ທ່ານນາຍົກລັດຖະມົນຕີ ຫງວຽນຊວນຟຸກ ໂອ້ລົມສົນທະນາກັບກຳມະກອນຈາກ
ບັນດາເຂດອຸດສາຫະກຳເຂດທົ່ງພຽງແມ່ນ້ຳແດງ
(ພາບ: Dan Tri)
ນີ້ແມ່ນເທື່ອທີ 03 ທ່ານນາຍົກລັດຖະມົນຕີ ຫງວຽນຊວນຟຸກ ພົບປະ, ໂອ້ລົມກັບກຳມະກອນ ແລະພະນັກງານກຳມະບານ. ທີ່ການໂອ້ລົມສົນທະນາ, ກຳມະກອນຊາວຜູ້ອອກແຮງງານ ໄດ້ຍົກອອກບັນດາຄວາມຫຍຸ້ງຍາກຫຼາຍຢ່າງ ທີ່ພວມປະສົບຢູ່ ເຊັ່ນ ເລື່ອງວຽກເຮັດງານທຳ, ເງິນເດືອນ, ລາຄາ, ຊີວິດດ້ານວັດທະນະທຳ, ສະພາບຄວາມປອດໄພ ຫຼັກອະນາໄມໃນການອອກແຮງງານ, ເງື່ອນໄຂການກິນການຢູ່ ຢູ່ບັນດາເຂດອຸດສາຫະກຳ, ເຂດຜະລິດສົ່ງອອກ ເມື່ອແກ້ຕອບ ກ່ຽວກັບບັນດາບັນຫາກ່າວມາຂ້າງເທິງນັ້ນ, ທ່ານນາຍົກລັດຖະມົນຕີ ຫງວຽນຊວນຟຸກ ຖືວ່າ:
“ລັດຖະບານໄດ້ມີແຜນນະໂຍບາຍກ່ຽວກັບບັນຫາເຮືອນຢູ່ສັງຄົມ,ເຂດບໍລິການດ້ານວັດທະນະທຳເພື່ອຮັບໃຊ້ໃຫ້ແກ່ກຳມະກອນ. ຄວນສະຫງວນທີ່ດິນ, ລະດົມທຸກແຫຼ່ງກຳລັງ ນັບທັງຂອງກຳມະບານເພື່ອກໍ່ສ້າງເຮືອນຢູ່ສັງຄົມ. ກໍາມະບານຫວຽດນາມໄດ້ມີ 500 ຕື້ດົງ ແລະພວມລໍຖ້ານະຄອນຮ່າໂນ້ຍມອບທີ່ດິນໃຫ້ ເພື່ອກໍ່ສ້າງເຮືອນຢູ່ສັງຄົມ. ແລະ ບັນດາວິສາຫະກິດ ຕ້ອງສືບຕໍ່ປະກອບສ່ວນໃຫ້ສັງຄົມ, ສະຫງວນແຫຼ່ງກຳລັງເໝາະສົມເພື່ອກໍ່ສ້າງເຮືອນຢູ່ໃຫ້ແກ່ກຳມະກອນ, ພິເສດແມ່ນ ຕ້ອງມີລະບົບໂຮງຮຽນລ້ຽງເດັກ ເພື່ອໃຫ້ລູກຫຼານຂອງກຳມະກອນມີບ່ອນຢູ່ ທີ່ບັນລຸມາດຕະຖານທີ່ຈໍາເປັນ”.
ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ມອບທຶນການສຶກສາ 65 ທຶນໃຫ້ແກ່ກຳມະກອນຊາວຜູ້ອອກແຮງງານເພື່ອລະດົມກຳລັງໃຈ, ສົ່ງເສີມກຳມະກອນສຶກສາຮ່ຳຮຽນ, ຍົກສູງລະດັບຄວາມຮູ້ ແລະ ມອບເຮືອນ 18 ຫຼັງໃຫ້ກຳມະກອນຊາວຜູ້ອອກແຮງງານທີ່ປະສົບກັບຄວາມຫຍຸ້ງຍາກ.
ກ່ອນໜ້ານັ້ນ, ຕອນບ່າຍວັນທີ 19 ພຶດສະພາ, ໃນການປະຕິບັດງານຢູ່ ຮ່ານາມ, ເພື່ອກະກຽມໃຫ້ການໂອ້ລົມສົນທະນາກັບກຳມະກອນຢູ່ເຂດພາກເໜືອຂອງຫວຽດນາມ. ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ລົງກວດກາຕົວຈິງວຽກງານການກໍ່ສ້າງເຂດບໍລິການປະສົມຮັບໃຊ້ໃຫ້ແກ່ກຳມະກອນຢູ່ເຂດອຸດສາຫະກຳ ດົງວັນ 2.
(ແຫຼ່ງຄັດຈາກ VOV)
