ຂ່າວສານ
ນາຍົກລັດຖະມົນຕີຫງວຽນຊວນຟຸກໄປບຣຸກແຊນ,ເຂົ້າຮ່ວມ ASEM 12, ເຮັດວຽກຢູ່ EU, ຢ້ຽມຢາມແບນຊິກຢ່າງເປັນທາງການ
(ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ແລະ
ທ່ານນາຍົກລັດຖະມົນຕີແບນຊິກ Charles Michel)
ເລີ່ມຕົ້ນການເຂົ້າຮ່ວມກອງປະຊຸມສຸດຍອດອາຊີ - ເອີລົບ (ASEM) ຄັ້ງທີ 12, ຢ້ຽມຢາມ ແລະ ເຮັດວຽກຢູ່ສະຫະພາບເອີລົບ (EU) ແລະ ຢ້ຽມຢາມລາຊະອານາຈັກແບນຊິກ ຢ່າງເປັນທາງການ, ຕາມຄຳເຊີນຂອງທ່ານປະທານສະພາເອີລົບ Donald Tusk, ທ່ານປະທານຄະນະກຳມະການເອີລົບ Jean Claude Juncker ແລະ ທ່ານນາຍົກລັດຖະມົນຕີແຫ່ງລາຊະອານາຈັກແບນຊິກ Charles Michel. ການຢ້ຽມຢາມດຳເນີນໃນລະຫວ່າງວັນທີ 16 – 19 ຕຸລາ.
ພາຍຫຼັງໄປຮອດນະຄອນຫຼວງບຣຸກແຊນ (ແບນຊິກ), ທ່ານນາຍົກລັດຖະມົນຕີແບນຊິກ Charles Michel ໄດ້ເປັນປະທານພິທີຕ້ອນຮັບຄະນະ. ພາຍຫຼັງພິທີຕ້ອນຮັບ, 2 ຝ່າຍໄດ້ດຳເນີນການເຈລະຈາ.ທີ່ການເຈລະຈາ, ນາຍົກລັດຖະມົນຕີ 2 ທ່ານໄດ້ເຫັນດີເພີ່ມທະວີການຮ່ວມມືໃນບັນດາຂົງເຂດກະສິກຳ, ການສຶກສາບຳລຸງສ້າງ, ວັດທະນະທຳ, ການຄົມມະນາຄົມຂົນສົ່ງ; ສ້າງເງື່ອນໄຂສະດວກເພື່ອໃຫ້ວິສາຫະກິດ 2 ປະເທດລົງທຶນ, ດຳເນີນທຸລະກິດຢູ່ຕະຫຼາດຂອງກັນ, ໂດຍສະເພາະແມ່ນໃນສະພາບທີ່ສັນຍາການຄ້າເສລີລະຫວ່າງຫວຽດນາມ ແລະ EU ໃກ້ຈະໄດ້ຮັບການລົງນາມ.
ທ່ານນາຍົກລັດຖະມົນຕີ ຫງວຽນຊວນຟຸກ ແບ່ງປັນວ່າ, 2 ຝ່າຍຄວນເນັ້ນໜັກເຖິງບັນຫາພັດທະນາການສຶກສາຂັ້ນມະຫາວິທະຍາໄລເພື່ອແລກປ່ຽນບັນດາບົດຮຽນບຳລຸງສ້າງແຫຼ່ງຊັບພະຍາກອນມະນຸດຢູ່ຫວຽດນາມ; ຢືນຢັນວ່າ ການຮ່ວມມືຮອບດ້ານ, ມີປະສິດທິຜົນແມ່ນເປົ້າໝາຍສຳຄັນທີ່ສຸດໃນການພົວພັນລະຫວ່າງ 2 ປະເທດ. ທີ່ການເຈລະຈາ, ແບນຊິກ ໄດ້ເປັນເອກະພາບຈະໜູນຊ່ວຍໃຫ້ແກ່ຫວຽດນາມ ເພື່ອຊຸກຍູ້ການລົງນາມໃນສັນຍາການຄ້າເສລີຫວຽດນາມ - EU, ຜ່ານນັ້ນສ້າງເງື່ອນໄຂພັດທະນາດ້ານການຄ້າ, ການລົງທຶນລະຫວ່າງ 2 ປະເທດ.
ສິ້ນສຸດການເຈລະຈາ, ນາຍົກລັດຖະມົນຕີ 2 ທ່ານໄດ້ເປັນສັກຂີພິຍານພິທີລົງນາມ ໃນເອກະສານຮ່ວມມື 2 ຝ່າຍບາງສະບັບໃນບັນດາຂົງເຂດຄື: ກະສິກຳ, ສຸຂະອະນາໄມດ້ານອາຫານ, ທ່າກ່ຳປັ່ນ ແລະ ບາງຂົງເຂດອື່ນໆຂອງບັນດາອົງການ, ວິສາຫະກິດ.
ພາຍຫຼັງການເຈລະຈາ, ທ່ານນາຍົກລັດຖະມົນຕີ ຫງວຽນຊວນຟຸກ ແລະ ທ່ານນາຍົກລັດຖະມົນຕີ Charles Michel ໄດ້ຈັດການປະຊຸມຂ່າວຕໍ່ສື່ມວນຊົນເພື່ອແຈ້ງໝາກຜົນບາງຢ່າງຂອງການເຈລະຈາ. ທີ່ການປະຊຸມຂ່າວ, ນາຍົກລັດຖະມົນຕີ 2 ທ່ານໄດ້ເນັ້ນໜັກວ່າ, ການເຈລະຈາບັນລຸໄດ້ຜົນສຳເລັດຢ່າງດີງາມ ແລະ 2 ຝ່າຍໄດ້ເປັນເອກະພາບນຳກັນວ່າຈະຊຸກຍູ້ການຮ່ວມມືໃນຫຼາຍຂົງເຂດ. 2 ຝ່າຍພ້ອມກັນປຶກສາຫາລືກ່ຽວກັບການຮ່ວມມືໃນຂົງເຂດບັນດິດ, ການສຶກສາບຳລຸງສ້າງ ແລະ ແລກປ່ຽນການຮ່ວມມືໃນຂົງເຂດດັ່ງກ່າວ. 2 ຝ່າຍກໍ່ປຶກສາຫາລືກ່ຽວກັບຂອບເຂດການຊຸກຍູ້ບັນດາສັນຍາການຄ້າເສລີຫວຽດນາມ - ສະຫະພາບເອີລົບ (EU). 2 ປະເທດຈະພ້ອມກັນໜູນຊ່ວຍເພື່ອຊຸກຍູ້ສັນຕິພາບ ແລະ ຄວາມໝັ້ນຄົງຢູ່ທະເລຕາເວັນອອກ; ພ້ອມກັນຄັດຄ້ານບັນດາການກະທຳພຽງລຳຟັງຝ່າຍດຽວ, ລະເມີດສັນຕິພາບ, ກົດໝາຍສາກົນ.
(ແຫຼ່ງຄັດຈາກ VOV)
