ក្នុងកិច្ចសន្ទនាតាមទូរស័ព្ទ លោកនាយករដ្ឋមន្ត្រី ឡេ មិញហ៊ឹង បានបញ្ជាក់ថា វៀតណាមឱ្យតម្លៃចំពោះភាពជាដៃគូយុទ្ធសាស្ត្រវៀតណាម-អាល្លឺម៉ង់ ហើយស្នើឱ្យភាគីទាំងពីរបន្តពង្រីកកិច្ចសហប្រតិបត្តិការគ្រប់ជ្រុងជ្រោយ និងអនុវត្តន៍ជាក់ស្ដែងនូវ ការប្ដេជ្ញាចិត្តធ្វើសកម្មភាព បង្កើនការផ្លាស់ប្តូរគណៈប្រតិភូ ជាពិសេសនៅកម្រិតខ្ពស់ និងលើក្របខ័ណ្ឌទាំងអស់ ពង្រីកប្រសិទ្ធភាពនៃយន្តការសហប្រតិបត្តិការដែលមានស្រាប់ តាមនោះបង្កើតមូលដ្ឋានគ្រឹះអំណោយផលសម្រាប់ពង្រីកកិច្ចសហប្រតិបត្តិការក្នុងវិស័យដែលភាគីទាំងពីរមានការយកចិត្តទុកដាក់ដូចគ្នា។
ទាក់ទងនឹងកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ លោកនាយករដ្ឋមន្ត្រី ឡេ មិញហ៊ឹង បានស្នើឱ្យភាគីទាំងពីរបង្កើតរបកគំហើញថ្មី ឲ្យស័ក្តសមនឹងសក្តានុពល និងកម្រិតនៃទំនាក់ទំនង ដោយឆ្ពោះទៅរកគោលដៅនាំទំហំពាណិជ្ជកម្មទ្វេភាគីឱ្យឡើងដល់ ២០ ពាន់លានដុល្លារអាមេរិកក្នុងពេលឆាប់ៗនេះ។ លោកនាយករដ្ឋមន្ត្រីបានលើកទឹកចិត្តដល់សហគ្រាសអាល្លឺម៉ង់ឱ្យពង្រីកការវិនិយោគលើវិស័យដែលមានភាពប្រៀបខ្លាំង ដូចជា៖ មេកានិច ឧស្សាហកម្មរថយន្ត សុខាភិបាល និងការផ្លាស់ប្ដូរថាមពល ហើយបង្កើនការតភ្ជាប់រវាងទីផ្សារហិរញ្ញវត្ថុ និងមូលបត្រនៃប្រទេសទាំងពីរផងដែរ។
ដោយវាយតម្លៃខ្ពស់ចំពោះការដែល អាល្លឺម៉ង់ បានបញ្ចប់ការផ្តល់សច្ចាប័នលើកិច្ចព្រមព្រៀងការពារវិនិយោគវៀតណាម-សហភាពអឺរ៉ុប (EVIPA) លោកនាយករដ្ឋមន្ត្រីបានស្នើឱ្យអាល្លឺម៉ង់បន្តពង្រីកតួនាទី ក្នុងការជំរុញប្រទេសជាសមាជិកសហភាពអឺរ៉ុបដែលនៅសល់ឱ្យបញ្ចប់ការផ្តល់សច្ចាប័នលើកិច្ចព្រមព្រៀងនេះក្នុងពេលឆាប់ៗនេះ ព្រមទាំងគាំទ្រគណៈកម្មការអឺរ៉ុបដកកាតលឿង IUU លើជលផលវៀតណាម ឱ្យបានឆាប់។
រីឯខ្លួនវិញ អធិការបតីអាល្លឺម៉ង់លោក ហ្វ្រីឌ្រីក មឺស បានបញ្ជាក់ថា ទំនាក់ទំនងវៀតណាម-អាល្លឺម៉ង់កំពុងអភិវឌ្ឍន៍យ៉ាងល្អប្រសើរ និងមានមូលដ្ឋានគ្រឹះ និងសក្តានុពលគ្រប់គ្រាន់សម្រាប់លើកកម្ពស់ដល់កម្រិតថ្មីមួយ។ លោកអធិការបតី មឺស បានយល់ព្រមពង្រឹងកិច្ចសហប្រតិបត្តិការក្នុងវិស័យដឹកជញ្ជូន ភស្តុភារកម្ម ការតភ្ជាប់ផ្លូវអាកាស ការផ្លាស់ប្តូរបៃតង និងការឆ្លើយតបទៅនឹងការប្រែប្រួលអាកាសធាតុ អនុវត្តន៍ប្រកបដោយប្រសិទ្ធភាពនូវក្របខ័ណ្ឌភាពជាដៃគូថាមពលវៀតណាម-អាល្លឺម៉ង់ នាំឱ្យវិទ្យាសាស្ត្រ បច្ចេកវិទ្យា និងនវានុវត្តន៍ក្លាយជាសសរស្តម្ភដ៏សំខាន់មួយនៃទំនាក់ទំនងទ្វេភាគីនាពេលខាងមុខ ព្រមទាំងជំរុញគម្រោងស្រាវជ្រាវរួមគ្នា ពង្រីកកិច្ចសហប្រតិបត្តិការក្នុងការបណ្តុះបណ្តាលអ្នកជំនាញ និងវិស្វករក្នុងវិស័យបច្ចេកវិទ្យាយុទ្ធសាស្ត្រនានាផងដែរ៕
