ្យ យុគសម័យឯកភាព និងយុគសម័យផ្លាស់ប្ដូរថ្មី មហាសន្និបាតទូទាំងប្រទេសលើកទី ១៤ របស់បក្សកុម្មុយនិស្តវៀតណាមបានកត់សម្គាល់ជាផ្លូវការនូវយុគសម័យអភិវឌ្ឍន៍ថ្មីរបស់ប្រទេសជាតិ ឆ្ពោះទៅរកការកសាងប្រទេសវៀតណាមដ៏ខ្លាំងមាំមួន និងវិបុលភាព។ ក្នុងយុគសម័យថ្មីនេះ វៀតណាមឲ្យតម្លៃចំពោះការគាំទ្រ ការរួមដំណើរ និងកិច្ចសហប្រតិបត្តិការជិតស្និទ្ធរបស់មិត្តភក្តិ ដៃគូ សហគមន៍ធុរកិច្ច និងវិនិយោគិនបរទេស ព្រមទាំងត្រៀមខ្លួនជាស្រេចដើម្បីរួមដៃគ្នាដោះស្រាយបញ្ហាប្រឈមធំៗរបស់មនុស្សជាតិ រួមចំណែកដល់សន្តិភាព វិបុលភាព និងការអភិវឌ្ឍលើពិភពលោក។ អគ្គលេខាបក្ស ប្រធានរដ្ឋវៀតណាមលោក តូ ឡឹម មានប្រសាសន៍ថា៖

"យើងត្រូវរួមគ្នាដើម្បីដោះស្រាយបញ្ហាប្រឈមជាសកល ហើយនាំបដិវត្តន៍វិទ្យាសាស្ត្រ និងបច្ចេកវិទ្យាក្លាយទៅជាមធ្យោបាយវិជ្ជមាន សម្រាប់បម្រើការអភិវឌ្ឍរបស់មនុស្សជាតិ។ រួមគ្នា - យើងនឹងជំនះលើបញ្ហាប្រឈមទាំងអស់ រួមគ្នា - យើងនឹងអាចកសាងពិភពលោកមួយដែលមានសន្តិភាព ស្ថិរភាព និងការអភិវឌ្ឍប្រកបដោយចីរភាព។ វៀតណាមត្រៀមខ្លួនជាស្រេច ធ្វើជាស្ពានសម្រាប់កិច្ចសហប្រតិបត្តិការ និងកិច្ចសន្ទនា ចូលរួមកាន់តែជាក់ស្តែងក្នុងការដោះស្រាយបញ្ហារួមរបស់សហគមន៍អន្តរជាតិ; គាំទ្រប្រព័ន្ធពហុភាគីប្រកបដោយសមធម៌ និងយុត្តិធម៌ដោយមានអង្គការសហប្រជាជាតិជាមជ្ឈមណ្ឌល។ សម្រាប់យើងខ្ញុំ នេះមិនត្រឹមតែជាការបញ្ជាក់ពីការទទួលខុសត្រូវរបស់វៀតណាមប៉ុណ្ណោះទេ ថែមទាំងក៏ជា ការដឹងគុណយ៉ាងជ្រាលជ្រៅចំពោះការគាំទ្រ ការជួយឧបត្ថម្ភដ៏ស្មោះស្ម័គ្រ ដែលមិត្តភក្តិ និងប្រជាជនជុំវិញពិភពលោកបានផ្តល់ជូនប្រទេសវៀតណាមក្នុងដំណើរកសាង និងការពារប្រទេសជាតិក្នុងរយៈពេលជាង ៨០ ឆ្នាំកន្លងមកនេះផងដែរ”។

ក្នុងនាមគណៈប្រតិភូការទូតដែលបានសម្តែងការអបអរសាទរយ៉ាងកក់ក្តៅនិងស្មោះស្ម័គ្របំផុត លោក​ឯកអគ្គរដ្ឋទូត Raul Pollak Giampietro នៃសាធារណរដ្ឋអ៊ុយរូហ្គាយខាងកើតប្រចាំនៅវៀតណាម បានសង្កត់ធ្ងន់ថា ដោយទទួលមរតកនូវសតិអារម្មណ៍ និងស្មារតីរបស់លោកប្រធានហូជីមិញ ក្នុងរយៈពេល ៨១ ឆ្នាំកន្លងមកនេះ ប្រទេសវៀតណាមបានយកឈ្នះលើការលំបាក និងបញ្ហាប្រឈមរាប់មិនអស់ ដោយឈានឡើងក្លាយជាប្រទេសដ៏រុងរឿង ពោរពេញទៅដោយកម្លាំងរស់ និងភាពស្វាហាប់ ដែលបានរឹតបន្តឹងទំនាក់ទំនងជាមួយសហគមន៍អន្តរជាតិដោយឥតឈប់ឈរ និងអះអាងខ្លួនឯងជាដៃគូដែលអាចទុកចិត្តបាននិងជាមិត្តដ៏ស្មោះស្ម័គ្រមួយរូប៕