ທ່ານ Anatoly Artamonov, ຜູ້ວ່າການເຂດ Kaluga ແລະ ທ່ານປະທານປະເທດ ເຈິ່ນດ້າຍກວາງ
(ພາບ: ສຳນັກຂ່າວສານ)
ກ່ອນໜ້ານັ້ນ, ທ່ານປະທານປະເທດ ເຈິ່ນດ້າຍກວາງ ໄດ້ໃຫ້ການຕ້ອນຮັບຜູ້ວ່າການເຂດ Kaluga, ທ່ານ Anatoly Artamonov. ນະທີ່ນີ້, ທ່ານປະທານປະເທດ ເຈິ່ນດ້າຍກວາງ ສະແດງຄວາມຫວັງວ່າ, ອຳນາດການປົກຄອງ ແລະ ປະຊາຊົນ Kaluga ສືບຕໍ່ສ້າງເງື່ອນໄຂສະດວກໃຫ້ບັນດາວິສາຫະກິດ ຫວຽດນາມ ລົງທຶນ, ດຳເນີນທຸລະກິດສຳເລັດຜົນຢູ່ທີ່ນີ້. ສ່ວນຜູ້ວ່າການ Anatoly Artamonov ກໍ່ປາຖະໜາຈະກາຍເປັນຄູ່ຮ່ວມມືທີ່ໜ້າໄວ້ເນື້ອເຊື່ອໃຈຂອງ ຫວຽດນາມ. ຕອນບ່າຍຂອງວັນດຽວກັນ, ທ່ານປະທານປະເທດ ເຈິ່ນດ້າຍກວາງ ໄດ້ໃຫ້ການຕ້ອນຮັບຄະນະການນຳທະນາຄານພັດທະນາເສດຖະກິດສາກົນ ລັດເຊຍ. ທ່ານປະທານປະເທດ ເຈິ່ນດ້າຍກວາງ ເນັ້ນໜັກວ່າ ດ້ວຍແຜນນະໂຍບາຍຂອງການນຳຂັ້ນສູງ ຫວຽດນາມ ແລະ ສະຫະພັນລັດເຊຍ, ທະນາຄານສູນກາງສອງປະເທດ ຈະສົມທົບກັນສ້າງທຸກເງື່ອນໄຂສະດວກໃຫ້ບັນດາວິສາຫະກິດ ຫວຽດນາມ ແລະ ສະຫະພັນ ລັດເຊຍ ຮ່ວມມືລົງທຶນ, ດຳເນີນທຸລະກິດໃນຜືນແຜ່ນດິນຂອງກັນ.
ຕອນເຊົ້າຂອງວັນດຽວກັນ, ຢູ່ນະຄອນຫຼວງ ມົດສະກູ, ທ່ານປະທານປະເທດ ເຈິ່ນດ້າຍກວາງ ແລະ ຄະນະຜູ້ແທນໄດ້ໄປຢ້ຽມຢາມກຸ່ມບໍລິສັດ Zarubezhneft, ເຊິ່ງແມ່ນໜຶ່ງໃນບັນດາກຸ່ມບໍລິສັດນຳ້ມັນອາຍແກສແຖວໜ້າຂອງສະຫະພັນ ລັດເຊຍ. ນະທີ່ນີ້, ທ່ານປະທານປະເທດ ເຈິ່ນດ້າຍກວາງໄດ້ສົ່ງເສີມ, ສະໜັບສະໜູນເລື່ອງເປີດກວ້າງການຮ່ວມມືໃນຂົງເຂດຊອກຫາ, ສຳຫຼວດ, ຂຸດຄົ້ນນຳ້ມັນອາຍແກສ. ທ່ານປະທານປະເທດ ເຈິ່ນດ້າຍກວາງ ອວຍພອນການພົວພັນຮ່ວມມືລະຫວ່າງກຸ່ມບໍລິສັດນຳ້ມັນອາຍແກສແຫ່ງຊາດ ຫວຽດນາມ ແລະ ກຸ່ມບໍລິສັດ Zarubezhneft ນັບມື້ນັບໄດ້ຮັບການເພີ່ມທະວີ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ - ສັງຄົມຂອງສອງປະເທດ, ປັບປຸງສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ຫວຽດນາມ ແລະ ສະຫະພັນ ລັດເຊຍ.
(ແຫຼ່ງຄັດຈາກ VOV)
