ທ່ານນາຍົກລັດຖະມົນຕີຫງວຽນເຕີນຢູງພົບປະກັບ
ນາຍົກລັດຖະມົນຕີໄທປຣາຢຸດ ຈັນໂອຈາ
ເນື່ອງໃນໂອກາດເຂົ້າຮ່ວມກອງປະຊຸມສຸດຍອດພິເສດ ອາຊຽນ - ອາເມລິກາ ຢູ່ Califonia ແຕ່ວັນທີ 15-16/2, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ພົບປະສອງຝ່າຍກັບນາຍົກລັດຖະມົນຕີ ໄທ ປຣາຢຸດ ຈັນໂອຈາ ເພື່ອແລກປ່ຽນບັນດາມາດຕະການຊຸກຍູ້ການຮ່ວມມືຢ່າງແຮງລະຫວ່າງສອງປະເທດໃນໄລຍະຈະມາເຖິງ. ນາຍົກລັດຖະມົນຕີທັງສອງທ່ານ ໄດ້ເຫັນດີສົມທົບນຳກັນຊີ້ນຳການປະຕິບັດໂຄງການດຳເນີນງານຜັນຂະຫຍາຍການພົວພັນຄູ່ຮ່ວມມືຍຸດທະສາດໄລຍະ 2014-2018 ແລະ ບັນດາໝາກຜົນຂອງກອງປະຊຸມຄະນະລັດຖະບານຮ່ວມຄັ້ງທີ 3 (7/2015) ຢ່າງມີປະສິດທິຜົນ. ທີ່ການພົບປະ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ສະເຫນີ ສອງຝ່າຍ ຄວນສົມທົບກັນຜັນຂະຫຍາຍບົດບັນທຶກຊ່ວຍຈຳກ່ຽວກັບການຮ່ວມມືແຮງງານ ແລະ ຂໍ້ຕົກລົງຮັບສະໝັກຄົນງານທີ່ຫາກໍລົງນາມເມື່ອເດືອນ 7/2015, ມີບັນດາກົນໄກຫນູນຊ່ວຍເພື່ອຊຸກຍູ້ບັນຫານີ້. ຄຽງຄູ່ກັນນັ້ນ ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີ ຝ່າຍໄທຈົ່ງສົມທົບຢ່າງແຫນ້ນແຟ້ນກັບຫວຽດນາມ ໃນການແກ້ໄຂບັນຫາຊາວປະມົງ, ເຮືອກຳປັ່ນຕາມຈິດໃຈມະນຸດສະທຳ, ມິດຕະພາບ ຂອງປະຊາຊົນສອງປະເທດ ແລະ ການພົວພັນຄູ່ຮ່ວມມືຍຸດທະສາດ. ທ່ານນາຍົກລັດຖະມົນຕີໄທ ປຣາຢຸດ ຈັນໂອຈາ ເຫັນດີ ຍູ້ແຮງການພົວພັນາຮ່ວມມືລະຫວ່າງສອງປະເທດໃນບັນດາຂົງເຂດ ເສດຖະກິດ ການຄ້າ ການລົງທຶນ ແລະ ສຸມໃສ່ແກ້ໄຂບັນດາບັນຫາສຳຄັນຄື: ການຮ່ວມມືແຮງງານ, ອາຊີບຫາປາ,ກະສິກຳ. ນາຍົກລັດຖະມົນຕີທັງສອງທ່ານ ກໍເຫັນດີກ່ຽວກັບການເພີ່ມທະວີຄວາມສາມັກຄີ, ເສີມຂະຫຍາຍບົດບາດໃຈກາງຂອງອາຊຽນໃນການແກ້ໄຂບັນດາບັນຫາສັນຕິພາບ, ຄວາມໝັ້ນຄົງ ແລະ ການພັດທະນາຂອງພາກພື້ນ.
ນາຍົກລັດຖະມົນຕີໄທປຣາຢຸດ ຈັນໂອຈາ
(ແຫຼ່ງຄັດຈາກ VOV)
