ການເຈລະຈາລະຫວ່າງ 2 ຝ່າຍ
ໃນການຢ້ຽມຢາມ, ເຮັດວຽກຢູ່ ອາເມລິກາ ແຕ່ວັນທີ 20 – 23/3, ທ່ານ ຮ່າກິມງອກ, ຮອງລັດຖະມົນຕີການຕ່າງປະເທດ ຫວຽດນາມ ມີການພົບປະສຳຄັນກັບບັນດາເຈົ້າໜ້າທີ່ຂັ້ນສູງຂອງ ອາເມລິກາ. ທີ່ການພົບປະ, ທ່ານຮອງລັດຖະມົນຕີ ຮ່າກິມງອກ ເນັ້ນໜັກວ່າ: ຫວຽດນາມ ຖືເປັນສຳຄັນ ແລະ ພ້ອມແລ້ວທີ່ຈະເຮັດວຽກກັບອຳນາດການປົກຄອງໃໝ່ຂອງ ອາເມລິກາ ເພື່ອແນໃສ່ປັບປຸງ ແລະ ເຮັດໃຫ້ການພົວພັນຄູ່ຮ່ວມມືຮອບດ້ານລະຫວ່າງ 2 ປະເທດເລິກເຊິ່ງຂຶ້ນຕື່ມ; ແລກປ່ຽນບັນດາມາດຕະການຊຸກຍູ້ການພົວພັນ 2 ຝ່າຍໃນປີ 2017, ໃນນັ້ນມີການແລກປ່ຽນຄະນະຜູ້ແທນທຸກຂັ້ນ. ທ່ານຮອງລັດຖະມົນຕີ ກໍ່ຖືວ່າ 2 ຝ່າຍຄວນຮັກສາທ່າພັດທະນາຂອງການພົວພັນເສດຖະກິດ - ການຄ້າ - ຈຸດສຸມ ແລະ ກຳລັງໜູນຂອງການພົວພັນ 2 ຝ່າຍ, ເພີ່ມທະວີການຮ່ວມມືກ່ຽວກັບການສຶກສາ - ບຳລຸງສ້າງ, ວິທະຍາສາດ - ເຕັກໂນໂລຢີ, ປ້ອງກັນຊາດ - ປ້ອງກັນຄວາມສະຫງົບ, ແກ້ໄຂຜົນຮ້າຍຢ້ອນຫຼັງຈາກສົງຄາມ, ມະນຸດສະທຳ. ສ່ວນບັນດາເຈົ້າໜ້າທີ່ ອາເມລິກາ ໄດ້ ຢືນຢັນຄືນແຜນນະໂຍບາຍທີ່ທັງພັກປະຊາທິປະໄຕ ແລະ ພັກສາທາລະນະ ສະໜັບສະໜູນຄືນໃໝ່ນັ້ນແມ່ນຖືການພົວພັນຄູ່ຮ່ວມມືຮອບດ້ານກັບ ຫວຽດນາມ ເປັນສຳຄັນ, ພ້ອມທັງເຫັນດີວ່າ 2 ຝ່າຍຄວນເພີ່ມທະວີການແລກປ່ຽນຄະນະຜູ້ແທນທຸກຂັ້ນເພື່ອຊຸກຍູ້ບັນດາຂົງເຂດການຮ່ວມມືທີ່ມີຄວາມສາມາດບົ່ມຊ້ອນຫຼາຍຢ່າງ, ໃນນັ້ນມີກົນໄກ TIFA (ສັນຍາແມ່ກ່ຽວກັບການຄ້າ ແລະ ການລົງທຶນລະຫວ່າງ ຫວຽດນາມ ແລະ ອາເມລິກາ). 2 ຝ່າຍກໍ່ໄດ້ແລກປ່ຽນກ່ຽວກັບບາງການຜັນແປຢູ່ພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນມີບັນຫາລັດທິກໍ່ການຮ້າຍ, ອາດຊະຍາກຳແບບໃໝ່, ສະພາບການຢູ່ທະເລຕາເວັນອອກ, ທະເລຮວາຕູງ.
(ແຫຼ່ງຄັດຈາກ VOV)
