អញ្ជើញថ្លែងមតិក្នុងសន្និសីទសារព័ត៌មាន អនុរដ្ឋមន្ត្រីអចិន្ត្រៃយ៍ក្រសួងវប្បធម៌ កីឡា និងទេសចរណ៍ លោក Le Hai Binh បានសង្កត់ធ្ងន់ថា ខួបលើកទី ៥០ នៃទិវារំដោះភាគខាងត្បូង បង្រួបបង្រួមប្រទេសជាតិ គឺជាទំព័រដ៏រុងរឿងបំផុតក្នុងប្រវត្តិសាស្ត្ររបស់ប្រទេសជាតិ។ ក្រសួងវប្បធម៌ កីឡា និងទេសចរណ៍ ប្តេជ្ញាបង្កលក្ខណៈងាយស្រួលបំផុត សម្រាប់អ្នកសារព័ត៌មាន ទាំងជាតិនិងអន្តរជាតិ បំពេញការងារនិងផ្សព្វផ្សាយប្រកបដោយប្រសិទ្ធ ភាព ជាក់ស្តែង រួមចំណែកផ្សព្វផ្សាយនូវបរិយាកាសវីរភាព និងគួរជាទីមោទនៈនៃព្រឹត្តិការណ៍ដ៏ឧត្តុងឧត្តមនេះ។
ចំណែកឯក្រសួងការបរទេស អនុរដ្ឋមន្ត្រី លោកស្រី Le Thi Thu Hang បានឲ្យដឹងថា រហូតមកដល់ពេលនេះ មានគណៈប្រតិភូបរទេសជាង២០ក្រុមបានបញ្ជាក់ពីការចូលរួមរបស់ខ្លួនក្នុងកម្រិតជាច្រើន។ ចំណុចពិសេសក្នុងកម្មវិធីដង្ហែរក្បួនឆ្នាំនេះ គឺការបង្ហាញខ្លួនជាលើកដំបូងនៃក្បួនដង្ហែរបស់ជនជាតិវៀតណាមនៅបរទេស។ តាមនោះ គណៈប្រតិភូវៀតណាមនៅឯបរទេសប្រមាណ ១២០ នាក់មកពី ២៥ ប្រទេស និងដែនដីនឹងចូលរួមនៅក្នុងក្បួនដង្ហែនេះ។
ទាក់ទិននឹងសកម្មភាពរំលឹកខួបនេះ លោកស្រី Tran Thi Dieu Thuy អនុប្រធានគណៈកម្មាធិការប្រជាជនទីក្រុងហូជីមិញ បានឲ្យដឹងថា កម្មវិធីអបអរសាទរខួបអនុស្សាវរីយ៍ថ្នាក់ជាតិនឹងប្រារព្ធឡើងទៅនៅម៉ោង ៦៖៣០នាទីព្រឹក ថ្ងៃទី៣០ ខែមេសា នៅផ្លូវ Le Duan ខណ្ឌ១ និងផ្លូវ មួយចំនួននៃទីក្រុងហូជីមិញ៕
