ກ່າວຄຳເຫັນທີ່ກອງປະຊຸມ, ທ່ານ ໂດ໋ວັນຈຽນ, ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ໄດ້ເນັ້ນຫນັກວ່າ: ໃນປີ 2021 ໂລກລະບາດໂຄວິດ 19 ໄດ້ແຜ່ລະບາດຢ່າງແຮງ, ສົ່ງຜົນກະທົບເຖິງຫລາຍດ້ານຂອງຊີວິດສັງຄົມ. ເຖິງຢ່າງໃດກໍຕາມ, ດ້ວຍຈິດໃຈສາມັກຄີ, ແກ້ໄຂທຸກຄວາມຫຍຸ້ງຍາກ, ມານະພະຍາຍາມສູ້ຊົນ, ວຽກງານແນວໂຮມ ແຕ່ສູນກາງລົງຮອດທ້ອງຖິ່ນ, ຮາກຖານ ໄດ້ປະຕິບັດສຳເລັດໂດຍພື້ນຖານ, ຕາມແຜນການທີ່ໄດ້ວາງອອກ.
ທ່ານ ໂດ໊ວັນຈ໊ຽນ ຊີ້ແຈ້ງວ່າ ໃນປີ 2022, ແນວໂຮມປະເທດຊາດ ຫວຽດນາມ ປະຕິບັດໂຄງການດຳເນີນງານຂອງທັງອາຍຸການ ໂດຍ ຄະນະກຳມະການສູນກາງແນວໂຮມ ປະເທດຊາດ ຫວຽດນາມ ຮັບຮອງເອົາ. ໄປຄຽງຄູ່ກັນນັ້ນ, ແນວໂຮມປະເທດຊາດ ຫວຽດນາມທຸກຂັ້ນ ຄວນສືບຕໍ່ໂຄສະນາເຜີຍແຜ່, ຂົນຂວາຍພໍ່ແມ່ປະຊາຊົນທຸກຊັ້ນວັນນະປະຕິບັດການຮັບມືກັບໂລກລະບາດຢ່າງປອດໄພ, ຄ່ອງຕົວ, ມີໄຫວພິບ, ຄວບຄຸມໂລກລະບາດໂຄວິດ - 19 ຢ່າງມີປະສິດທິຜົນ; ຍູ້ແຮງຂະບວນການແຂ່ງຂັນຟື້ນຟູພັດທະນາເສດຖະກິດ; ລວບລວມຄຳເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງ ແລະ ປະຊາຊົນຢ່າງທັນການ ເພື່ອສະເໜີຕໍ່ພັກ, ລັດ; ເພີ່ມທະວີວຽກງານສົມທົບ, ເຫັນດີເປັນເອກະພາບຕໍ່ການເຄື່ອນໄຫວກັບບັນດາອົງການຈັດຕັ້ງການເມືອງ - ສັງຄົມ ແລະ ບັນດາອົງການສະມາຊິກຂອງແນວໂຮມປະເທດຊາດ ຫວຽດນາມ ເພື່ອສ້າງກຳລັງແຮງສັງລວມຂອງລະບົບແນວໂຮມແຕ່ຂັ້ນສູນກາງລົງຮອດຮາກຖານ.
(ແຫຼ່ງຄັດຈາກ VOV)
