ຫ້ອງວ່າການລັດຖະບານ ຫາກໍປະກາດໃຊ້ແຈ້ງການກ່ຽວກັບບົດສະຫຼຸບຂອງທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ຢູ່ທີ່ກອງປະຊຸມທາງໄກລະຫວ່າງ ນາຍົກລັດຖະມົນຕີ ກັບ ປະຊາຄົມວິສາຫະກິດ ແລະ ທ້ອງຖິ່ນຕ່າງໆ ກ່ຽວກັບມາດຕະການສືບຕໍ່ໜູນຊ່ວຍວິສາຫະກິດໃນສະພາບໂລກລະບາດໂຄວິດ - 19. ແຈ້ງການຊີ້ແຈ້ງວ່າ: ລັດຖະບານ ມີຄວາມເຂົ້າໃຈ ແລະ ແບ່ງປັນຄວາມຫຍຸ້ງຍາກ, ສິ່ງທ້າທາຍເຊິ່ງປະຊາຄົມວິສາຫະກິດ, ນັກທຸລະກິດພວມປະເຊີນໜ້າໃນຕະຫຼອດໄລຍະ 2 ປີ ຜ່ານມາ ຍ້ອນໂລກລະບາດໂຄວິດ - 19. ລັດຖະບານ ໄດ້ປະກາດໃຊ້ ແລະ ຜັນຂະຫຍາຍຫຼາຍນະໂຍບາຍທັງປ້ອງກັນ, ຕ້ານໂລກລະບາດ, ທັງພັດທະນາເສດຖະກິດ. ເພື່ອປະຕິບັດເປົ້າໝາຍທັງປ້ອງກັນ, ທັງຕ້ານໂລກລະບາດ, ທັງຟື້ນຟູ ແລະ ພັດທະນາເສດຖະກິດຢ່າງມີປະສິດທິຜົນນັ້ນ ຕ້ອງມີການເຂົ້າຮ່ວມຂອງທັງລະບົບການເມືອງ, ປະຊາຄົມວິສາຫະກິດ, ນັກທຸລະກິດ, ພ້ອມກັນມານະພະຍາຍາມ, ເປັນຈິດໜຶ່ງໃຈດຽວກັນ, ຕັດສິນໃຈແກ້ໄຂຄວາມຫຍຸ້ງຍາກ, ຮັກສາຄວາມເຊື່ອໝັ້ນ, ຖືເອົາຄວາມຫຍຸ້ງຍາກ, ສິ່ງທ້າທາຍເປັນກຳລັງໜູນເພື່ອບືນຕົວຂຶ້ນ. ທ່ານນາຍົກລັດຖະມົນຕີ ຮຽກຮ້ອງໃຫ້ກະຊວງ, ຂະແໜງການ, ທ້ອງຖິ່ນຕ່າງໆ ຈົ່ງສືບຕໍ່ປະຕິບັດໜ້າທີ່, ມາດຕະການທີ່ໄດ້ວາງອອກໃນມະຕິຂອງພັກ, ສະພາແຫ່ງຊາດ, ລັດຖະບານໃຫ້ຄົບຊຸດ ແລະ ມີປະສິດທິຜົນ, ຍາມໃດກໍຮ່ວມເດີນທາງ, ໜູນຊ່ວຍ, ສ້າງເງື່ອນໄຂສະດວກທີ່ສຸດໃຫ້ແກ່ການເຄື່ອນໄຫວຜະລິດ, ດຳເນີນທຸລະກິດຂອງວິສາຫະກິດ, ສ້າງວຽກເຮັດງານທຳ, ສ້າງລາຍຮັບເປັນປົກກະຕິໃຫ້ຊາວຜູ້ອອກແຮງງານ.
(ແຫຼ່ງຄັດຈາກ VOV)
