ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ
ພົບປະເຈລະຈາກັບປະທານາທິບໍດີຢູແກຼນ Petro Poroshenco
(ພາບ: TTXVN)
ທີ່ກອງປະຊຸມປະຈຳປີເວທີປາໄສເສດຖະກິດໂລກ (WEF) ຢູ່ Davos, ປະເທດສະວິດ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ເຂົ້າຮ່ວມວາລະປະຊຸມຂອງກອງປະຊຸມກ່ຽວກັບ “ການບໍລິຫານຢ່າງເຂັ້ມແຂງໃນການປະຕິວັດອຸດສາຫະກຳຄັ້ງທີ 4”; ພົບປະເຈລະຈາກັບປະທານາທິບໍດີຢູແກຼນ Petro Poroshenco; ຕ້ອນຮັບປະທານທະນາຄານ Standard Chartered ແລະ ຜູ້ອຳນວຍການໃຫຍ່ບໍລິຫານກຸ່ມບໍລິສັດ Facebook; ຕ້ອນຮັບປະທານຜູ້ຮັບຜິດຊອບການຄ້າໂທລະພາບ CNN.ພົບປະເຈລະຈາກັບປະທານາທິບໍດີຢູແກຼນ Petro Poroshenco
(ພາບ: TTXVN)
ທີ່ກອງປະຊຸມ “ການບໍລິຫານຢ່າງເຂັ້ມແຂງໃນການປະຕິວັດອຸດສາຫະກຳຄັ້ງທີ 4”, ທ່ານນາຍົກລັດຖະມົນຕີ ຫງວຽນຊວນຟຸກ ຖືວ່າ, ບັນດາລັດຖະບານຕ້ອງມານະພະຍາຍາມກ່ວາອີກເພື່ອສ້າງສຳເລັດລະບອບລະບຽບການ, ຂ້ໍກຳນົດ ແລະ ນະໂຍບາຍ ເພື່ອຕອບສະໜອງບັນດາຄວາມຮຽກຮ້ອງທີ່ໄດ້ວາງອອກ ຍ້ອນການປະຕິວັດອຸດສາຫະກຳ ຄັ້ງທີ 4. ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ, ຫວຽດນາມ ພວມຕັ້ງໜ້າຜັນຂະຫຍາຍນະໂຍບາຍສົ່ງເສີມການເລີ່ມທຸລະກິດ, ປ່ຽນໃໝ່ຢ່າງມີຫົວຄິດປະດິດສ້າງ, ລົບລ້າງຮົ້ວກີດຂວາງ, ຍູ້ແຮງການນຳໃຊ້ເຕັກໂນໂລຊີຂໍ້ມູນຂ່າວສານ, ກໍ່ສ້າງລັດຖະບານເອເລັກໂຕນິກ.
ທີ່ການພົບປະເຈລະຈາກັບທ່ານປະທານາທິບໍດີຢູແກຼນ Petro Poroshenco, ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີໃຫ້ 2 ປະເທດເພີ່ມທະວີການຮ່ວມມືດ້ານເສດຖະກິດ, ການຄ້າ, ການສຶກສາ, ບຳລຸງສ້າງ… ທ່ານນາຍົກລັດຖະມົນຕີ ກໍປາດຖະໜາວ່າ ຢູແກຼນ ສືບຕໍ່ສ້າງເງື່ອນໄຂສະດວກໃຫ້ປະຊາຄົມຊາວຫວຽດນາມ ທີ່ດຳລົງຊີວິດ, ທຳມາຫາກິນ ແລະ ຮໍ່າຮຽນຢ່າງຍາວນານຢູ່ຢູແກຼນ, ຕັ້ງໜ້າປະກອບສ່ວນເຂົ້າໃນການປັບປຸງ ແລະ ພັດທະນາການພົວພັນລະຫວ່າງ 2 ປະເທດ. ສ່ວນທ່ານປະທານາທິບໍດີ Petro Poroshenco ເນັ້ນໜັກວ່າ, ຢູແກຼນ ພ້ອມແລ້ວທີ່ຈະຊຸກຍູ້ການຮ່ວມມືກ່ຽວກັບບັນດາຂົງເຂດຄື: ເສດຖະກິດ, ການຄ້າ, ການທ່ອງທ່ຽວ, ການປ້ອງກັນຊາດປ້ອງກັນຄວາມສະຫງົບ.
ທີ່ການຕ້ອນຮັບທ່ານປະທານທະນາຄານ Standard Chartered, Jose Vinals, ທ່ານນາຍົກລັດຖະມົນຕີ ສະເໜີໃຫ້ Standard Chartered ແບ່ງປັນບົດຮຽນ ແລະ ໜູນຊ່ວຍບັນດາທະນາຄານການຄ້າຂອງຫວຽດນາມ ທີ່ເຄື່ອນໄຫວຢູ່ບັນດາຕະຫຼາດສາກົນ.
ເມື່ອແລກປ່ຽນກັບຜູ້ອຳນວຍການບໍລິຫານຂອງ Facebook, Sheryl Sandberg, ທ່ານນາຍົກລັດຖະມົນຕີ ສະເໜີໃຫ້ Facebook ເພີ່ມທະວີການພັດທະນາຂະແໜງເຕັກໂນໂລຊີຂໍ້ມູນຂ່າວສານຢູ່ຫວຽດນາມ; ເຊີນກຸ່ມບໍລິສັດ Facebook ເຂົ້າຮ່ວມກອງປະຊຸມສຸດຍອດວິສາຫະກິດ APEC ໃນເດືອນ 11/2017.
ທີ່ການຕ້ອນຮັບປະທານຜູ້ຮັບຜິດຊອບດ້ານການຄ້າໂທລະພາບ CNN ສາກົນ, Raini R.Raad, ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ, ແນ່ນອນວ່າ, ຫວຽດນາມ ຈະແມ່ນຈຸດນັດພົບທີ່ດູດດື່ມສຳລັບບັນດາອົງການສື່ມວນຊົນຕ່າງປະເທດ ຍ້ອນຫວຽດນາມມີປະຫວັດສາດ ແລະ ພື້ນຖານວັດທະນະທຳທີ່ມີມາແຕ່ດົນນານ, ແມ່ນປະເທດພວມພັດທະນາຢ່າງຂະຫຍັນຂັນເຄື່ອນ, ຈຸດນັດພົບຂອງບັນດານັກລົງທຶນ, ດຳເນີນທຸລະກິດ. ພິເສດ, ໃນປີ 2017, CNN ກໍຄືບັນດາອົງການສື່ມວນຊົນສາກົນອື່ນ ໄດ້ຮັບເຊີນມາຫວຽດນາມ ເພື່ອໃຫ້ຂ່າວ, ປະຕິບັດບັນດາສາລະຄະດີ ກ່ຽວກັບບັນດາການເຄື່ອນໄຫວສຳຄັນໃນປີດຳເນີນກອງປະຊຸມ APEC ຫວຽດນາມ 2017.
(ແຫຼ່ງຄັດຈາກ VOV)
