ລັກສະນະຢຶດໝັ້ນ ແລະ ສະເໝີຕົ້ນສະເໝີປາຍຂອງ ຫວຽດນາມ ໃນການຜັນຂະຫຍາຍແນວທາງການຕ່າງປະເທດ, ກໍຄືເລື່ອງ ຫວຽດນາມ ຫັນວິໄສທັດສຳລັບບັນດາບັນຫາພາກພື້ນ ແລະ ສາກົນ ໃຫ້ປະກົດຜົນເປັນຈິງ, ພວມໄດ້ຮັບການຕີລາຄາສູງຈາກປະຊາຄົມສາກົນ ແລະ ໄດ້ຮັບຖືວ່າ ແມ່ນແຫຼ່ງປຽບທຽບທີ່ໜ້າສົນໃຈໃນການສຳຜັດ, ແກ້ໄຂບັນດາສິ່ງທ້າທາຍໃນປັດຈຸບັນ. ນີ້ແມ່ນການຕີລາຄາຂອງທ່ານ ສາດສະດາຈານ ຫວູມິງເຄືອງ ຂຶ້ນກັບໂຮງຮຽນ ນະໂຍບາຍສາທາລະນະ ຫຼີກວນຢູ (ມະຫາວິທະຍາໄລແຫ່ງຊາດ ສິງກະໂປ) ແລະ ທ່ານ ປອ. Mohamed Effendy B Abdul Hamid, ອາຈານອາວຸໂສຂອງມະຫາວິທະຍາໄລແຫ່ງຊາດ ສິງກະໂປ, ພາຍຫຼັງບົດກ່າວຄຳເຫັນນຳສະເໜີຂອງທ່ານເລຂາທິການໃຫຍ່, ປະທານປະເທດ ໂຕເລິມ ໃນກອງປະຊຸມ Shangri-la ຄັ້ງທີ 23, ເຊິ່ງໄດ້ດຳເນີນໃນຕອນຄ່ຳວັນທີ 29 ພຶດສະພາ.
ເມື່ອຕີລາຄາສູງບົດກ່າວຄຳເຫັນນຳສະເໜີຂອງທ່ານເລຂາທິການໃຫຍ່, ປະທານປະເທດ ໂຕເລິມ, ທ່ານ Kao Kim Hourn ເລຂາທິການໃຫຍ່ ອາຊຽນ ໄດ້ໃຫ້ຂໍ້ສັງເກດວ່າ ບົດກ່າວຄຳເຫັນໄດ້ສົ່ງສານການເມືອງທີ່ຈະແຈ້ງທີ່ສຸດ ໂດຍຖືວ່າ ບັນດາປະເທດຕ້ອງຮ່ວມແຮງຮ່ວມໃຈແກ້ໄຂບັນດາສິ່ງທ້າທາຍ ແລະ ວິກິດການໃນປັດຈຸບັນ. ໃນນັ້ນ, ຈຸດສຸມແມ່ນການແກ້ໄຂວິກິດການກ່ຽວກັບຄວາມເຊື່ອໝັ້ນຍຸດທະສາດ ແລະ ຄວາມເປັນລະບຽບຮຽບຮ້ອຍສາກົນ, ພ້ອມທັງຊຸກຍູ້ບົດບາດເປັນໃຈກາງຂອງ ອາຊຽນ ໃນການແກ້ໄຂບັນດາບັນຫາພາກພື້ນ ແລະ ທົ່ວໂລກ.
