បន្ទាប់ពីបញ្ចប់សកម្មភាពនានាក្នុងក្របខ័ណ្ឌនៃដំណើរទស្សនកិច្ច និងចូលរួមសម័យពិភាក្សាកម្រិតខ្ពស់របស់មហាសន្និបាត
អង្គការសហប្រជាជាតិនីតិកាលទី ៨១ និងសកម្មភាពទ្វេភាគីនៅសហរដ្ឋអាមេរិក នាយប់ថ្ងៃទី ២៣ ខែកញ្ញា (ម៉ោងក្នុងស្រុក) លោកអគ្គលេខាបក្ស ប្រធានរដ្ឋ តូ ឡឹម និងគណៈប្រតិភូជាន់ខ្ពស់វៀតណាមបានទៅដល់អាកាសយានដ្ឋានអន្តរជាតិ McDonald-Cartier ក្នុងទីក្រុង Ottawa ដោយចាប់ផ្តើមដំណើរទស្សនកិច្ចផ្លូវរដ្ឋនៅប្រទេសកាណាដា តបតាមការអញ្ជើញរបស់អគ្គទេសាភិបាលកាណាដា លោកស្រី Louise Arbour។
ដំណើរទស្សនកិច្ចផ្លូវរដ្ឋរបស់លោកអគ្គលេខាបក្ស ប្រធានរដ្ឋវៀតណាម តូ ឡឹម ទៅកាន់ប្រទេសកាណាដា មានអត្ថន័យជាប្រវត្តិសាស្ត្រ ជាលើកដំបូងដែលប្រមុខបក្សកុម្មុយនិស្តវៀតណាម បំពេញទស្សនកិច្ចជាផ្លូវការនៅកាណាដា ចាប់តាំងពីប្រទេសទាំងពីរបានបង្កើតទំនាក់ទំនងការទូតនៅឆ្នាំ ១៩៧៣មក។ ដំណើរទស្សនកិច្ចនេះ ក៏ប្រព្រឹត្តទៅចំពេលដែលទំនាក់ទំនងវៀតណាម-កាណាដា កំពុងមានលក្ខខណ្ឌអំណោយផលជាច្រើន ដើម្បីឈានចូលដំណាក់កាលថ្មីនៃកិច្ចសហប្រតិបត្តិការកាន់តែស៊ីជម្រៅ និងជាក់ស្តែង។
ដោយឈរលើមូលដ្ឋាននៃទំនាក់ទំនងទ្វេភាគីដ៏ល្អឥតខ្ចោះ និងសមិទ្ធផលដ៏ធំធេងក្នុងវិស័យសហប្រតិបត្តិការផ្សេងៗ ដំណើរទស្សនកិច្ចលើកនេះរបស់លោកអគ្គលេខាបក្ស ប្រធានរដ្ឋនឹងបង្កើតកម្លាំងចលករដ៏ខ្លាំងក្លា ដែលនាំទំនាក់ទំនងវៀតណាម-កាណាដា អភិវឌ្ឍន៍កាន់តែជាក់ស្តែង មានតុល្យភាព និងមានប្រសិទ្ធភាព ស្របតាមសក្តានុពល ចំណុចខ្លាំង និងតម្រូវការរបស់ប្រទេសទាំងពីរ។ ដំណើរទស្សនកិច្ចនេះ ក៏បើកចេញដំណាក់កាលថ្មីនៃការអភិវឌ្ឍជាយុទ្ធសាស្ត្រ និងទូលំទូលាយរវាងប្រទេសទាំងពីរ ដោយរួមចំណែកជាវិជ្ជមានដល់សន្តិភាព និងស្ថិរភាពនៅក្នុងតំបន់និងពិភពលោក៕
