នៅក្នុងជំនួបនេះ លោកអគ្គលេខាបក្ស ប្រធានរដ្ឋ តូ ឡឹម បានបញ្ជាក់ថា សហរដ្ឋអាមេរិកគឺជាដៃគូមួយក្នុងចំណោមដៃគូយុទ្ធសាស្ត្រឈានមុខគេរបស់វៀតណាម។ លោកក៏បានសម្តែងបំណងចង់ភាគីទាំងពីរជំរុញពាណិជ្ជកម្មតាមទិសដៅតុល្យភាព ស្ថិរភាពនិងប្រកបដោយចីរភាព សម្រេចបញ្ហាដែលនៅសេសសល់ក្នុងការចរចា ឈានទៅ ការចុះហត្ថលេខាលើកិច្ចព្រមព្រៀងពាណិជ្ជកម្មបដិកា ដោយបង្កើតលក្ខខណ្ឌអំណោយផលសម្រាប់សហគ្រាសនៃប្រទេសទាំងពីរ។ លោកអគ្គលេខាបក្ស ប្រធានរដ្ឋ តូ ឡឹម បានស្នើឱ្យសហរដ្ឋអាមេរិកពង្រឹងកិច្ចសហប្រតិបត្តិការជាមួយវៀតណាមក្នុងវិស័យវិទ្យាសាស្ត្រ បច្ចេកវិទ្យា នវានុវត្តន៍ បច្ចេកវិទ្យាខ្ពស់ សឺម៉ីកុងឌុចទ័រ ថាមពលនិងខ្សែសង្វាក់ផ្គត់ផ្គង់; បន្តអនុវត្តកិច្ចព្រមព្រៀងស្តីពីកិច្ចសហប្រតិបត្តិការការពារជាតិនិងសន្តិសុខប្រកបដោយប្រសិទ្ធភាព ស្របតាមក្របខ័ណ្ឌនៃភាពជាដៃគូយុទ្ធសាស្ត្រគ្រប់ជ្រុងជ្រោយ ដោយដោះស្រាយផលវិបាកនៃសង្គ្រាមជាអាទិភាពចម្បង។
រីឯខ្លួនវិញ រដ្ឋមន្ត្រីស្តីទីនៃកងទ័ពជើងទឹកអាមេរិក លោក ហ៊ុង កៅ បានបញ្ជាក់ថា សហរដ្ឋអាមេរិកគាំទ្រប្រទេសវៀតណាមដ៏រឹងមាំ ឯករាជ្យ ខ្លួនទីពឹងខ្លួន និងវិបុលភាព ដោយដើរតួនាទីយ៉ាងសំខាន់នៅក្នុងតំបន់។ លោកបានចាត់ទុកថា សក្តានុពលសម្រាប់កិច្ចសហប្រតិបត្តិការរវាងប្រទេសទាំងពីរក្នុងវិស័យសេដ្ឋកិច្ច ពាណិជ្ជកម្ម វិទ្យាសាស្ត្រ បច្ចេកវិទ្យា ការពារជាតិ និងសន្តិសុខគឺធំធេងណាស់; ហើយបានសម្តែងបំណងចង់ពង្រីកកិច្ចសហប្រតិបត្តិការបន្ថែមទៀតក្នុងវិស័យសន្តិសុខនាវាចរណ៍ ការកសាងសមត្ថភាព ជំនួយមនុស្សធម៌ និងការឆ្លើយតបនឹងគ្រោះមហន្តរាយ៕
